எனது நாட்குறிப்புகள்

ஆடுகளமும் ஆட்டநாயகர்களும்

Posted by ம​கேஷ் மேல் மே 17, 2019

ground

சரியாக பத்து நிமிடத்திற்கு முன்பாகவே நானும் என் மகளும் மைதானத்திற்குள் நுழைந்துவிட்டோம்.

அவள் அணியைச் சேர்ந்த நான்கு பெண்கள் மட்டுமே தங்கள் பெற்றோருடன் வந்திருந்தனர். எதிரணியில் ஒருவரையும் காணவில்லை.

அந்த ஏழரை மணிக்கே மைதானம் வெயிலில் மிரட்டிக் கொண்டிருந்தது. பெரிய மைதானம். மைதானத்தைச் சுற்றி 5 அடிக்கும் அதிகமான உயரத்தில் மதில் சுவர்.

பள்ளிக்கூட மைதானம் என்பதால், மைதானம் ஒன்றும் அத்தனை பிரமாதமாக இல்லை. ஆனால் மோசம் என்று சொல்ல முடியாது.

ஆடுகளத்தை இருவர் தயார் செய்து கொண்டிருந்தார்கள். மதில் சுவரை ஒட்டிய புங்கை மரங்களிலிருந்து காக்கைகள் மைதானத்தின் குறுக்கும் மறுக்குமாக பறந்து கொண்டிருந்தன.

ஒவ்வொருவராக அடுத்த அரை மணி நேரத்தில் அனைவரும் தங்கள் பெற்றோருடன் வந்து சேர்ந்தனர்.

எல்லா பெண்களும் தங்கள் சக வீரர்களுக்கு முகமன் கூறிக் கொண்டே வந்தார்கள். கிட்டத்தட்ட எல்லோரும் நன்கு பழக்கமானவர்கள். என் பெண்ணிற்கு அந்தக் குழுவில் இருந்த மற்ற பெண்களுக்குள் இருந்த அளவிற்கு நெருக்கம் இல்லை. நேற்று துவங்கிய இந்த விளையாட்டுப் போட்டிகளுக்கு, கடைசி நிமிடத்தில் குறை்ந்தபட்ச பதினொரு பெண்கள் இல்லாததால் அழைக்கப்பட்டிருந்தாள்.

கடைசி நிமிடத்தில் வேறுவழியின்றி அழைக்கப்பட்டவளாக இருந்தாலும், நேற்றைய போட்டியில் இரண்டு ஓவர்கள் போட்டு 1 விக்கெட்டும், ஒரு ரன் அவுட்டும், ஒரு கேட்சும் பிடித்திருந்தாள். மட்டை அடிக்க 6வது மட்டைப்பந்து வீரராக இறங்கி 15 ரன்கள் எடுத்து, கடைசி வரை ஆட்டமிழக்காமல் ஆடி விளையாட்டை வெற்றி பெற்று தந்திருந்தாள்.

எனக்கு அவள் அவர்கள் மத்தியில் ஒருவேளை விருப்பத்திற்குரியவளாக இல்லாவிட்டாலும் மறுக்க முடியாதவளாக இருந்தாள் என்று தோன்றியது.

வந்த பெண்களில் ஒருவள் என் மகளிடம் வந்து பந்து கொடு என்றாள். இவள் தன் கிட்டை திறந்து அடியாழத்திலிருந்த பந்தை எடுத்து கைகளுக்குப் போட்டாள்.

அந்தப் பெண்கள் இன்றைய போட்டியில் தாங்கள் கற்றுக் கொண்ட வித்தைகள் அனைத்தையும் எப்படி வெளிப்படுத்துவது என்ற யோசனையுடன் பயிற்சியில் ஈடுபட்டுக் கொண்டிருந்தார்கள்.

அவர்களின் பெற்றோர்கள் அனைவரும் ஒரு குழுவாக சற்றுத் தள்ளி அமர்ந்திருந்தார்கள்.

நான் தனியே ஒரு திட்டில் அமர்ந்த வண்ணம், பயிற்சியில் ஈடுபடும் பெண்களையும், தயாராகிக் கொண்டிருக்கும் ஆடுகளத்தையும், பெற்றோர்களின் நடவடிக்கைகளையும், மைதானத்தின் உயரே பறந்து கொண்டிருக்கும் காக்கைகளையும், துாரத்தில் தெரிந்த கட்டிடங்களையும் அமைதியாக பார்த்த வண்ணம் அமர்ந்திருந்தேன்.

என் மகள் பந்தை எடுத்து அவர்களிடம் கொடுத்துவிட்டு என்னருகில் வந்து அமைதியாக அமர்ந்தாள்.

“என்னம்மா, நீயும் அவர்களுடன் பயிற்சியில் ஈடுபடவில்லையா” எனக் கேட்டேன்.

“நேற்று வரமுடியாது போன பெண் இன்று வந்துவிட்டாள் அப்பா” என்றாள்.

“இன்றைய விளையாட்டில் நீ இருக்கியா என அவர்களிடம் கேட்க வேண்டியதுதானே”

“இல்லை அவர்கள் அவளுக்கு பதிலாக என நம்மிடம் சொல்லவில்லை”

பெரிய குழப்பத்தில், மனப் போராட்டத்தில் அவள் இருப்பாள் போலிருக்கிறது.

அவளுக்குள் கசப்பான உணர்வோ, அவமான உணர்வோ எதுவென்று தெரியவில்லை. என்னை ஒரு உயிரற்ற புன்னகையுடன் பார்த்தாள்.

“நீயும் என்னை மாதிரியே இருக்க, ஆனால் நீ என்னை மாதிரி இருக்கக்கூடாது என்று நினைக்கிறேன்” என்றேன்.

அவள் நான் நினைப்பதை புரிந்து கொண்டவள் போல என்னைப் பார்த்துச் சிரித்தாள்.

“ சுயமரியாதைக்கும் ஈகோ அல்லது திமிருக்கும் நுாலிழை தான் வித்தியாசம் இருக்கிறது. நமது சுயமரியாதைக்கான உறுதி, நம்மை எப்பொழுதும் திமிர் பிடித்தவராகவே பிறரால் சுட்டிக்காட்டப்படுகிறது” என்று எங்கோ மைதானத்தை இலக்கின்றி பார்த்தவாறு கூறினேன்.

அப்பொழுதும் அவளால் சிறு புன்னகையை மட்டுமே பதிலாக தரமுடிந்தது. நான் அதனை எனக்கான ஆமோதிப்பாக அர்த்தப்படுத்திக் கொள்ள முடிந்தது.

நான் தொடர்ந்தேன்.

“நான் இரண்டு விதமான மனிதர்கள் இருக்கிறார்கள் என நினைக்கிறேன்.”

“ஒருவர் தன் சுயமரியாதையை மட்டுமே இலக்காக்கிக் கொண்டு பயணிப்பவர்கள். மற்றவர்கள் தங்கள் லட்சியத்தை மட்டுமே இலக்காக்கிக் கொண்டு பயணிப்பவர்கள்”

“நான் இப்பொழுது என் வாழ்க்கையை திரும்பிப் பார்த்தாள் முதல் வகையைச் சார்ந்தவனாக இருந்திருக்கிறேன் என்று நினைக்கிறேன். எனக்கென்று பெரிய லட்சியங்கள் இருந்திருக்கவில்லை. நான் செய்ய வேண்டும் என்று விரும்பிச் சென்ற இடங்களில் எனது சுயமரியாதைக்கு சிறு குறை ஏற்பட்டாலும், அந்தச் சூழலில் எந்த நாடக தருணங்களையும் உருவாக்காமல் இருந்த இடம் தெரியாமல் சத்தம் இல்லாமல் விலகி வெகுதுாரம் போயிருக்கிறேன்.”

“சுயமரியாதை என்பது பிறர் மத்தியில் நம்முடைய மரியாதையை காத்துக் கொள்வது மட்டுமல்ல. நமக்கு நாமே பெற்றுக் கொள்வதுமாகும். அதுதான் நமது மனஉறுதிக்கு மிக முக்கியமானது. நமக்கே நம்மீது உறுதியும் மரியாதையும் பெற்றுக் கொள்வதற்கும், நம்பிக்கையோடு வாழ்க்கையை எதிர்கொள்ளவும் அது தேவை. என்னிடமுள்ள கற்றலுக்கான ஆர்வமும், போராட்டமும் இரண்டாவதுவகையைச் சார்ந்தது. நான் என் மீது நம்பிக்கை கொள்ள, எனக்குள்ளேயே என் சுயமரியாதையை காத்துக் கொள்ள என் ஆர்வங்களையும், போராட்டத்தையும் கைவிடாதிருக்கக் கற்றுக் கொண்டேன்.”

