எனது நாட்குறிப்புகள்

Archive for மே, 2012

​பெட்​ரோல் வி​லை உயர்வு – எதிர்ப்பதற்கு எதிர்கட்சிகளுக்கு தகுதியுண்டா

Posted by ம​கேஷ் மேல் மே 25, 2012

வரும் 31ம் தேதி பாரத் பந்திற்கு அழைப்பு விடுத்துள்ளது பிஜேபி. நேற்று நாடு முழுவதும் சிபிஐ(எம்) பெட்ரோல் உயர்வை எதிர்த்து ஆர்ப்பாட்டம் நடத்தியுள்ளது. அதிமுக பொதுச் செயலாளரும் தமிழ்நாடு முதல்வருமான ஜெ.ஜெயலலிதா, “மத்தியில் ஒரு அரசு இருக்கிறதா, ஆட்சி நடக்கிறதா என்பதே கேள்விக்குறியாக உள்ளது” என்று கண்டனம் தெரிவித்துள்ளார். திமுக தலைவரும் தமிழ்நாட்டின் பிரதான எதிர்க்கட்சி தலைவருமான மு. கருணாநிதி, பெட்ரோல் விலையேற்றத்தை கடுமையாக எதிர்ப்பதாகக் கூறியுள்ளார்.

காங்கிரஸ் கட்சியின் பல்வேறு தலைவர்களும் கூட, “இது மக்களால் தாங்கிக்கொள்ள முடியாத மிகப்பெரிய விலையேற்றம்” என கருத்து தெரிவித்து வருகின்றனர்.

இந்த விலையேற்றத்திற்கான தயாரிப்புகளை சில மாதங்களாகவே மத்திய அரசின் அமைச்சர்கள் செய்து கொண்டுதான் இருந்தனர். மத்திய அமைச்சர்கள் “கண்டிப்பாக விலை உயர்த்தித்தான் ஆகவேண்டும், எண்ணெய் நிறுவனங்கள் இச்சுமையை தாங்காது” என அறிக்கை விட்டுக் கொண்டுதான் இருந்தனர். அதே போல் நாடு முழுவதும் கடும் எதிர்ப்பு கிளம்பும் என்பதும் அவர்களுக்கு தெரியாத ஒன்றல்ல. சமாளிக்கும் யுக்திகளும் அவர்களிடம் இல்லாமல் இல்லை. ஒரு வேளை அவர்களின் திட்டப்படி ரூ. 7.54 என்பதே குறைப்பதற்கான விலையையும் உள்ளடக்கியதாகத்தான் இருக்கும் என்பது யாருக்கும் புரியாததல்ல.

ஆனால் தற்பொழுது எழும் எதிர்ப்புகளுக்கு மத்திய அரசு, “இந்த விலை உயர்விற்கு எண்ணெய் நிறுவனங்கள்தான் காரணம், விலை நிர்ணயிக்கும் உரிமை அவர்களிடம்தான் உள்ளது” என மிகச் சாமர்த்தியமாக பதில் சொல்கின்றன.

நாடோடி மன்னன் படத்தில் வரும் வசனம் தான் மீண்டும் மீண்டும் ஞாபகத்திற்கு வருகிறது.

அரசர்: நீங்கள் யாருக்கு எதிராக கலகம் செய்கிறீர்கள்?
கலகக்காரன்: நாங்கள் மன்னருக்கு எதிராக கலகம் செய்கிறோம்!
அரசர்: நானும் உங்களுடன் சேர்ந்து கொண்டால்?
கலகக்காரன்: அப்படியானால் நாங்கள் யாருக்கு எதிராகப் போராடுவது?!?!

இன்றைய இந்திய ஆளும் வர்க்கங்கள், தங்களின் எதிரி யார், யாருக்கு எதிராக ஒரு விசயத்தில் போராடுவது, என்பன போன்ற விசயங்களில் மக்களை மிகச் சாமர்த்தியமாக ஏமாற்ற முடியும் என தப்புக் கணக்கு போடுகின்றன. மட்டமான அல்பமான வழிமுறைகளை உருவாக்கி மக்களை குழப்பியடிக்க முயற்சிக்கின்றன. இதன் மூலமாக மக்களின் போராட்டம் சட்டப்பூர்வமான வழிமுறைகளில் இல்லை. இவ்விசயத்தில் உண்மையான அதிகாரம் உடையவர்கள் யார் என்று கூடத் தெரியாமல் போராடுகிறார்கள் என்று கூறி தாக்குதல்களையும் அடக்குமுறையையும் ஏவுவதற்கான வழிமுறைகளை தங்களுக்குச் சாதகமாக ஏற்பாடு செய்து கொள்கிறார்கள்.

