எனது நாட்குறிப்புகள்

லெனின் சின்னத்தம்பி நாவல் ஒரு வாசிப்பனுபவம்

Posted by ம​கேஷ் மேல் மே 21, 2017

nullகடந்த மே 1 முதல் 7ம் தேதி அலுவலக வேலையாக பெர்லின் சென்றிருந்தேன். லன்டனில் உள்ள தோழர் மூலமாக தோழர் ஜீவமுரளி அறிமுகம் கிடைத்து, ஒரு நாள் அவர் வீட்டிற்கு சென்றிருந்தேன். அவருடன் இரண்டு நாட்கள் பெர்லினின் சில இடங்களுக்கு சென்று பார்த்தேன்.

அவருடைய ‘லெனின் சின்னத்தம்பி’ நாவலையும், ‘வரலாறு யாரையும் விடுதலை செய்ததில்லை’ கட்டுரைத் தொகுப்பையும் எனக்கு அளித்தார். பல கட்டுரைகளை அங்கேயே வைத்து வாசி்த்தேன்.

நாவலை மே 8ம் தேதி ஞாயிறு விமான பயணத்தில் படிக்க துவங்கினேன். மே 19ம் தேதி வெள்ளிக்கிழமையோடு நாவலை படித்து முடித்தேன். எத்தனையோ நாவல்களை துவங்கி சில பக்கங்களிலேயோ, பாதியிலேயோ கூட நிறுத்தியிருக்கிறேன். இன்னும் கூட அந்த நாவல்களின் பக்கம் திரும்பி பார்க்கவில்லை. சில நாவல்களை மிகுந்த எதிர்பார்ப்போடு வாங்கிவிட்டு ஏமாற்றத்தோடு முழுமையாக படிக்காமல் வைத்திருக்கிறேன். இது போன்ற வெகு சில நாவல்களைத்தான் இத்தனை ஆர்வத்தோடு விடாமல் தொடர்ந்து படித்து சில நாட்களில் முடித்திருக்கிறேன்.

இந்நாவல், அந்த வகையில் படிக்க சுவாரசியமாகவும், எளிமையாகவும், விறுவிறுப்பாகவும் இருந்தது. மிகச்சில கதாபாத்திரங்கள், மூன்றே இடங்கள், அதிலும் ஒரு உணவுத் தொழிற்சாலையின் பெரிய சமையலறைதான் 99 சதவீத கதை நிகழும் இடம். இப்படிப்பட்ட மிகச்சிறு இடத்தில் இத்தனை விறுவிறுப்பாக ஒரு 255 பக்க நாவலை வாசகனின் ஆர்வம் கெடாமல் நிகழ்த்தி முடித்திருப்பது ஒரு சாதனைதான்.

கதை துவங்கி13ம் பக்கம் வரைதான் கதை கதாநாயகனின் இல்லத்தில் நிகழ்கிறது. அதன் பிறகு முழுவதும் உணவுத் தொழிற்சாலையின் சமையலறையில்தான் காய்கறி நறுக்கிக் கொண்டே, பாத்திரங்களை கழுவிக் கொண்டே, குப்பைகளையும், சாப்பிட்ட மற்றும் கழுவ வேண்டிய பாத்திரங்களை பொறுக்கிக் கொண்டேயும் தன்னுடனே நம்மையும் அழைத்துக் கொண்டு அந்த நிறுவனத்தின் அன்றாட வாழ்க்கை, பிரச்சினைகள், போரட்டங்கள், சிக்கல்கள் அனைத்தையும் காட்சிப்படுத்தி காட்டிக் கொண்டே போகிறார் ஆசிரியர். மீண்டும் வீட்டிற்கு 156ம் பக்கத்தில் வந்து 164ம் பக்கத்தில் மீண்டும் வேலைக்கு கிளம்பி விடுகிறார். இறுதியில் நாவல் முடிகிற போதுதான் அதாவது 246ம் பக்கத்தில் மீண்டும் வீடடைகிறார்.

நாவல் தனிப்பட்ட முறையில் என்னை சுவாரசியமாக இழுத்ததற்கு பல காரணங்கள் மற்றும் எதிர்பார்ப்புகள். 5 அல்லது 6 நாட்களில் உலகின் மிகப்பெரிய நகர் ஒன்றை எந்தளவிற்கு ஒருவனால் முழுமையாக பார்த்து விளங்கிக் கொண்டுவிட முடியும்? இந்தியாவில் சென்னையில் நாம் கற்பனையும் செய்து பார்த்திராத ஒரு வாழ்க்கை, கலாச்சாரம், நகரம், பிரம்மாண்டமான கட்டிடங்கள், வெகு சுத்தமான சாலைகள், மக்கள் தேவைக்கு ஏற்ப கணக்கச்சிதமான ஒழுங்கு குலையாத போக்குவரத்துகள், இவற்றிற்குள் மனிதர்களின் வாழ்க்கை எப்படி இருக்கிறது. அவர்களுடைய அன்றாட நடைமுறைகள் என்ன? அவர்களுடைய விருப்பு வெறுப்புகள், குடும்பம், விழாக்கள், பொழுது போக்குகள், பரஸ்பர உறவுகள், உரையாடல்கள், இப்படி ஒவ்வொன்றும் எப்படி இருக்கும்? அரசுக்கும் மக்களுக்குமான உறவுகள் அன்றாட வாழ்வில் அதன் பல்வேறு தளங்களில் எப்படி இருக்கும்? கிழக்கு ஜெர்மன் மேற்கு ஜெர்மன் மக்களின், வாழ்க்கையின், கலாச்சாரத்தின், மன அமைப்புகள், குணாதிசயங்கள், வித்தியாசங்கள் என்ன? பாசிச காலகட்டம் பற்றியும், ஹிட்லர் ஆட்சி அன்றைய ஜெர்மன் குறித்தும் பொதுவான அம்மக்களின் பார்வைகள் என்ன? அகதிகளாக இலங்கையிலிருந்து பெர்ளின் சென்ற மக்கள் எப்படி முற்றிலும் புதிய சூழல்களில் தங்களை தகவமைத்துக் கொண்டார்கள்? என்னென்ன சௌகரியங்களையும் அசௌகரியங்களையும் புதிய நிலத்தில் அவர்கள் அனுபவிக்கிறார்கள், என்பதாக நான் தெரிந்து கொள்ள விளைந்த விசயங்களின் எண்ணிக்கை பட்டியலிடத் துவங்கினால் பெருகிக் கொண்டே போகிறது. இவற்றையெல்லாம் இது போன்ற நாவல்களில் வழி தெரிந்து கொள்ளலாம் என்ற ஆர்வம் இதனை மிகுதியாக்கியது.