“உனக்கு லட்சியங்கள் இருக்கு, அந்த வகை மனிதர்கள் என்னைப் போன்றவர்களாக இருக்க முடியாது. அவர்கள் அவமானங்களையும், தடைகளையும், ஒதுக்குதல்களையும் தாண்டி தன்னுடைய இடத்தை பெறுவதற்காக வைராக்கியத்துடன் போராடுவார்கள். அவர்கள் சமரசங்களுக்கும், விட்டுக்கொடுத்தல்களுக்கும், சகிப்புத்தன்மைக்கும், தங்களை பழக்கிக் கொள்வார்கள். அவர்கள் ஊசலாட்டங்களுக்கு தனக்குள் இடம் தரமாட்டார்கள். அவர்கள் தங்களை நிரூபிப்பதன் மூலமாக துவக்கத்தில் இழந்த அனைத்தையும் திரும்பப் பெறுவார்கள்”

“கலை, இலக்கியம் போன்ற துறைகளில் ஈடுபடும் பலர் முதல்வகை மனிதர்களாக இருக்கிறார்கள். அறிவியல், அரசியல், விளையாட்டு போன்ற துறைகளில் சாதிக்க விரும்புபவர்கள் முதல் வகையினராக இருக்க முடியாது.”

“அலுவலகத்திற்கு நேரமாகிவிட்டது நான் கிளம்புகிறேன். நீ விளையாட்டு முடிந்ததும் ஆட்டோ பிடித்து வீட்டிற்கு போய்விடு.” எனக் கூறிவிட்டு நான் கிளம்பினேன்.

வெளியில் இருந்து மைதானத்தைப் பார்த்தேன். அவள் மற்ற பெண்களுடன் இருந்தாள். அவர்கள் அனைவரும் ஒரு சேர ஒரு லயமாக உடற்பயிற்சியில் ஈடுபட்டுக் கொண்டிருந்தார்கள். வானத்தில் கொக்குள் இயல்பான ஒருங்கிணைப்பில், மிக அழகழகான வடிவங்களை உருவாக்கிக் கொண்டே உணவும் நீரும் தேடி நகரத்திலிருந்து வெகுதொலைவு நிலங்களுக்கு பறந்து கொண்டிருந்தன.

Posted in கட்டு​ரை | Leave a Comment »

ஆட்டிப்படைக்கும் ஆசிய பூதம்: நாகரீகங்களின் மோதலா, புதிய உலக ஒழுங்கா?

Posted by ம​கேஷ் மேல் மே 16, 2019

image-placeholder-title

அன்றைக்கு பத்தொன்பதாம் நுாற்றாண்டில் கம்யூனிச பூதம் ஐரோப்பாவை ஆட்டிப்படைத்துக் கொண்டிருப்பதாகக் குறிப்பிட்டார்கள். இன்றகை்கு இருபத்தியோராம் நுாற்றாண்டில் ஒரு ஆசிய பூதம் அகில உலகத்தையும் கனவிலும் நனவிலும் ஆட்டிப்படைத்துக் கொண்டிருக்கிறது.

மங்கோலிய வீரன் செங்கிஸ்கானின் வாளுக்கு முன்பு நிற்க முடியாமல் தோற்றோடியது உலகம். உலகையே தன் காலடியில் கொண்டு வருவேன் என்ற மாபெரும் அலெக்சான்டர் ஒரு இந்திய மன்னனிடம் தோற்றோடிய வரலாற்றை சொல்ல இன்றைக்கும் ஐரோப்பிய வரலாற்று எழுத்துக்கள் கூனிக்குறுகுகின்றன. சூரியன் மறையாத ஆட்சிப்பரப்பின் சொந்தக்காரர்கள் ஒரு இந்திய மன்னனான திப்புவிடம் இருமுறை தோற்றோடிப் போனார்கள். மூன்றாம் முறையும் சூழ்ச்சிகளால் வென்றார்கள். பெரும்பகுதியும் ஆசியாவில் உள்ள சோவியத் யூனியனிடம் உலகின் மிகக் கொடிய எதிரியான ஐரோப்பிய சர்வாதிகாரி ஹிட்லர் தோற்றுத் தற்கொலை செய்து கொண்டு இறந்தான்.

இன்றைக்கு ஐரோப்பா மற்றும் அமெரிக்காவின் எந்த மூலைமுடுக்கிற்குச் சென்றாலும் பேனா, பென்சிலிலிருந்து, ஸ்குரூடிரைவர், சுத்தியல் முதலாக மொபைல், லேப்டாப்வரை அனைத்துப் பொருட்களிலும் அந்த பூதத்தின் பெயரே பொறிக்கப்பட்டிருக்கிறது. காலையில் ஒரு ஐரோப்பியன் அல்லது அமெரிக்கன் துாங்கி முழிப்பதிலிருந்து உறங்கப் போகும்வரை பயன்படுத்தும் பெரும்பாலான பொருட்களில் அந்த பூதத்தின பெயரே பொறிக்கப்பட்டுள்ளது.

அமெரிக்கா தன் பிரதான எதிரிக்கு எதிராக இதுகாறும் ஆதரித்து வளர்த்துவிட்ட ஒவ்வொருவரும் முறையே அதனோடு மோதி அழிந்து கொண்டிருக்கிறார்கள். அந்த வரிசையில் இந்த ஆசிய பூதம் கடைசியில் களமிறங்கியிருக்கிறது. இது முந்தையவற்றைப் போல அல்ல. அதன் ஆயிரம்கால்களையும் அமெரிக்காவின் மீது ஆழப்பதிந்து நிற்கிறது. அதை வெட்டி வீழத்தவேண்டுமென்றால் அமெரிக்கா தன் கழுத்தையே அறுத்துக் கொள்ள வேண்டி வரும் போலிருக்கிறது.

சீனாவிற்கும் அமெரிக்காவிற்கும் இடையிலான கடும் மோதல்களில் ஒரு சுவையான, முக்கியமான கவனம் செலுத்த வேண்டிய ஒரு விவாதம் தற்பொழுது நடந்து கொண்டிருக்கிறது. அது ‘நாகரீகங்களுக்கு இடையிலான மோதல்’ தொடர்பான விவாதம்.

kiron_skinner

அமெரிக்க கொள்கை வடிவமைப்பு துறை இயக்குநரான கிரோன் ஸ்கின்னர் என்பவர், “தற்பொழுது நடந்து கொண்டிருப்பது இரண்டு முரண்பட்ட வெவ்வேறு நாகரீகங்கள் சித்தாந்தங்களுக்கு இடையிலான போராட்டம். அமெரிக்கா தன் வரலாற்றிலேயே முதன்முதலாக காகேசியர்கள் அல்லாத பலங்கொண்ட எதிரியை எதிர்கொள்கிறது” என்கிறார்.

இதனை மறுத்து பேசும் சீன அதிபர் ஜீஜின்பிங்கின் சிந்தனைகள் நவீன தத்துவ கலாச்சார உரையாடல்களின் பின்னணி கொண்டவையாக இருக்கிறது. இவை இரண்டாம் உலகப்போருக்கு பிந்தைய நவீன சிந்தனாமுறையை உலக விவகாரங்களின் மிகமிக உயர்ந்த விவாதத்தளங்களுக்கு இட்டுச் சென்று இருக்கிறது.