மத்திய அரசு வசம் விலையேற்றுவதற்கான உண்மையான அதிகாரம் இல்லை என்பது உண்மையானால். விலையேற்றத்தின் தவிர்க்கமுடியாமை குறித்தும் நியாயம் குறித்தும் முன்னதாகவே மத்திய அமைச்சர்கள் அறிக்கை வெளியிட வேண்டிய தேவை என்ன? சட்டமன்ற தேர்தல்கள் முடியும் வரை விலை உயர்வைத் தள்ளிப் போட முடிவது எப்படி? பாராளுமன்ற கூட்டத் தொடர் முடியும் வரை தள்ளிப் போட வேண்டியது எதனால்? உண்மையில் விலை நிர்ணயிக்கும் உரிமையை எண்ணெய் நிறுவனங்களிடமே கொடுத்திருப்பதாகக் கூறுவது ஒரு வித ஏமாற்று வேலைதான், எதிர்ப்பை சமாளிப்பதற்கான, போராட்டங்களை குழப்புவற்கான ஒரு யுக்தியே. உண்மையில் இப்பிரச்சினை தனியார் எண்ணெய் நிறுவனங்களை அனுமதித்ததன் பின்னணயில் புரிந்து கொள்ளப்பட வேண்டியவை. விலை நிர்ணயிப்பதில் தனியார் எண்ணெய் நிறுவனங்களும், அரசு எண்ணெய் நிறுவனங்களும், மத்திய அரசும் கூடிச் சதி செய்கின்றன.

பிஜேபி ஆட்சியில் இருந்த போது கொண்டு வரப்பட்டதுதான் எண்ணெய் நிறுவனங்களே விலை நிர்ணயித்துக் கொள்வதற்கான முடிவு என்று காங்கிரஸ் அரசு பிஜேபியை நோக்கி, “இவனும் ஒன்றும் யோக்கியனில்லை, புரிந்து கொள்ளுங்கள்” என்ற தொணியில் பேசுகிறது. பிஜேபி ஆட்சியிலும் பெட்ரோல் விலை பல முறை இதே போன்று உயர்த்தப்பட்டுக் கொண்டுதான் இருந்தன. இப்பொழுது மட்டும் பிஜேபிக்கு இவ்விலை உயர்வை கண்டிக்கும் தகுதி எப்படி வந்தது?

ஒரே ஒரு காரணம் தான் சொல்லமுடியும், அது அவர்களும் இன்றைக்கு எதிர்க்கட்சி என்பதுதான்.

உண்மையில் கச்சா எண்ணெய் கொள்முதல் செய்து சுத்திகரித்து பெட்ரோல் பிரிக்க ஆகும் அடக்கச் செலவு ரூ. 25க்கும் குறைவுதான் என்கிறார்கள் பல நிபுணர்கள். இன்றைய தேதிக்கு ரூ. 52க்கும் மேல் கூடுதலாக வைத்து விற்பனை செய்கிறார்கள். அதாவது அதன் உற்பத்திச் செலவைவிட மூன்று மடங்கு விலையில் ஒரு லிட்டர் பெட்ரோல் இந்தியாவில் விற்கப்படுகிறது. கடந்த ஆறுமாதமாக ஒரு வருடமாக கடும் நட்டத்தில் எண்ணெய் நிறுவனங்கள் இயங்குகின்றன என்பது போன்ற அறிக்கைகள் விடப்படுகின்றன. ஆனால் கடந்த கால எந்த எண்ணெய் நிறுவனங்களின் ஆண்டறிக்கையும் நட்டக்கணக்கு காட்டவே இல்லை. இதை இணையத்தில் தேடுபவர்கள் கூட கண்டடைந்து கொள்ள முடிகிறது, ஒவ்வொரு ஆண்டும் 10.000 கோடி என்ற கணக்கில் லாபம் காட்டப்படுகிறது. தொடர்ந்து பல மாதங்களாக சர்வதேச சந்தை விலையைவிட நட்டத்தில் விற்பனை செய்யும் எண்ணெய் நிறுவனங்கள் எப்படி ஆண்டறிக்கையில் மட்டும் பல கோடியில் லாபக் கணக்கு காட்ட முடியும்? யாரை ஏமாற்றுகிறது இந்த அறிக்கைகள்?

