எனது நாட்குறிப்புகள்

Archive for the ‘Uncategorized’ Category

முத்தமிழ்ச் சங்கம் உண்மையா பொய்யா?

Posted by ம​கேஷ் மேல் ஏப்ரல் 28, 2019

கோ. கேசவனின் மண்ணும் மனித உறவுகளும் நூலில் ஒரு கட்டுரை. “மாயையும் உண்மையும்”. இக்கட்டுரையில்தான் மேற்கண்ட தலைப்பில் ஒரு ஆய்வை மேற்கொள்கிறார்.

இவ்வாய்வில் அவர் முன் வைக்கும் தரவுகள்

1. சங்க இலக்கியத்திலிருந்து அகச்சான்றுகள் ஒன்றிரண்டும்
2. பக்தி இலக்கியத்திலிருந்து புறச்சான்றுகள் ஒன்றிரண்டும்
3. சின்னமனூர் செப்பேடு

தன் நிலையாக கூறுவது, முச்சங்கங்கங்கள் என எதுவும் இருந்ததில்லை.

பத்து அல்லது பதினொன்றாம் நூற்றாண்டை சேர்ந்ததாக காலவரையறை செய்யும் இறையனார் களவியல் உரைதான் பெரியளவில் விரிவாக முதல், இடை, கடைச் சங்கங்கள் குறித்தும் அவற்றின் காலம், மன்னர்கள், புலவர்கள் குறித்தும் விரிவாக பேசுகிறது என்ற சிறு குறிப்பை மட்டுமே தருகிறார். அந்நூல் குறித்தும், அதில் பேசப்படுள்ள பொருள் குறித்தும் அக்கட்டுரையில் வேறு எந்த விளக்கமோ விவாதமோ இல்லை.

மறுக்கக் காரணங்கள்:

1. அகச்சான்றுகளில் சங்கம் குறித்த நேரடியான எந்தப் பதிவுகளும் இல்லை.
2. சமயக்குரவர்கள் மூவர் இலக்கியங்களிலும் கூட விரிவான எந்தத் தகவலும் இல்லை. சிறு குறிப்புகள்தான் உள்ளன.
3. காலரீதியாக பெரும் குழப்பத்திற்குரிய, 10ம் நூற்றாண்டிற்கு பிந்தைய இறையனார் களவியல் உரையில்தான் விரிவாக பேசப்படுகிறது.
4. சங்கம் இருந்ததாகக் கூறப்படும் காலங்கள் அப்படி இருந்திருப்பதற்கான சமூக பொருளாதார பண்பாட்டு சூழல் இல்லாத காலகட்டம்.
5. வேளாளர்கள் மற்றும் சைவ சமய ஆதிக்கத்திற்காக இட்டுக்கட்டப்பட்ட வடிகட்டிய பொய்யே சங்கம்.

ஆய்வு முறை குறித்து

1. இது மிக சுருக்கமான கட்டுரை. இத்தனை பெரிய ஆய்வுக்கான இடம் அதில் இல்லை.
2. சமணம் = வர்த்தக வர்க்கம், சைவம் = வணிக வர்க்கம் என்ற எளிய சூத்திரங்களின் வழி ஆய்வு கட்டமைக்கப்படுகிறது.
3. சமணத்தை அழித்தொழிப்பதே சைவத்தின் மிகப்பெரும் கடமையாக இருந்த்தாக வலியுறுத்துகிறார். அதில் சந்தேகம் கொள்ளும் ஆய்வாளர்களை கடுமையாக விமர்சிக்கிறார்.
4. சமணக் கோயில்களும், சமணமும் தமிழகத்தில் எஞ்சியிருந்த அளவிற்கு கூட பௌத்தம் எஞ்சியிருக்கவில்லை என்பது கவனப்படவில்லை.
5. சமஸ்கிருத்த்தையும் பிராகிருத்த்தையும் தான் சமணம் உயர்த்தி பிடித்தது. மக்கள் மொழியை தமிழை புறக்கணித்தது. மாறாக சைவம் தமிழை வெகுவாக உயர்த்திப் பிடித்தது என்கிறார். இது சமணம் வளர்த்த தமிழ் என்பதற்கு முற்றிலும் புறம்பான புதிய சைவ கருத்தியலாக, அவருடைய ஆய்வு முறையியலுக்கே முரணானதாகத் தோன்றுகிறது.
6. மதம், கருத்தியல் என்பவை குறித்த பார்வைகள் மிகவும் கொச்சையாகத் தோன்றுகின்றன.