அவர் ‘நாகரீகங்களின் மோதல்’ எனும் கோட்பாட்டை கட்டுடைக்கிறார். நாகரீகங்கள் அக்கம்பக்கமாக இருப்பதும், அங்கீகரித்து உரையாடுவதும் குறித்துப் பேசுகிறார். யார் ஒருவரேனும் தன்னுடைய நாகரீகம் தான் உயர்ந்த்து மற்றவை தன்னுடையதன் அடிப்படையில் மாற்றி அமைக்கப்பட வேண்டும் என்று கூறினால் அது முட்டாள்தனமானது, பெரும் சீரழிவை ஏற்படுத்தக் கூடியது என்கிறார். நாம் பெருமை பீற்றல்களை விட்டுவிட்டு, சமத்துவம் பரஸ்பர மரியாதையை கடைபிடிக்க வேண்டும். மாறுபட்ட நாகரீகங்களுக்கு இடையிலான வேறுபாடுகளை புரிந்து கொள்ள நமது அறிவை ஆழமாக பயன்படுத்த வேண்டும் என்கிறார். நாம் நம் நாடுகளை தீவுகளாக்க விரும்பினால், தனிமைப்படுத்திக் கொள்ள விரும்பினால், நமக்கிடையில் பரிமாற்றங்கள் இல்லையென்றால் மனித நாகரீகமே அழிந்துவிடும் என்கிறார்.

அமெரிக்கா தலைமையிலான இன்றைய உலக ஒழுங்கு மனித குலத்தை பெரும் நெருக்கடியில் நிறுத்தி வைத்துள்ளது. இத்தகைய சூழலில் சீனா முன்வைக்கும் உலகு ஒழுங்கு எத்தகையது என்பது நமது ஆழமான விவாதத்திற்கு உரியது.

xi-jinping-congresopcch

Posted in கட்டு​ரை | Leave a Comment »

முத்தமிழ்ச் சங்கம் உண்மையா பொய்யா?

Posted by ம​கேஷ் மேல் ஏப்ரல் 28, 2019

கோ. கேசவனின் மண்ணும் மனித உறவுகளும் நூலில் ஒரு கட்டுரை. “மாயையும் உண்மையும்”. இக்கட்டுரையில்தான் மேற்கண்ட தலைப்பில் ஒரு ஆய்வை மேற்கொள்கிறார்.

இவ்வாய்வில் அவர் முன் வைக்கும் தரவுகள்

1. சங்க இலக்கியத்திலிருந்து அகச்சான்றுகள் ஒன்றிரண்டும்
2. பக்தி இலக்கியத்திலிருந்து புறச்சான்றுகள் ஒன்றிரண்டும்
3. சின்னமனூர் செப்பேடு

தன் நிலையாக கூறுவது, முச்சங்கங்கங்கள் என எதுவும் இருந்ததில்லை.

பத்து அல்லது பதினொன்றாம் நூற்றாண்டை சேர்ந்ததாக காலவரையறை செய்யும் இறையனார் களவியல் உரைதான் பெரியளவில் விரிவாக முதல், இடை, கடைச் சங்கங்கள் குறித்தும் அவற்றின் காலம், மன்னர்கள், புலவர்கள் குறித்தும் விரிவாக பேசுகிறது என்ற சிறு குறிப்பை மட்டுமே தருகிறார். அந்நூல் குறித்தும், அதில் பேசப்படுள்ள பொருள் குறித்தும் அக்கட்டுரையில் வேறு எந்த விளக்கமோ விவாதமோ இல்லை.

மறுக்கக் காரணங்கள்:

1. அகச்சான்றுகளில் சங்கம் குறித்த நேரடியான எந்தப் பதிவுகளும் இல்லை.
2. சமயக்குரவர்கள் மூவர் இலக்கியங்களிலும் கூட விரிவான எந்தத் தகவலும் இல்லை. சிறு குறிப்புகள்தான் உள்ளன.
3. காலரீதியாக பெரும் குழப்பத்திற்குரிய, 10ம் நூற்றாண்டிற்கு பிந்தைய இறையனார் களவியல் உரையில்தான் விரிவாக பேசப்படுகிறது.
4. சங்கம் இருந்ததாகக் கூறப்படும் காலங்கள் அப்படி இருந்திருப்பதற்கான சமூக பொருளாதார பண்பாட்டு சூழல் இல்லாத காலகட்டம்.
5. வேளாளர்கள் மற்றும் சைவ சமய ஆதிக்கத்திற்காக இட்டுக்கட்டப்பட்ட வடிகட்டிய பொய்யே சங்கம்.

ஆய்வு முறை குறித்து

1. இது மிக சுருக்கமான கட்டுரை. இத்தனை பெரிய ஆய்வுக்கான இடம் அதில் இல்லை.
2. சமணம் = வர்த்தக வர்க்கம், சைவம் = வணிக வர்க்கம் என்ற எளிய சூத்திரங்களின் வழி ஆய்வு கட்டமைக்கப்படுகிறது.
3. சமணத்தை அழித்தொழிப்பதே சைவத்தின் மிகப்பெரும் கடமையாக இருந்த்தாக வலியுறுத்துகிறார். அதில் சந்தேகம் கொள்ளும் ஆய்வாளர்களை கடுமையாக விமர்சிக்கிறார்.
4. சமணக் கோயில்களும், சமணமும் தமிழகத்தில் எஞ்சியிருந்த அளவிற்கு கூட பௌத்தம் எஞ்சியிருக்கவில்லை என்பது கவனப்படவில்லை.
5. சமஸ்கிருத்த்தையும் பிராகிருத்த்தையும் தான் சமணம் உயர்த்தி பிடித்தது. மக்கள் மொழியை தமிழை புறக்கணித்தது. மாறாக சைவம் தமிழை வெகுவாக உயர்த்திப் பிடித்தது என்கிறார். இது சமணம் வளர்த்த தமிழ் என்பதற்கு முற்றிலும் புறம்பான புதிய சைவ கருத்தியலாக, அவருடைய ஆய்வு முறையியலுக்கே முரணானதாகத் தோன்றுகிறது.
6. மதம், கருத்தியல் என்பவை குறித்த பார்வைகள் மிகவும் கொச்சையாகத் தோன்றுகின்றன.

ஆய்வுச் சிக்கல்கள்

1. பாண்டிய ஆட்சியே தமிழ்ச்சங்கங்கள் கண்ட ஆட்சியாக குறிப்பிடப்படுகிறது. பாண்டிய ஆட்சிகள் குறித்தும் சமணம் அரச மதமாக இருந்த காலங்களில் எழுந்த இலக்கியங்கள், இலக்கணங்கள், தொகுப்புகள், பகுப்புகள், குறித்தெல்லாம் விரிவாக ஆய்வு செய்ய வேண்டியுள்ளது.
2. சைவம் சமணத்தை ஏற்றுக் கொள்ளாவிட்டாலும் பாண்டிய ஆட்சிகளை ஏற்றுக் கொண்டுதான் ஆக வேண்டும். தமழ்ச்சங்கம் என்கிற போது அது சமணத்தோடு தொடர்புடையதாகவே இருந்திருந்தாலும் பாண்டியர்களுக்கும் அதில் முக்கியமான பங்கிருந்திருக்கிறது. ஆகவே சைவர்கள் தங்கள் மன்னர்களின் பெருமைக்குரியது என்கிற அடிப்படையில் தமழ்ச்சங்கங்களை தங்கள் பாரம்பரியத்திற்கு உரிய பெருமை கொண்டதாக எடுத்துக் கொண்டிருக்கலாம்.
3. இறையனார் களவியல் உரையின் காலவரையறைப்படுத்தலுக்கு கொடுத்த முக்கித்துவத்தை இவ்வாய்வில் அதன் உள்ளடக்கத்தை குறித்த விரிவான ஆய்விற்கும் கொடுத்திருக்க வேண்டும்.
4. மயிலை சீனி வேங்கடசாமி தமிழ்ச்சங்கம் குறித்து சிறப்பாக செய்துள்ள ஆய்வுகளுக்கும், அதில் எழுப்பும் பல்வேறு ஆதாரங்களுக்கும், ஊகங்களுக்கும், சாத்தியப்பாடுகளுக்கும் பதில் கூறி இருந்திருக்க வேண்டும்.
5. கிமுவிலேயே பௌத்த சமண சங்கங்கள் தென் இந்தியாவில், இலங்கையில் முக்கியத்துவம் கொடுத்து உருவாக்கப்பட்டிருக்கின்றன. இதற்காக வடக்கிலிருந்த மன்னர்கள் பெரும் செலவு செய்திருக்கின்றனர். துறவிகள் பலர் இதற்காகவே வெகுதூரம் அனுப்பி வைக்கப்பட்டிருக்கின்றனர்.
6. மொழி, இலக்கிய, இலக்கண வளர்ச்சி அரசு, நிர்வாகம், வாணிபம், மதம், மருத்துவம், போர்க்கலை போன்ற பலதுறைகளுக்கும் இன்றியமையாத விசயம். இவை குறித்து துவக்க நிலை அரசுகள் கூட கண்டிப்பாக கவனம் எடுத்திருக்கும். தமிழ் சமூகங்கள் ஒப்பீட்டளவில் இந்தியத் துணைக்கண்டத்தில் மிகவும் வளர்ச்சியடைந்த சமூகங்களாக இருந்திருப்பதற்கான வலுவான தொல்லியல் ஆதாரங்கள் கிடைக்கின்றன.
7. தமிழுக்கு செம்மையான இலக்கணம் உருவாக்கப்பட்டிருக்கிறது. இவையெல்லாம் திட்டமிட்ட தொடர்ச்சியான கவனம் கொடுத்து செய்யப்பட்ட வேலைகளின் காரணமாக இருக்கலாம் என்பதை மறுப்பதற்கில்லை.
8. கடந்த காலங்கள், அதன் இலக்கியங்கள், அதன் வரலாறு குறித்த பாதுகாப்பு தொடர்ச்சி தமிழகத்தில் 18 , 19ம் நூற்றாண்டு வரைகூட செம்மையாக பராமரிக்கப் பட்டிருக்கிறது. ஆக 10ம் நூற்றாண்டு இலக்கிய தரவுகளை அரசியல் என அப்படியே ஒதுக்கி விட முடியாது. மேலும் கருத்தியல் எதிரியாகவே இருந்தாலும் அவர்களுடைய எழுத்துக்களையும் போற்றி பாதுகாக்கும் ஒரு மரபு தமிழில் இருந்திருக்கிறது. உவேசா வாழ்க்கை வரலாற்றில் இதற்கான நல்ல உதாரணம் உள்ளது. திருவாவடுதுறை மடத்தில் குண்டலகேசியை பத்தொன்பதாம் நூற்றாண்டில் உவேசா ஒரு முறை பார்த்திருக்கிறார்.