மத்திய அரசு மானியம் கொடுக்கிறது பெட்ரோலுக்கு என்று சொல்லும் கூற்றைவிட கேலிக்குரியது வேறொன்றுமில்லை. மத்திய மாநில அரசுகள் வரியாகவே ஒரு லிட்டர் பெட்ரோலின் அடக்க விலையை விட அதிகமாக மக்களிடமிருந்து கொள்ளையடிக்கின்றன. 200 சதவீதத்திற்குமேல் லாபம் வைத்து விற்கப்படும் ஒரு பொருளில் ஒன்று அல்லது இரண்டு சதவீதத்தை கழிவு என விட்டுக் கொடுப்பதற்கு பெயர் மானியமா? இதைவிட அபத்தமான வாதம் வேறொன்று இருக்க முடியுமா?

எண்ணெய் நிறுவனங்கள் அமைக்க தனியாருக்கு அனுமதி அளித்ததும், எண்ணெய் நிறுவனங்களின் செயல்பாடுகளும், கணக்கு வழக்குகளும் வெளிப்படைத்தன்மையின்றி இருப்பதும், ஒரு பொருளின் உற்பத்தி மதிப்பில் எத்தனை சதவீதத்திற்குள் அதன் மீதான லாபம், வரி, இடைத்தரகர்கள் கூலி போன்றவை இருக்கலாம் என்பற்கான வரைமுறைகளும் இல்லாததுதான் இப்பிரச்சினைகளுக்கான அடிப்படைக் காரணம்.

பெட்ரோல், டீசல், மின்சாரம் போன்றவை மிக அடிப்படையான பொருட்கள் இவற்றின் மீதான விலையேற்றம் ஒட்டுமொத்த விலைவாசி உயர்விற்கும் செலவினங்களின் உயர்விற்கும் இட்டுச்செல்லக்கூடியவை. இவற்றின் கொள்முதல், தயாரிப்பு, விற்பனை, வரி, லாபம் போன்ற விசயங்களிலேயே குறைந்தபட்ச நேர்மையை கடைபிடிக்க முடியாத அரசுகள் எப்படி சமூகத்தின் பிற அனைத்து விசயங்களிலும் நேர்மையுடனும், சமூக அக்கறையுடனும் நடந்து கொள்ள முடியும் என்பதான மிகமிக முக்கியமானதும் பயமுறுத்தக்கூடியதுமான கேள்விகளுக்கு நாம் முகம் கொடுத்தே ஆகவேண்டும்.

இவ்விலை உயர்விற்கு எதிராக போராடக்கூடியவர்கள் சிபிஎம், பிஜேபி யாராக இருந்தாலும் சரி, அவர்கள்

1. தனியார் எண்ணெய் நிறுவனங்களின் உரிமங்களை ரத்து செய்வதற்காக போராடுவோம்
2. எண்ணெய் நிறுவனங்களின் வெளிப்படைத்தன்மைக்காக போராடுவோம்
3. பொருளின் உற்பத்திச் செலவில் இத்தனை சதவீதத்திற்கு மேல் விலை உயர்த்துவதை அனுமதிக்க மாட்டோம்

போன்ற கோரிக்கைகளுக்கு உத்திரவாதம் கொடுக்க வேண்டும்.

தற்பொழுதைய எண்ணெய் நிறுவனங்களின் அமைப்பு வடிவம், செயல்பாடு, விநியோக முறை ஆகியவை எப்படி தற்பொழுதைய பிரச்சினைகளுக்கு காரணம், அவற்றை தீர்ப்பதற்கான தங்களிடம் உள்ள மாற்றுத் திட்டம் என்ன? என்பவற்றை வெளியீடுகளாகக் கொண்டு வந்து அதை மாற்றி அமைப்போம் என மக்கள் மத்தியில் உறுதி ஏற்க வேண்டும். அப்படிச் செய்யாமல் அவர்கள் பெட்ரோல் விலை உயர்வை எதிர்த்து நடத்தும் போராட்டங்கள் ரூ. 7.50லிருந்து ஐம்பது பைசாவோ ஒரு ரூபாயோ குறைக்கும் அரசின் மோசடித்தனத்தில் தங்களுக்கான பங்கைக் கோரி மக்களை ஏமாற்றுவதற்குத்தானே தவிர வேறல்ல. அது அடுத்த தேர்தலை குறிவைத்துத்தானே தவிர பிரச்சினைக்கான உண்மையான முழுமையான தீர்விற்காக அல்ல.