ஆய்வுச் சிக்கல்கள்

1. பாண்டிய ஆட்சியே தமிழ்ச்சங்கங்கள் கண்ட ஆட்சியாக குறிப்பிடப்படுகிறது. பாண்டிய ஆட்சிகள் குறித்தும் சமணம் அரச மதமாக இருந்த காலங்களில் எழுந்த இலக்கியங்கள், இலக்கணங்கள், தொகுப்புகள், பகுப்புகள், குறித்தெல்லாம் விரிவாக ஆய்வு செய்ய வேண்டியுள்ளது.
2. சைவம் சமணத்தை ஏற்றுக் கொள்ளாவிட்டாலும் பாண்டிய ஆட்சிகளை ஏற்றுக் கொண்டுதான் ஆக வேண்டும். தமழ்ச்சங்கம் என்கிற போது அது சமணத்தோடு தொடர்புடையதாகவே இருந்திருந்தாலும் பாண்டியர்களுக்கும் அதில் முக்கியமான பங்கிருந்திருக்கிறது. ஆகவே சைவர்கள் தங்கள் மன்னர்களின் பெருமைக்குரியது என்கிற அடிப்படையில் தமழ்ச்சங்கங்களை தங்கள் பாரம்பரியத்திற்கு உரிய பெருமை கொண்டதாக எடுத்துக் கொண்டிருக்கலாம்.
3. இறையனார் களவியல் உரையின் காலவரையறைப்படுத்தலுக்கு கொடுத்த முக்கித்துவத்தை இவ்வாய்வில் அதன் உள்ளடக்கத்தை குறித்த விரிவான ஆய்விற்கும் கொடுத்திருக்க வேண்டும்.
4. மயிலை சீனி வேங்கடசாமி தமிழ்ச்சங்கம் குறித்து சிறப்பாக செய்துள்ள ஆய்வுகளுக்கும், அதில் எழுப்பும் பல்வேறு ஆதாரங்களுக்கும், ஊகங்களுக்கும், சாத்தியப்பாடுகளுக்கும் பதில் கூறி இருந்திருக்க வேண்டும்.
5. கிமுவிலேயே பௌத்த சமண சங்கங்கள் தென் இந்தியாவில், இலங்கையில் முக்கியத்துவம் கொடுத்து உருவாக்கப்பட்டிருக்கின்றன. இதற்காக வடக்கிலிருந்த மன்னர்கள் பெரும் செலவு செய்திருக்கின்றனர். துறவிகள் பலர் இதற்காகவே வெகுதூரம் அனுப்பி வைக்கப்பட்டிருக்கின்றனர்.
6. மொழி, இலக்கிய, இலக்கண வளர்ச்சி அரசு, நிர்வாகம், வாணிபம், மதம், மருத்துவம், போர்க்கலை போன்ற பலதுறைகளுக்கும் இன்றியமையாத விசயம். இவை குறித்து துவக்க நிலை அரசுகள் கூட கண்டிப்பாக கவனம் எடுத்திருக்கும். தமிழ் சமூகங்கள் ஒப்பீட்டளவில் இந்தியத் துணைக்கண்டத்தில் மிகவும் வளர்ச்சியடைந்த சமூகங்களாக இருந்திருப்பதற்கான வலுவான தொல்லியல் ஆதாரங்கள் கிடைக்கின்றன.
7. தமிழுக்கு செம்மையான இலக்கணம் உருவாக்கப்பட்டிருக்கிறது. இவையெல்லாம் திட்டமிட்ட தொடர்ச்சியான கவனம் கொடுத்து செய்யப்பட்ட வேலைகளின் காரணமாக இருக்கலாம் என்பதை மறுப்பதற்கில்லை.
8. கடந்த காலங்கள், அதன் இலக்கியங்கள், அதன் வரலாறு குறித்த பாதுகாப்பு தொடர்ச்சி தமிழகத்தில் 18 , 19ம் நூற்றாண்டு வரைகூட செம்மையாக பராமரிக்கப் பட்டிருக்கிறது. ஆக 10ம் நூற்றாண்டு இலக்கிய தரவுகளை அரசியல் என அப்படியே ஒதுக்கி விட முடியாது. மேலும் கருத்தியல் எதிரியாகவே இருந்தாலும் அவர்களுடைய எழுத்துக்களையும் போற்றி பாதுகாக்கும் ஒரு மரபு தமிழில் இருந்திருக்கிறது. உவேசா வாழ்க்கை வரலாற்றில் இதற்கான நல்ல உதாரணம் உள்ளது. திருவாவடுதுறை மடத்தில் குண்டலகேசியை பத்தொன்பதாம் நூற்றாண்டில் உவேசா ஒரு முறை பார்த்திருக்கிறார்.