சட்டென்று முடிவுக்கு வந்துவிடாமல் இன்னமும் விரிவாக ஆய்வு செய்ய வேண்டிய விசயம் இது வென்று தோன்றுகிறது.

Posted in Uncategorized | Leave a Comment »

பன்டைய இந்தியாவில் அறிவியலும் தொழில்நுட்பமும் குறித்த சட்டோபாத்யாயாவின் ஆய்வுகள் ஓர் அறிமுகம்

Posted by ம​கேஷ் மேல் ஏப்ரல் 16, 2019

[14 ஏப்ரல் 2019 அன்று பிராட்வே தம்புச் செட்டித்தெருவில் உள்ள வக்கீல் தோழர். மனோகரன் அலுவலகத்தில் நடைபெற்ற ஊடாட்டம் குழுவின் “தேவி பிரசாத் சட்டோபாத்யாயா நுாற்றாண்டு கருத்தரங்கில் வாசித்த கட்டுரை]

Dbiprasad_chattopaththiyaya.

இத்தலைப்பை தேர்ந்தெடுத்தது மிகப்பெரிய ஆர்வக்கோளாறின் விளைவு என்றே நமபுகிறேன். இத்துறையிலான தேவி பிரசாத் சட்டோபாத்யாயாவின் ஆய்வுகள் அத்தனை பெரியது. அது மட்டுமல்ல இது அவருடைய கடைசி நுால்களில் ஒன்று. அவருடைய நுால்களுக்குள் ஒரு தர்க்க தொடர்ச்சியும், அறிவுத் தொடர்ச்சியும் இருப்பதாக உணர்கிறேன். ஆக அனைத்தையும் முழுமையாக வாசிக்காமல் இத்தலைப்பு குறித்து அத்தனை சிறப்பான ஓர் அறிமுகத்தை வழங்கிவிட முடியாது.

இது தொடர்பாக இந்தத் தலைப்பை தேர்ந்தபிறகு செய்த ஆக்கப்பூர்வமான வேலை ராமகிருஷ்ண பட்டாச்சார்யாவின் “Debiprasad Chattopadhyaya As Historian of Science and Technology in Ancient India: Some Distinct Traits” கட்டுரையை மொழிபெயர்த்ததுதான். அதனைத் தொடர்ந்து இணையத்தில் கிடைத்த “History of Science and Technology In Ancient India” முதல் பாகத்தை தரவிறக்கம் செய்து படிக்கத்துவங்கியது மற்றும் சமீபத்தில் NCBH வெளியிடாக வந்துள்ள தோழர் கோச்சடை மொழிபெயர்ப்பில் வந்துள்ள தேவிபிரசாத் சட்டோபாத்யாயா கட்டுரைத் தொகுப்பை வாசித்தது.

DebiprasadChattopadhyayaHistoryOfSTInAncientIndiaCh1Introduction

தேபிபிரசாத் சட்டோபாத்யாயா 19 நவம்பர் 1918 ஆண்டு கல்கத்தாவில் பிறந்தார். சுதந்திர போராட்டத்தின் தீவிர ஆதரவாளராக அவர் தந்தை இருந்தார். இந்தியத் தத்துவமும், அரசியலும் தேவிபிராசத்தின் முக்கியத் துறைகளாக விளங்கின. இந்த இரு துறைகளிலும் அவர் முற்போக்கான இயக்கங்களுடன் நெருக்கமான தொடர்பை கடைசி வரை தொடர்ந்தார். மார்க்சியத்துடனும், கம்யூனிச இயக்கத்துடனுமான தன்னுடைய பற்றுறுதியை வாழ்நாள் முழுதும் வளர்த்துக் கொண்டார். 1936ல் உருவான முற்போக்கு எழுத்தாளர் அமைப்பில் தன் வெகு இளமைக் காலத்திலேயே சேர்ந்து இடது தேசிய இயக்கத்துடன் தன்னை இணைத்துக் கொண்டார்.

தேவிபிரசாத் சட்டோபாத்யாயா ஏராளமான நுால்களை எழுதியுள்ளார், பதிப்பித்துள்ளார், பல்வேறு ஆய்வு இதழ்களுக்கு கட்டுரைகள் எழுதியுள்ளார், பல பல்கலைக்கழகங்களில், ஆய்வரங்குகளில் உரையாற்றியுள்ளார். இவை அனைத்தின் முழுமையான தொகுப்புகள் ஆங்கிலத்திலேயே வந்திருக்கிறதா தெரியவில்லை.

இணையத்தில் தேடியபொழுது அவருடைய பல ஆங்கில நுால்களும் OUT OF STOCK என்றே பெரும்பாலான பதிப்பக இணையப்பக்கங்களிலும் குறிப்பிடப்பட்டுள்ளன. இத்தலைப்புத் தொடர்பான அவருடைய மூன்று பாக நுாலான “பன்டைய இந்தியாவின் அறிவியல் மற்றும் தொழிலநுட்ப வரலாறு” கூடத் தற்பொழுது விற்பனைக்கில்லை. ஆங்கில மென்பிரதியும் முதல் பாகமான “பன்டைய இந்தியாவின் அறிவியல் மற்றும் தொழிலநுட்ப வரலாறு பாகம் 1: துவக்கங்கள்” மட்டுமே கிடைக்கிறது. இந்நுால் தமிழில் மொழிபெயர்க்கப்படவில்லை என்றே கருதுகிறேன்.