Advertisements

Posted in கட்டு​ரை | Leave a Comment »

மாவோயிஸ்ட் என முத்திரை சுமத்தப்பட்ட மாணவி மம்தாவிற்கு திறந்த மடல்

Posted by ம​கேஷ் மேல் மே 22, 2012

தொலைக்காட்சி நிகழ்ச்சியில் மேற்கு வங்க முதல்வர் மம்தாவிடம் கேட்ட கேள்வியால் மம்மதா பேனர்ஜியால் நாடு முழுவதும் பிரபலமாக்கப்பட்ட மாணவர் டானியா பரத்வாஜ் மேற்கு வங்க முதல்வருக்கு எழுதிய ஒரு திறந்த மடலின் தமிழ் மொழிபெயர்ப்பை கீழ்க்கண்ட தொடுப்பில் படிக்கவும்:


மாவோயிஸ்ட் என முத்திரை சுமத்தப்பட்ட மாணவி மம்தாவிற்கு திறந்த மடல்

Posted in பொது | Leave a Comment »

மா​வோயிஸ்ட் மாணவர்கள் – ​மேற்கு வங்க முதல்வர்

Posted by ம​கேஷ் மேல் மே 20, 2012

தொலைக்காட்சி நிகழ்ச்சி ஒன்றில் கல்லூரி மாணவர்களின் கேள்விகளை எதிர்கொள்ள முடியாமல் மாணவர்களை மாவோயிஸ்ட்கள் என குற்றம்சாட்டிவிட்டு நிகழ்ச்சியிலிருந்து பயந்தோடிய மேற்கு வங்க முதல்வர் மம்தா பேனர்ஜி

கீழ்க்கண்ட தொடுப்பில் யூடியுபில் காணவும்

Posted in பொது | Leave a Comment »

காலவரி​சையில் பாரதி பாடல்கள்

Posted by ம​கேஷ் மேல் மே 13, 2012

கடந்த மாத காலச்சுவடில் “காலவரிசையில் பாரதி பாடல்கள்” நூலுக்கான முன்வெளியீட்டுத்திட்ட விளம்பரம் வெளிவந்திருந்தது. பாரதியாரின் படைப்புகள் அனைத்தையும் காலவரிசையில் பனிரெண்டு தொகுதிகளாக கடந்த 50 வருட கடும் உழைப்பில் தனி ஒரு மனிதராக பதிப்பித்த பெரியவர் சீனி. விசுவுநாதன் அவர்களின் பதிப்பு மற்றும் வெளீயீடாக இது வெளிவந்துள்ளது.

முன்பு என்சிபிஎச் பாரதி பாடல்களை வெளிவந்த தேதி விவரத்தோடு ஒரு பதிப்பு கொண்டு வந்தது. ஆனால் அது முதல் பதிப்போடு நின்று போனது. காரணம் தெரியவில்லை. நீண்ட பத்தாண்டுகளுக்குப் பிறகு இப்பொழுது பாரதி நூல் பதிப்பாளரும் பாரதி ஆய்வாளருமான திரு. சீனி விசுவநாதன் அவர்களின் முயற்சியில் காலவரிசைப்படுத்தப்பட்ட பாரதி பாடல்கள், பல ஆய்வுத் தகவல்களுடன் நல்ல பதிப்பாக வெளிவந்துள்ளது.

இப்பதிப்பில் வெளிவந்த தேதி மட்டுமல்லாமல், பதிப்பாளர் குறிப்பாக மேலதிகமான தகவல்கள் இடம்பெற்றுள்ளன. அச்சில் உள்ளதற்கும் கையெழுத்து பிரதியில் உள்ளதற்குமான பாடபேதங்கள், முதல் பதிப்புகளுக்கும் பிற பதிப்புகளுக்குமான பாட பேதங்கள், வெளிவந்த பத்திரிகையின் அட்டைப் படங்கள், பல பாடல்களுக்கு பாரதியின் கையெழுத்து ஒளிப்படம், போன்ற எண்ணற்ற வரலாற்றுக் குறிப்புகளுடனும், திட்டவட்டமாகத் தேதி தெரிந்த பாடல்கள் முதல் பகுதியாகவும், தேதி தெரியாதவை இரண்டாம் பகுதியாகவும் பிரிக்கப்பட்டு, இப்பதிப்பு 1344 பக்கங்களில் மிக விரிவாக செய்யப்பட்டுள்ளது.