சட்டென்று முடிவுக்கு வந்துவிடாமல் இன்னமும் விரிவாக ஆய்வு செய்ய வேண்டிய விசயம் இது வென்று தோன்றுகிறது.

Posted in Uncategorized | Leave a Comment »

புரட்சி நமது விருப்பமல்ல

Posted by ம​கேஷ் மேல் ஜனவரி 30, 2019

நீ மட்டுமல்ல
தன் பெண்டு
தன் பிள்ளை
தன் வீடு
என்றிருக்கும் கடுகுள்ளம் படைத்தோர்.
நாம் எல்லோரும்
உன்னுடன் பிறந்த பட்டாளமே.

புரட்சிக்கு
எந்த பாயின்ட் டூ பாயின்ட் பேருந்துகளுமில்லை
எந்த சொகுசு பேருந்துகளுமில்லை
எந்த ஸ்லீப்பர் கோச்சுகளும் இல்லை

புரட்சிக்கு
ஆட்டோ, கால்டாக்சி என்ன
வாடகை சைக்கிள் கூட கிடைக்காதுதான்.

ஆனாலும்
சுகர் வந்தவனும்,
கொல்ஸ்ட்ரால் ஏறியவனும்
விருப்பமின்றியே
வேர்க்க விறுக்க
சாலைகள் தோறும் ஓடிக் கொண்டிருக்கிறார்கள்.

காலை எடுப்பதற்கும், டையாலிசிசிற்கும்
ஹார்ட் அட்டாக்கிற்கும் பயந்து
மனிதர்கள் இன்று
பேலியோலித்திக் காலத்திற்கும்
ஓடிப் போய்விட
தயாராகிக் கொண்டிருக்கிறார்கள்

கனவான நகரங்களையும்
லட்சியங்களான மென்பொருள்
வேலைகளையும் விட்டுவிட்டு
இளைஞர்கள் கலப்பைகளோடு
கிராமங்களை நோக்கி ஓடத் தயாராகிறார்கள்.

புரட்சி நமது விருப்பத் தேர்வாய்
இருக்குமேயானால்
நீ மட்டுமல்ல
நாம் ஒவ்வாருவரும்
அதை காலவரையின்றி
ஒத்திப் போடவே விரும்புகிறோம்.

என்ன செய்ய
புரட்சி காலத்தின் தேவையாகும் பொழுது
நாம் அதன் கருவிகளாகிறோம்.

தன் பெண்டு
தன் பிள்ளை
தன் வீடு
என்றிருக்கும்
நமது கடுகு உள்ளங்களும்
தனக்குள்
கடலை புகுத்திக் கொள்ள
காலம் உந்தித் தள்ளுகிறது.

வா
அறிவை விரிவுசெய், அகண்டமாக்கு
விசாலப் பார்வையால் விழுங்கு மக்களை
மானிடச் சமுத்திரம் நானென்று கூவு

(27 ஜனவரி 2017 அன்று தமிழ் இந்துவில் வந்த கீழ்க்கண்ட கவிதையின் துாண்டுதலில் எழுதியது)

Posted in Uncategorized | Leave a Comment »

கருத்துரிமையும் சமூக பொருளியல் பின்புலங்களும்

Posted by ம​கேஷ் மேல் ஜனவரி 30, 2019

“கருத்து வேறுபாடுகள்: சமூகத்திற்கு நன்மையா, தீமையா?” என்ற தலைப்பில் செப்டம்பர் 6 2018 அன்று தமிழ் இந்துவில் பிரபல மெய்யியலாளர் சுந்தர் சருக்கையின் கட்டுரையின் தமிழ் மொழிபெயர்ப்பு இடம் பெற்றிருந்த்து. அது குறித்து அன்று எழுதி வைத்துக் கொண்ட குறிப்பு.