அவர் எழுதி வெளிவந்துள்ள முக்கிய நுால்களின் பட்டியல்:

1. லோகாயதா: பன்டைய இந்திய பொருள்முதல்வாதம் பற்றிய ஆய்வு (1959)
2. இந்தியத் தத்துவம்: ஒரு பிரபலமான அறிமுகம் (1964)
3. இந்திய நாத்திகம்: ஒரு மார்க்சிய ஆய்வு (1969)
4. இந்திய தத்துவத்தில் வாழ்ந்து கொண்டிருப்பவை எவை இறந்துவிட்டவை எவை (1976)
5. பன்டைய இந்தியாவில் அறிவியலும் சமூகமும் (1977)
6. இந்திய தத்துவத்தில் இரு போக்குகள் (1977)
7. தத்துவஞானி லெனின் (1979)
8. தென் இந்தியப் பண்பாட்டுக் களஞ்சியம் (1983)
9. அறிவு மற்றும் இடையீடு: சமூகம் மற்றும் உணர்வு பற்றிய ஆய்வுகள் (1985)
10. பன்டைய இந்தியாவின் அறிவியல் மற்றும் தொழிலநுட்ப வரலாறு பாகம் 1: துவக்கங்கள் (1986)
11. மதமும் சமூகமும் (1987)
12. பன்டைய இந்தியாவில் பொருள்முதல்வாதத்தை பாதுகாத்து (1989)
13. பன்டைய இந்தியாவின் அறிவியல் மற்றும் தொழிலநுட்ப வரலாறு பாகம் 2: இயற்கை அறிவியலின் தத்துவ அடித்தளங்களின் உருவாக்கம் (1991)
14. பன்டைய இந்தியாவின் அறிவியல் மற்றும் தொழிலநுட்ப வரலாறு பாகம் 3: வானவியல், அறிவியல் மற்றும் சமூகம் (1996)
15. சித்தாந்தம் குறித்த ஆழ்ந்த சிந்தனைகள் – தேபிபிரசாத் சட்டோபாத்யாயாவின் பகுப்பாய்வுக் கட்டுரைகள் தொகுப்பு (2002)
தமிழில் வந்துள்ள நுால்கள் பட்டியல்:

1. தத்துவமும் எதிர்காலமும் (பாரதி புத்தகாலயம்)
2. தத்துவத்தின் தொடக்கங்கள் (பாரதி புத்தகாலயம்)
3. இந்திய தத்துவம் ஓர் அறிமுகம் (பாரதி புத்தகாலயம்)
4. பேக்கன் முதல் மார்க்ஸ் வரை (விடியல் பதிப்பகம்)
5. இந்திய நாத்திகம் (பாரதி புத்தகாலயம்)
6. உலகாயதம்
7. இந்திய தத்துவத்தில் வாழ்ந்து கொண்டிருப்பவை எவை இறந்துவிட்டவை எவை

ராகுல சாங்கிருதித்யாயன், டி.டி. கோசாம்பி போன்ற உலகறிந்த முக்கிய இந்திய மார்க்சிய அறிஞர்களின் வரிசையில் ஒருவர் தேவிபிரசாத் சட்டோபாத்யாயா. இவருடைய “லோகாயதா: பன்டைய இந்திய பொருள்முதல்வாதம் பற்றிய ஆய்வு” சர்வதேசளவில் மிகப் பிரபலமான ஒரு நுால். இந்நுால் உலகளவிலும் இந்திய அளவிலும் மிகப் பெரிய அதிர்வுகளை ஏற்படுத்தியதாக அறிய வருகிறோம்.
“இந்தியத் தத்துவத்தின் வரலாறு என்பது கி.மு. ஆறாவது நுாற்றாண்டினைச் சேர்ந்த உபநிடதங்கள் தொடங்கி, இந்தியத் தர்க்கம் அணுக்கொள்கை ஆகியவற்றின் கடைசிப் பிரதிநிதியான கதாதரர் வரை (அவருடைய நுாலை கி.பி. பதினேழாம் நுாற்றாண்டில் எழுதினார்) தொடர்ச்சியாகும்.” எனக் குறிப்பிடும் அவர், இந்தியாவின் முதலும், மையமானதும், பிரதானமானதும் வேதமும், அது சார்ந்த தத்துவங்களுமே. இந்தியத் தத்துவம் என்றாலே ஆன்மீக வகைப்பட்டதே என்றே பெரும்பாலானவர்களால் கூறப்பட்ட வந்த சூழலில், ஆறு தரிசனங்கள் என்ற வகைப்பாட்டிலும், இந்தியாவின் ஆத்திக, நாத்திக தத்துவங்கள் என்ற வகைப்பாட்டிலும் முற்றிலுமாக விலக்கப்பட்டிருந்த பொருள்முதல்வாத தத்துவங்களான சார்வாக/லோகாயத தத்துவங்கள் எத்தனை பழமையானவை என்பதையும், அது தொடர்ந்து இந்தியாவில் பின் வந்த அனைத்து தத்துவார்த்த விவாதங்களிலும் எத்தனை தீவிர தாக்கம் செலுத்திக் கொண்டிருப்பதாக இருந்தது என்பதையும் நிரூபித்துக் காட்டியது சட்டோபாத்யாயாவின் குறிப்பிடத்தக்க சாதனையாகும்.

பன்டைய இந்தியாவின் பொருள்முதல்வாதம் குறித்து ஏன் ஆய்வு செய்ய வேண்டும் என்கிற பிரச்னையைப் பற்றிப் பேசும் பொழுது, அவர் பின்வருமாறு கூறுகிறார்

தொல்பழங்கால பொருள்முதல்வாதம் பற்றிய விவாதம் அதனைப் புகழ்வதற்காக அல்ல. அதற்கு திரும்பிச் செல்ல வேண்டும் என்ற நோக்கம் எதுவும் இல்லை. ஆன்மீகக் கண்ணோட்டம் ஆதியிலிருந்தே இருப்பதல்ல. இடையில்தான் வந்தது என்பதை புரியவைப்பதற்காகத்தான் என உலகாயதம் முன்னுரையில் குறிப்பிடுகிறார்.

சட்டோபாத்யாயாவின் ஆய்வுமுறை

சட்டோபாத்யாயாவின் ஆய்வுமுறை இந்திய தத்துவச்சூழலில் மிகுந்த விமர்சனங்களுக்கும், அவதுாறுகளுக்கும் ஒரு புறமும் உலகளவிலிருந்து உள்ளுர்வரை மிகுந்த வரவேற்ப்பிற்கும் போற்றுதல்களுக்கும் மற்றொருபுறமும் உள்ளானது.

“இந்நுால் மதச் சார்பின்மை, பகுத்தறிவு, அறிவியல் நோக்கு என்கிற அடிப்படையில் இந்திய தத்துவ இயலின் பாரம்பரியத்தை ஆராய்கின்ற நுாலாகும்.” என தன் நுாலின் முன்னுரையில் குறிப்பிடுகிறார்.

“இந்தியத் தத்துவ பரம்பரையைப் பற்றிய ஒரு மதிப்பீடு என்பது ஒரு ஆவலுள்ள புதை பொருள் ஆராய்ச்சிக்கும் மேலானதே.” என இத்துறையிலான பொருள்முதல்வாத ஆய்வுமுறை எதிர்கொள்ளும் சிக்கல்களை கோடிட்டுச் செல்கிறார்.

தன்னுடைய ஆய்வுமுறை குறித்து அவர் குறிப்பிட்டுள்ள முக்கியமான சில இடங்கள்:

“how, why, and whether science arose in ancient India. One (rather idealist) way to understand how science arose is to think that it arose because one or two people (almost always men) were born who were very intelligent and they started thinking and reasoning and new ideas came to them and they started doing science. If we believe this, we might study the history of science by concentrating on a few individuals. But this approach does not make much sense to me – and it begs the question of why those individuals arose in those places at those times – there must be some material reasons. What was there about the society that gave rise to scientists? There were actually some changes in society which facilitated the development of science, and the science must have also facilitated changes in society. In other words, interdependencies between science and society affected the development of science.”