தொடர்ந்து சீனி. விசுவநாதன் அவர்களுடன் பேசிக் கொண்டிருந்ததிலும், அவருடைய பாரதி படைப்புகள் கடைசித் தொகுதியான பனிரெண்டாம் தொகுப்பின் பின்னுரையில்,  பாரதி படைப்புகள் தொகுப்பு முயற்சியில் ஈடுபட்ட அனுபவங்களை விவரித்திருப்பதிலுமிருந்து தெரியவரும் விசயங்கள், நம் தமிழ்ச்சூழலில் வரலாற்றுக் அனுகுமுறையில் உள்ள தவறான கண்ணோட்டங்கள் வருத்தமூட்டக்கூடியதாக உள்ளது.

அவர் குறிப்பிடுகிறார்

1. தமிழக அரசாங்கம் 1953 1954 களில் பாரதி பாடல்கள் மற்றும் உரைநடைகளை பல தொகுதிகளாக வெளியிட்டுள்ளது

2. தஞ்சை தமிழ்ப் பல்கலைக் கழகம் 1981-82 பாரதி நுாற்றாண்டு விழாவில் தமிழக முதலமைச்சரின் ஆலோசனைப்படி பதிப்புக் குழு அமைத்து பாரதி படைப்புகளை நுால்களாக வெளியிட்டது.

ஆனால் இந்த இரு அரசு முயற்சிகளுமே ஏற்கனவே பல தனிநபர்களும் தனி நிறுவனங்களும் பதிப்பித்தவைகளையே அரசின் பதிப்பாக கொண்டு வர முயற்சித்ததற்கு மேலதிகமாக ஒரு புதிய முயற்சியும் செய்யவில்லை.

மேலும் பாரதியாரின் மொழி இன்றைய சந்ததியினருக்கு புரியாது என்ற முடிவுடன் வரலாற்று அறிவோ, படைப்புகளை அனுகும் அறிவோ துளியுமின்றி பல எழுத்துக்களையும் சொற்களையும் தற்கால வடிவத்திற்கு ஏற்ப மாற்றி அமைத்துள்ளனர்.

பல பாடல்களுக்கு பாரதி கொடுத்த தலைப்புகளை மாற்றி இவர்களாக வேறு தலைப்புகளை கொடுத்துள்ளனர்.

தமிழ் பல்கலைக் கழக பதிப்பில் இருந்த ஒரே ஒரு சிறப்பு அம்சமான காலவரிசைப்படுத்தப்பட்ட பாரதி பாடல்களுக்கும் சீனி. விசுவநாதன் அவர்களே காரணம் என்பதையும், அதை செய்து தரும் வரை அவரை பயன்படுத்திக் கொண்டு அதன் பிறகு அதை பதிப்புக்கும் பணிகளின் போது அவரை விலக்கி புறக்கணித்து விட்டது என்பதை இப்புதிய பதிப்பின் நீண்ட “என்னுரை”யில் பதிவு செய்துள்ளார்.

பாரதியார் படைப்புகளை காலவரிசையில் வெளிக் கொணர்ந்த முக்கியத்துவம் மட்டும் அவருடையதல்ல. மாறாக கண்டுபிடிக்கப்படாத பல படைப்புகளை அவர் தமிழகம் துவங்கி தில்லி ஆவணக் காப்பகங்கள் வரை அலைந்து தேடிக் கண்டுபிடித்து பதிப்பித்துள்ளார் என்பதும், பல்வேறு பிரதிகளுக்கிடையே உள்ள பாட பேதங்களை இப்பதிப்புகளில் பதிவு செய்துள்ளார் என்பதும், இன்னும் கண்டுபிடிக்க முடியாமல் போன பல இதழ்களின் தேதிப் பட்டியல்களையும், பாரதியார் எழுதியதாக வேறு இடங்களில் குறிப்புகள் உள்ள பல படைப்புகள் கிடைக்கவில்லை என்ற தகவல்கள் குறித்தும் வருங்கால ஆய்வாளர்களுக்கு குறிப்புதவிகள் தந்திருக்கிறார் என்பதும் அவருடைய பின்னுரையிலிருந்து தெரிந்து கொள்ள முடிகிறது.