நல்ல கட்டுரை. ஆனாலும் கருத்தரிமை பிரச்னைகளின் ஆணிவேர்களை இத்தகைய கட்டுரைகள் ஆராய்கிறதா என்கிற வலுவான சந்தேகம் இருக்கவே செய்கிறது.

ஜனநாயக சமூகங்கள் குறித்த முதலாளித்துவ பார்வைகளுக்கும், மார்க்சிய பார்வைக்கும் இடையிலான இடைவெளிகள் இங்குதான் துல்லியம் பெறுகின்றன.

கருத்து சுதந்திரத்திற்கான நெருக்கடிகளை கருத்தியல், மற்றும் சிந்தனை தளங்களில் மட்டுமே முதலாளித்துவ கருத்தியலாளர்கள் அணுகுகிறார்கள். ஜனநாயக செயல்பாடுகள், அமைப்பு முறைகளை முற்றிலும் சுதந்திரமானவையாக, சுயமானவையாக கருதி, காரண காரியங்களை அதற்குள்ளேயே தேடுகிறார்கள்.

இவை சமூகத்தை மட்டுமல்ல நம் சிந்தனையையும் அந்த மாயச் சுழலை விட்டு வெளிவர முடியாமல் காப்பாற்றுகின்றன.

ஜனநாயக மற்றும் கருத்துச் சுதந்திரம் ஆகியவற்றின் நெருக்கடிகளுக்கான பொருளியல் பின்புலங்களை பேசுவதும், அவற்றுக்கான மாற்றுகளை முன்மொழிவதும், உரையாடல்களை துவங்குவதுமே, காரியப்பூர்வமான முன்னகர்வுகளாகும்

Posted in Uncategorized | Leave a Comment »

சங்ககாலமும் சாதியும்

Posted by ம​கேஷ் மேல் ஜனவரி 29, 2019

” ஆனால் இது உண்மையா? தரவுகளின் அடிப்படையில் எழுதப்பட்ட வரலாறு அவ்வாறு காட்டவில்லை. தொல்தமிழ் வரலாற்றை ஆராய்ந்த ஜார்ஜ் எல் ஹார்ட் முதலிய மேலை நாட்டு ஆய்வாளர்கள் சங்ககாலம் என்பது சாதியக் கட்டமைப்பில் அழுத்தமாக ஊன்றியிருந்தது என்பதை பதிவுசெய்திருக்கிறார்கள். இழிசினர், கடையர் ,தொழும்பர், உரிமை மாக்கள் என்ற பல்வேறு சொற்களில் அன்றிருந்த அடித்தள மக்களும், அடிமைகளும் சுட்டப்பட்டிருக்கிறார்கள். தமிழகத்தின் மையப்பண்பாடென்பதே ஒடுக்கப்பட்ட மக்களின் மீதான ஆதிக்கப்பண்பாடாக இருந்திருக்கிறதென்று சுட்டிக்காட்டியிருக்கிறார்கள். சங்ககால இலக்கியங்கள் சாதிப்பாகுபாடுகளை, இந்தியச் சாதிபாகுபாட்டுக்கு அடிப்படையாக உள்ள தொழில்வழிப்பிரிவினையை, சாதிவிலக்குகளை உருவாக்கும் தூய்மைXதூய்மையின்மை பற்றிய நம்பிக்கைகளை வெளிப்படையாகவும் விரிவாகவும் பதிவுசெய்துள்ளன.”
இந்த மேற்கோள் ஜெயமோகன் ராஜ் கௌதமனை அறிமுகம் செய்து எழுதியுள்ள நீண்ட பதிவுகளில், இரண்டாவது பகுதியின் ஒரு பத்தி.

சில நாட்களுக்கு முன்பு திகவின் அருள்மொழி அவர்கள் பேசிய ஒரு உரையை யூடியுபில் கேட்டேன். அதில் சாதி குறித்து சங்க இலக்கியங்களில் எந்த குறிப்பும் இல்லை என்கிறார். இன்றைக்கு இருக்கும் சாதி பெயர்களின் நீண்ட பட்டியலை எடுத்துக் கொண்டு சங்க இலக்கியங்களில் எங்கேனும் இப்பெயர்கள் வருகிறதா என சிலர் ஆய்வு செய்தார்களாம். ஆனால் எங்கும் இல்லை என்கிறார்

Posted in Uncategorized | Leave a Comment »