“மனிதர்க்கு அரசியல், விஞ்ஞானம், மதம் போன்றவற்றை ஏற்று ஒழுகுவதற்கு முன் உண்ண வேண்டும், பருக வேண்டும், உறைவிடம், ஆடை தேட வேண்டும். இவை இதுவரைக்கும் கருத்தியல் வளர்ச்சியால் புதர் மறைக்கப்பட்டிருந்தது. எனவே வாழ்க்கைக்கு உடனடித் தேவையான பொருள்களை உற்பத்தி செய்தல், அதாவது ஒரு குறிப்பிட்ட காலகட்டத்தில் ஒரு குறிப்பிட்ட மக்கள் அடைந்துள்ள பொருளாதார வளர்ச்சி என்பதுதான் அடிப்படையாக உள்ளது. இதன்மீதுதான் அரசியல் நிறுவனங்கள், சட்டவியல் கருத்துக்கள், கலை, மக்களின் மதம் சார்ந்த கருத்துக்கள் ஆகிய எழுகின்றன. இந்த அடிப்படையில்தான் நாம் விஷயங்களை விளக்க வேண்டும். இதுவரை நிலவி வந்துள்ளதைப் போன்று இதற்கு மாறாக அல்ல.” என்கிற மார்க்சின் மேற்கோளைக் குறிப்பிடுகிறார்,

“இவையாவும் பொருள்முதல்வாத நிலைப்பாட்டைக் குறிக்கும். இந்த அடிப்படையிலிருந்துதான் இந்த ஆய்வு மேற்கொள்ளப்படுகிறது. தங்களை மிகத்தீவிரமாக பொருள்முதல்வாதத்திலிருந்து விலக்கிக் கொள்பவர்கள் கூட, ஏற்றுக்கொண்டபடி, பழங்காலத் தத்துவங்களை ஆராய்பவர்களுக்கு ஏதாவதொரு தத்துவ நிலைப்பாடு உண்மையில் தவிர்க்க முடியாதது ஆகும். எனவே உணர்வுப்பூர்வமாக அத்தகைய நிலைப்பாட்டை மேற்கொள்வதற்கு எந்த விளக்கமும் தேவையில்லை.”

“மேலும் இது பாரம்பரியத்திற்கு எதிரான நிலைப்பாடு என்றாலும் பொருள்முதல்வாதக் கண்ணோட்டத்தில் பழங்கால இந்தியத் தத்துவத்தை ஆராய்வதற்கு வேறு எந்த முறையான வழியும் எனக்குத் தெரியவில்லை.”

“உலகாயதம் பற்றிய மார்க்சிய ஆய்வாளன் என்ற முறையில் பண்டைக்கால இந்தியாவின் பொருளியல் சூழ்நிலைகளை நான் ஆய்வு செய்ய வேண்டியிருந்தது. உலகாயதம், அதன் விளைவு ஆகியவற்றை அறிய, மையக் கருத்திலிருந்து வெகுதுாரம் விலகிச் செல்லவும் வேண்டியிருந்தது.”

என உலகாயதம் நுாலில் குறிப்பிடுகிறார்.

தத்துவம் என்றால் என்ன?

தத்துவம் குறித்தும் தத்துவப் பிரிவுகளின் தோற்றத்திற்கான புறநிலைக் காரணிகள் குறித்தும் சட்டோபாத்யாயாவின் கருத்துக்கள் சில அவரின் நுால்களிலிருந்து:

“மனிதனது உணர்வில் கருத்துமுதல்வாதச் சிந்தனை தோன்றுவதற்கு செயலிலிருந்து சிந்தனை பிரியவேண்டும் (மூளை உழைப்பு உடல் உழைப்பிலிருந்து பிரிக்கப்பட வேண்டும்). அத்துடன் உடல் உழைப்பைச் சமூக ரீதியாகத் தாழ்வாகக் கருதவேண்டும். இதன் விளைவு, ஆன்மா அல்லது உணர்வை சுத்தமான சிந்தனை அல்லது அறிவை உயர்த்திக் காட்டுவதும், இதற்கு எதார்த்தத்திற்கு ஆணையிடும் சக்தி உள்ளது என்பதும் ஆகும்.”

“உலகம் உண்மை என்று ஒப்புக் கொள்வதால் மட்டுமே யாரும் தத்துவவாதி ஆகிவிடுவதில்லை. தத்துவவாதிகள் என்ற முறையில் கருத்துமுதல்வாதத்தை எதிர்ப்பவர்கள், பௌதீக உலகத்தின் இயல்புகள் பற்றியும், அதன் அமைப்புப் பற்றியும் தீர்மானமான கருத்துக்களை நிலை நிறுத்த வேண்டும், அதனால் கருத்துமுதல்வாதத்தை எதிர்க்கும் கோட்பாட்டைக் கொண்டவர்கள், பௌதிக உலகின் தன்மையைப் பற்றிய மிகவும் திருப்திகரமான கோட்பாடுகளை ஆக்கி வளர்த்து நிறுவும் அவசியத்தை உணர்கிறார்கள்.”

தத்துவத்திலிருந்து அறிவியலின் வரலாறு நோக்கி

ஏன் தத்துவ ஆய்விலிருந்து அறிவியல் வரலாறு நோக்கி சட்டோபாத்யாயா திரும்பினார் என்பது அவரை ஆய்வில் பின்பற்றியவர்கள் வரை பலருக்கும் ஆய்வுக்குரிய முக்கிய கேள்வியாக இருந்திருப்பதை நாம் காண முடிகிறது. அவர் தன்னுடைய உலகாயதம், வாழ்ந்துகொண்டிருப்பவை மற்றும் இறந்துவிட்டவை ஆகிய நுால்களைத் தொடர்ந்து அறிவியலும் சமூகமும் என்ற நுாலை எழுதியிருக்கிறார். அதே போல அவர் ஜோசப் நீதம் சீன குறித்து செய்த ஆய்வுகளையும், அதில் அவர் எழுப்பிய கேள்விகளையும் இந்திய சமூக ஆய்வுகளிலும் எழுப்பிக் கொண்டு அதே முறையில் பன்டைய இந்தியாவின் தத்துவ மற்றும் அறிவியல் ஆய்விற்கு விரித்துரைக்க விரும்பியிருக்கிறார்.

சட்டோபாத்யாயாவின் நுாலுக்கு எழுதிய முன்னுரையில் ஜோசப் நீதம் கீழ்க்கண்டவாறு குறிப்பிட்டுள்ளார்:

“For example, take the grand question which looms behind all the volumes of “Science and Civilisation in China”, why, in spite of so many wonderful discoveries and inventions during sixteen or seventeen centuries before the Scientific Revolution, did modem science not develop in China but only in Europe ? The answer can only be stated in social and economic terms. Only when one knows that China was characterised by bureaucratic feudalism, while Europe had military-aristocratic feudalism, seemingly stronger but in tact much weaker, and so exposed to overthrow when the time came for the rise of the bourgeoisie; then only can one begin to see why modern science, along with capitalism and the Reformation, originated in Europe and in Europe alone. How things went in India I could not attempt to say, but I would expect that apart from wars and colonialism, some concrete social and economic factors will in the end account for the fact that, in spite of wonderful past achievements, modern science did not originate there either.”

மேலும், இந்திய அறிவியல் மற்றும் தொழில்நுட்ப வரலாறு ஆய்வுக் கழகத்தின் (National Institute of Science Technology & Development Studies (NISTADS)) இயக்குநராக இருந்த பேராசிரியர் ஏ. ரஹ்மான் “Professor A. Rahman who was then the Director of NISTADS set up three teams in Calcutta, Lucknow and NISTADS to work on the project to cover the ancient, medieval & modern periods respectively … Professor Debiprasad Chattopadhyaya in Calcutta kindly agreed to guide the work covering the ancient period and set up a team for it. The present book embodies the results reached by this team for the pre-historic and proto-historic periods.” என்பவரின் திட்டப்படி பன்டைய, இடைக்கால மற்றும் பிற்கால இந்தியாவில் அறிவியலும் தொழில்நுட்பமும் குறித்த மிகப்பெரிய ஆய்வு வெளியிட்டை கொண்டு வருவதற்கான பெரிய திட்டத்தின் ஒரு பகுதியாக சட்டோபாத்யாயா தலைமையில் பன்டைய இந்தியாவில் அறிவியல் மற்றும் தொழில்நுட்ப வரலாறு குறித்த பகுதி ஒப்படைக்கப்பட்டது. இது போல சட்டோபாத்யாயாவின் பல ஆய்வுகள் ஆய்வுக்கழகங்கள், கல்வி நிறுவனங்கள் கேட்டுக் கொண்டதற்கும், நிதி அளித்து ஆதரித்தும் நடத்தப்பட்டிருக்கிறது.