வரலாற்றை ஆய்வு செய்வதற்கோ, வரலாற்று நிகழ்ச்சிகளை, தனிமனிதர்களை ஆய்வு செய்வதற்கோ, அவை அல்லது அவர்கள் குறித்த வரலாற்றுப் பாத்திரத்தின் சாதக பாதகங்களை நிர்ணயிப்பதற்கோ முதலில் பக்கச் சாய்வற்ற தேதி வாரியான தகவல் சேகரிப்பு ஆய்வுகள் மிக முக்கியமானவை. வரலாற்றை படிப்பதற்கான அடிப்படைகளை நிறுவும் இத்தகைய ஆய்வு முயற்சி மிக கடினமானதும், அதிக உழைப்பைக் கோருவதும், மிகுந்த சோர்வு ஏற்படுத்தக் கூடியதுமான பணியாகும். பாரதி படைப்புகள் பனிரெண்டாம் தொகுதியின் பின்னுரையை படிப்பவர்கள் நன்கு உணரமுடியும். ஆனால் ஒரு சமூகம் தன்னை அடையாளம் கண்டு கொள்வதற்கும், தன் காலத்தின் போக்கை உணர்ந்து கொள்வதற்கும், வருங்காலத்திற்கான திட்டங்களை வரைந்து கொள்வதற்கும் இத்தகைய ஆய்வுகள் மிகுந்த முக்கியத்துவம் வாய்ந்தவை.

குறிப்பாக பாரதி, பாரதிதாசன் போன்றவர்களின் படைப்பாற்றலின் அடிப்படைகளையும் வளர்ச்சியையும் புரிந்து கொள்வதற்கும் புதிய தலைமுறை அவற்றை செரித்து உள்வாங்கி மேலெழுந்து வருவதற்கும் இத்தகைய ஆய்வு அடிப்படையிலான வெளியீடுகள் மிகுந்த அவசியப்படுகின்றன. இடையில் தொடர்ச்சியற்றுப் போன ஒரு பாரம்பரியமிக்க சமூகம், தன் வரலாற்றுத் தொடர்ச்சியை கண்டுகொள்வதென்பது தன் அடுத்தகட்டங்களுக்கு செயலூக்கத்துடனும் படைப்பாற்றலுடனும் இயங்கும் புதிய தலைமுறையை உருவாக்குவதற்கு இது ஒரு வரலாற்று முக்கியத்துவம் வாய்ந்த பணியாகும்.

இவை வளர்ச்சியடைந்த நாடுகளில் அரசாங்கத்தாலும் பெரிய கல்வி நிறுவனங்களாலும் சிறப்பாகச் செய்யப்படுகின்றன. அவை எத்தகைய குறுகிய அரசியல் நலன்கள் கருதியோ, பொருளாதார நலன்கள் கருதியோ அல்லாமல் விஞ்ஞானப்பூர்வ வழிமுறைகள் வகுத்துக் கொண்டு  திட்டமிட்டுச் செயல்படுகின்றன.

ஆனால் இந்தியாவில் குறிப்பாக தமிழகத்தில் வெறும் வாய்ச்சவடால்களைத் தாண்டி இத்தகைய அறிவுப்பூர்வமான வேலைகளைச் செய்ய அரசாங்கங்களோ கல்வி நிலையங்களோ தயாரில்லை. இவர்களைப் போல சில தனி மனிதர்களால் அவர்களின் சாத்தியப்பாடுகளுக்கு உட்பட்டே இத்தகைய மிகப்பெரும் ஆய்வு வேலைகள் செய்யப்படுகின்றன. உவேசா துவங்கி சீனி விசுவநாதன் வரை இத்தகைய தனிநபர்களை நம்பித்தான் ஒரு சிறப்பு வாய்ந்த இனத்தின் வரலாறு வெளிக்கொணரப்படுகிறது என்பது வேதனைக்குரியதாக உள்ளது.

காலவரிசைப்படுத்தப்பட்ட பாரதிதாசனின் படைப்புகளுக்காகவும் இன்னும் பிற தமிழகத்தின் முக்கிய ஆளுமைகளின் காலவரிசைபடுத்தப்பட்ட முழுமையான படைப்புகளை ஆய்வு செய்து வெளிக்கொணர்வதற்காக பிறக்கப்போகும் தேவதூதர்களை எதிர்பார்த்து வானத்து நட்சத்திரங்களில் அதிசயம் நடைபெறுகிறதா என அண்ணாந்து வாய்பிளந்து பார்த்திருப்பதைத் தவிர தமிழ்ச் சமூகத்திற்கு வேறொன்றும் வழியில்லை போலும்.

Posted in கட்டு​ரை, விமர்சனம் | Leave a Comment »