பொதுவாக அறிவியல் வரலாற்றை எழுதுபவர்கள், அதனை தொழில்நுட்ப வரலாற்றிலிருந்து பிரித்து தனியாகவே ஆராய்வார்கள். தொழில்நுட்ப வரலாற்றை ஆராய்பவர்கள், அன்றைக்கு நிலவி வந்த சமூக அமைப்பு, அதில் வளர்ச்சி பெற்று இருந்த உற்பத்தி நடைமுறைகள், அது எதிர்கொண்ட சிக்கல்கள், அதன் முன்பிருந்த தேவைகள் ஆகியவற்றை கணக்கிலெடுத்துக் கொள்வதில்லை. சட்டோபாத்யாயா உற்பத்தியில் ஈடுபடும் உழைப்பாளிகளின் அனுபவத் தொகுப்புகளிலிருந்தே முதலில் தொழில் நுட்பங்கள் தோன்றுகின்றன, அவற்றிலிருந்தே அறிவியல் வளர்ச்சி ஏற்படுகிறது, என்கிற அம்சங்களில் உறுதியாக இருந்து அறிவியலையும் தொழில்நுட்பத்தையும் இணைத்தே ஆய்வு செய்தார். நடைமுறையிலிருந்தே தத்துவம் தோன்றுகிறது என்கிற கோட்பாட்டில் உறுதியாக இருந்தார்.

சிந்து சமவெளி நாகரீகமும் இந்திய தத்துவ மற்றும் அறிவியல் வரலாற்றின் தொடர்ச்சியும்

சட்டோபாத்யாயாவின் காலத்தில்தான் சிந்து சமவெளி நாகரீகம் குறித்த அகழ்வராய்ச்சிகள் பெரியளவில் நிகழ்ந்துள்ளன. மிகப்பெரிய கண்டுபிடிப்புகளும், அதனைத் தொடர்ந்த ஆராய்ச்சி நுால்களும் வெளிவருகின்றன. அவை ஒட்டுமொத்த இந்திய வரலாற்றையும் மாற்றி எழுதுவதற்கான மிகப்பெரிய முயற்சிகள் உலகம் முழுவதும் துவங்கின. இந்தியத் தத்துவ நுால்கள் அனைத்தும் இந்திய தத்துவத்தின் துவக்கத்தை வேதத்திலிருந்து துவங்கிய பொழுது இவர் அதை சிந்து சமவெளியிலிருந்து துவங்குகிறார். குறிப்பாக சல்பசூத்திரம் குறித்த அவருடைய ஆய்வுகள், வடிவ கணிதம், செங்கல் தொழில்நுட்பம் ஆகியவை பிரம்மாண்டமாக வளர்ந்திருப்பதற்கான அடிப்படைகளை நாம் சிந்து சமவெளி நாகரீகத்தின் பிரம்மாண்டமான கட்டுமானங்களிலும், திட்டமிட்ட ஒழுங்கமைக்கப்பட்ட நகர கட்டமைப்புகளான ஹரப்பா மற்றும் மொஹஞ்சதாரோவில் கண்டார்.

இந்திய அறிவியலின் மிகச்சிறந்த வெளிப்பாடுகளை அவர் மருத்துவத் துறையில் இனம் கண்டார். “நாம் பண்டைக்காலத்து மருத்துவர்களுக்கு முக்கியமாய் நன்றிக் கடன்படுகிறோம்; ஏனெனில் அவர்கள்தான் இந்திய அறிவியல் – அறிவியல் ஆய்வு முறை இரண்டிற்கும் உண்மையில் முன்னோடிகள்.” என்கிறார். சுஸ்ருத சம்ஹிதை மற்றும் சாரக சமஹிதையில் உடல் கூராய்வு மற்றும் மருத்துவமுறைகளின் அடிப்படையில் திகழ்ந்த அறிவியல் கண்ணோட்டங்களை அவர் வியந்து வெளிப்படுத்தினார். அவை தொடர்ந்து வளர்வதற்கும், வளமை அடைவதற்கும் மனுதர்மம் மற்றும் அர்த்த சாஸ்திரம் போன்ற வேத, வர்ண சாதியச் சட்டங்களும், புனிதப்படுத்தல்களும், தீண்டாமை, தீட்டு போன்ற சமூகக் கட்டுப்பாடுகளும் பெரும் தடையாக இருந்து அத்துறைகளிலான வளர்ச்சியைத் தடுத்தன என பல்வேறு வேத இலக்கியங்களிலிருந்தும், சமூகநீதி தர்மசாஸ்திரங்களிலிருந்தும் மிக நீண்ட மேற்கோள்களை காட்டி மறுக்க முடியாதவாறு நிரூபித்தார். சடலத்தையும், உழைக்கும் மக்களையும் தீண்டத்தகாதவைகளாக அறிவித்த இந்த சாஸ்திரங்களே உடல்கூராய்வுகளும், நோய் மற்றும் மருத்துவம் குறித்த ஆய்வுகளும் வளர முடியாமல் தேய்ந்தழிந்து போனதற்கான காரணங்கள் என்கிறார்.

சுஸ்ருத சம்ஹிதை மற்றும் சாரக சமஹிதையை இன்றைக்கு இந்தியத் தத்துவ மற்றும் அறிவியல் மரபின் செழிப்பான வெளிப்பாடுகள் என வேத பார்ப்பன ஆதரவு அறிஞர்கள் கூறிக்கொள்கிறார்கள். ஆனால் உண்மையில் அவை வேத பார்ப்பன இலக்கியங்கள்தானா? அவை அவர்களின் சமூக கோட்பாடுகளை, தனிமனித ஒழுக்க பின்பற்றுதல்களை பற்றித்தான் நிற்கின்றனவா? என்கிற மிகப்பெரிய கேள்விகளை எழுப்பிக் கொண்டு மேதமைமிக்க தன் ஆய்வுகளை செய்துள்ளார். பசுவை தெய்வமாக வழிபடச் சொல்லும் வேத மரபில், பசுவை அடித்தவனும், குருவை மதிக்காதவனும் கடும் துன்பத்திற்கு ஆளாவான் என்று கூறிய வேத மரபில் இந்த மருத்துவ நுால்களின் ஆசிரியர்கள் பசு மாமிசத்தை நாள்பட்ட இருமல், ரத்த சோகை, கடும் உழைப்பால் உடல் மெலிந்தவர்கள் போன்ற நோயுற்றவர்களுக்கு, பலஹீனமானவர்களுக்கு பரிந்துரைக்கின்றன. திடகாத்திரமான ஆண் குழந்தைப் பேறு வேண்டி வந்த தம்பதியருக்கு பொலிகாளையின் மாமிசத்தை உண்டு வர பரிந்துரைப்பதையும் சுட்டிக் காட்டி, வேத ஆதரவு செய்யுள்கள் இருக்கும் அதேநுால்களில் வேத மரபிற்கு எதிராக உள்ள அடிப்படைக் கருத்துக்களும் பலமாக இருப்பதை வெளிப்படுத்திக் கேள்வி கேட்கிறார்.

பிரகதாரண்யக உபநிடதம் மற்றும் சாந்தோக்கிய உபநிடதங்களில் குறிப்பிடப்படும் உத்தாலக ஆருணியையும் அவர் கருத்துக்களையும் பாரம்பரிய வேத தத்துவ அறிஞர்களின் விளக்கங்களுக்கு எதிராக முற்றிலும் புதிய வகைகளில் ஆய்வு செய்து புதிய கண்ணோட்டங்களில் அவர் பற்றிய விளக்கங்களை வெளிப்படுத்தினார். வேதம் கற்றுக் கொள்ள அனுப்பப்பட்ட அவருடைய மகனான சுவேதகேது, படித்து முடித்து வந்த பொழுது தான் அனைத்தும் கற்றுக் கொண்டுவிட்டதாக மமதையுடன் இருந்த பொழுது, அவன் அவருக்குச் சொல்லும் அறிவுரைகளும், எழுப்பும் கேள்விகளும், அறிவியல் சிந்தனைகளைக் கொண்ட பொருள்முதல்வாத தத்துவங்களை அறிமுகப்படுத்துவதாக உள்ளன.

விதையை நீ பகுத்துக் கொண்டே போனால் கடைசியில் என்னவாகும்? இனி பகுக்கமுடியாத அணுவாக அது மாறும், ஆனாலும் அது முற்றிலுமாக அழிந்துவிடுவதில்லை. அது ஏதோ ஒரு ரூபத்தில் இவ்வுலகில் இருந்து கொண்டே தான் இருக்கும். உப்பை தண்ணீரில் கரைத்தால், உப்பு தன் திட வடிவத்தை இழந்துவிடும். ஆனாலும் நீரில் அவை நீக்கமற நிறைந்திருப்பதை நாம் சுவைத்து உணரமுடியும். என பொருளின் அழியாத்தன்மை, பொருளின் ஒரு நிலையிலிருந்து மற்றொரு நிலைக்கு மாறும் தன்மை, அணு ஆகியவை பற்றி தான் பிற பொருள்முதல்வாத தத்துவவாதிகளுடன் வேதத்தைக் கற்றவன் அனைத்தையும் கற்றவன் என்ற இறுமாப்புடன் வாதிடச் சென்று, தோல்வியை பகிரங்கமாக ஒப்புக் கொண்டு, அவர்களிடம் கற்று வந்த செய்திகளைக் குறிப்பிடுகிறார். இவை இவ்வுலகை மறுக்கும் மாயாவாத தத்துவங்களுக்கு எதிரானவை, இத்தகைய தர்க்கங்களையும், ஆய்வு முறைகளையும் எந்த வேத இலக்கியங்களிலும் காண முடியாது, இவை பொருள்முதல்வாத சிந்தனைகளுக்கேயான ஒரு தர்க்க ஆய்வு முறைமைகள் என வாதிடுகிறார்.

இந்திய தத்துவ மற்றும் அறிவியல் வரலாற்றை கிடைத்த தரவுகளைக் கொண்டு சிறப்பாக ஆய்வு செய்து வெளிப்படுத்த அவர் உலக நாகரிகங்களை ஆய்வு செய்தவர்களின் அனுபவங்களையும், ஆய்வு முறைகளையும் வெகு சிறப்பாக இந்திய ஆய்வுகளுக்கு பயன்படுத்தினார். கிரேக்க தத்துவங்களை ஆய்வு செய்த மிகச் சிறந்த மார்க்சிய ஆய்வாளரான ஜார்ஜ் தாம்சன், சீன தத்துவ வரலாறை ஆய்வு செய்த ஜோசப் நீதம் போன்றவர்களை மிக ஆழமாகக் கற்று பின்பற்றினார்.

வால்டர் ரூபன் சட்டோபாத்யாயாவின் அறிவியலும் சமூகமும் நுாலுக்கான முன்னுரையில் இவ்வாறு குறிப்பிடுகிறார்:

“If there is one thing more than anything else which has characterised the work of Chattopadhyaya from the beginning, it has been his conviction of the importance of relating the history of science, technology and medicine to the social conditions which surrounded their growth. This principle will alone enable us to understand in depth the story of their slow development.”

அதாவது “அவருடைய ஆய்வுகளின் முக்கியத்துவம் என்னவென்றால், அது அறிவியல், தொழில்நுட்பம், மருத்துவம் ஆகிய துறைகளின் வரலாற்றில் அதன் வளர்ச்சிக்கு காரணமாக இருந்த சமூக எதார்த்தங்களுடன் அவற்றை தொடர்பு படுத்துவதில் அவருக்கு இருந்த உறுதிதான். இது மட்டுமே அவற்றின் மிகமெதுவான வளர்ச்சிக்கான காரணத்தை ஆழமாக புரிந்து கொள்வதற்கான அம்சமாகும்.”

மேலும் கூறுகிறார்:

“But throughout the book, for example in metallurgy and in ceramics, there is no lack of other examples of practice coming first, and then theory arising out of it afterwards.”

இவரின் புத்தகம் முழுவதிலும் குறிப்பாக உலோகவியல் மற்றும் மட்பாண்டத் தொழிலில் எப்படி நடைமுறை முதலில் வருகிறது அதனைத் தொடர்ந்து தத்துவம் வளர்ச்சி பெறுகிறது என்பதை வெளிப்படுத்துகிறது.

முடிவுரை

மேற்கு வங்காளத்தைச் சேர்ந்தவரான தேவி பிரசாத் சட்டோபாத்யாயா தன்னுடைய ஆசிரியரான எஸ்.என். தாஸ்குப்தாவின் நுாலான ‘இந்திய தத்துவ வரலாறு’ நுால் குறித்து மிக உயர்ந்த மதிப்பைக் கொண்டிருந்தார். தன்னுடைய ஆய்வு வேலைகளை சாத்தியமாக்கியதும், சுலபமாக்கியதும் அவருடைய அந்த நுால்தான் என்கிறார். சாருவாகம் லோகாயதம் ஆகியவை குறித்து எந்தெந்த உபநிடதங்கள், சூத்திரங்கள், எந்தெந்த உரையாசிரியர்களின் எழுத்துக்கள் ஆகியவற்றில் எங்கே எப்படி கூறப்பட்டுள்ளன என்பதை அவர் தன்னுடைய நுால்களில் தொகுத்து வழங்கிவிட்டார். அவற்றைத் தேடிக் கண்டடையும் வேலை எதுவும் தனக்கிருக்கவில்லை என்கிறார். தான் அவற்றிலிருந்தே தன் இந்திய பொருள்முதல்வாதம் குறித்த மார்க்சிய ஆய்வுகளை மேற்கொள்ளத் துவங்கியதாகக் குறிப்பிடுகிறார்.

இந்தியத் தத்துவம் என்ற தலைப்பைக் கொண்டிருந்தாலும் தென்னிந்தியா குறிப்பாக இந்தியத் துணைக்கண்டத்திலேயே மிகப்பழமையான மொழியாகவும், காலத்தால் மிகப் பழைய இலக்கியங்களைக் கொண்டிருக்கக் கூடிய மொழியாகவும், பொருள்முதல்வாத மற்றும் சமண பௌத்த இலக்கிய இலக்கண தத்துவ நுால்கள் அதிகமும் உள்ள தமிழிலிருந்து அவருடைய பார்வைக்கு முக்கிய நுால்கள் குறித்த அறிமுகம் செல்லவில்லை என்பது இவற்றை வாசிக்கும் பொழுது நமக்கு ஏற்படும் வருத்தமாக இருக்கிறது. அவருடைய காலத்தில் இங்கு மார்க்சிய இயக்கங்களும், அதில் தமிழக தத்துவ வரலாற்று இலக்கிய ஆராய்ச்சிகளில் ஈடுபட்ட, அவரோடு தொடர்பில் இருந்த பல மார்க்சிய அறிஞர்கள் இருந்தும், இவை குறித்து அவருக்கு எதுவும் செல்லவில்லை என்பது ஆச்சர்யத்தையும், அதிர்ச்சியையும் ஏற்படுத்தக்கூடியதாக இருக்கிறது என்கிற உணர்வை வெளிப்படுத்தாமல் தவிர்க்க முடியவில்லை.

மிகப் பெரிய குழு அவருடைய அனைத்து ஆய்வு வேலைகளிலும் துணை புரிந்திருக்கிறது. அந்த ஆய்வுக் குழுவைச் சேர்ந்தவர்கள், அவருக்குப் பின்னும் அவருடைய ஆய்வுகளை தொடர்ந்திருக்கிறார்கள். ராமகிருஷ்ண பட்டாச்சார்யா போன்றவர்கள் அவர்களில் முக்கியமானவர். அவர் தேவி பிரசாத் சட்டோபாத்யாயாவை பின்பற்றி சார்வாக லோகாயதம் குறித்து மேலதிகமான ஆய்வுகளை மேற்கொண்டிருக்கிறார்.

சட்டோபாத்யாயாவின் ஆய்வுமுறை, அதன் பிறகு வளர்ச்சியடைந்த, கண்டுபிடிக்கப்பட்ட புதிய விசயங்கள், அவரிடம் துவக்கத்திலிருந்து இறுதி எழுத்துக்கள் வரை ஏற்பட்டு வந்த மாற்றங்கள், ஆகியவை குறித்து விரிவாக ஆய்வுக் கட்டுரைகள் எழுதியுள்ளனர். தேவிபிரசாத்தின் ஆய்வுகளையும், ஆய்வு முறைகளையும் ஒருவர் நம் காலத்தில் பேச விரும்பினால், அவருடைய முழுமையான எழுத்துக்களை கால வரிசையில் படிக்காமலும், அவர் குறித்தும், அவர் ஆய்வுகளை தொடர்ந்து நடத்திய மற்றவர்களின் ஆய்வுகளையும் படிப்பதன் வழியாகவே முழுமையான ஒரு சித்திரத்தை பெற முடியும்.

Posted in கட்டு​ரை | Leave a Comment »