நாவலின் முதல் பக்கங்கள், நான் நேரில் சென்று பார்த்த ஆசிரியரின் வீட்டை அப்படியே படம் பிடித்துக் காட்டிக் கொண்டு சென்றது, என்னை நாவல் பலமாக உள்ளிழுக்க ஒரு காரணமாக அமைந்தது. தற்பொழுது வேலையில்லாமல் இருப்பதாகவும், வேலை தேடிக் கொண்டிருப்பதாகவும் சொன்ன ஆசிரியரின் கடந்த கால ஜெர்மன் வாழ்வை முழுமையாக இரு நாட்களில் பேசித் தெரிந்து கொள்ள சந்தர்ப்பம் அமையவில்லை. நாவல் மற்றும் அவருடைய கட்டுரைகள் வாயிலாக அவருடைய தனிப்பட்ட வாழ்வையும், அவருடைய அரசியல் மற்றும் இலக்கிய விருப்பங்களையும், கருத்துக்களையும் மிக விரிவாக தெரிந்து கொள்ள முடிந்தது.

அவ்வளவு விரிந்த பரந்த நகரையும், அதன் பலதரப்பு மக்களின் வாழ்வையும், அதன் சமூக கலாச்சார அம்சங்களையும், ஏதிலிகள் இச்சூழலை எவ்வாறு விளங்கிக் கொண்டார்கள், எப்படி இதோடு தங்களை ஐக்கியப்படுத்திக் கொள்ள போராடுகிறார்கள் அல்லது படுத்திக் கொண்டார்கள். என இன்னும் விரிவான தளங்களில் என் எதிர்பார்ப்புகள் இந்நாவலில் கிடைக்கவில்லை என்ற பொழுதிலும், ஒரு தொழிற்சாலை அதற்குள் வரும் பலதரப்பட்ட மனிதர்கள், அவர்கள் எதிர்கொள்ளும் பலதரப்பிலான பிரச்சினைகளின் வழியாக கோடிட்டு காட்டிச் செல்கிறது நாவல்.

நாவல் உலகம் முழுவதும் இருக்கக்கூடிய மக்கள் எதிர்கொள்ளும் பிரச்சினைகளின் ஒத்த தன்மைகளை மிக அழுத்தமாக கூறுவதன் மூலமாக ஒரு யுனிவர்சாலிடியை உருவாக்கிக் காட்டுவதில் வெற்றி பெறுகிறது. தொழிற்சாலைகள் இயங்கும் விதமும், முதலாளிகள், அவர்களுக்கு கீழே மேற்பார்வையாளர்கள், முதலாளிகளையும், அவர்களின் உரிமைகளையும், சலுகைகளையும், சொத்துக்களையும் பாதுகாப்பதில் அரசும், அதன் நிர்வாகமும் காட்டுகிற அக்கறையையும், தொழிலாளர் நலம் நாடும் அரசுகள் என்று சொல்லிக் கொண்டாலும் தொழிலாளர்களை ஏமாற்றுவதில், நிறுவனங்களுக்கு சாதகமாக நடந்து கொள்வதில் என இந்த யுனிவர்சாலிடி மிகத் தத்ரூபமாக கண் முன்னே காட்சிப்படுத்தப்படுகிறது.

இன்னொரு வகையிலும் இந்நாவல் இந்த யுனிவர்சாலிடியை சரியாக கடைபிடிக்கிறது. நம சமகாலத்தில் தொழிலாளர்கள், தொழிற்சாலைகள், உழைப்புச் சுரண்டல்கள், போன்றவற்றை மையம் வைத்து வரும் நாவல்களில், தொழிற்சங்கங்களோ, தொழிலாளர்கள் சங்கம் அமைப்பதோ, சங்கம் அமைத்து போராடுவதோ வருவதில்லை. இந்திய தமிழக நாவல்கள் பலவற்றின் மீது ஒரு விமர்சனமாகவும், குறையாகவும் முன்வைக்கப்படுகிறது. இந்த இலக்கணங்கள் இந்திய தமிழகத்திற்கு மட்டுமில்லை, உலகம் முழுவதற்கும் பொதுவானதுதான் என இந்நாவல் நிரூபிக்கிறது. இவற்றின் ஊடாகத்தான் நம் காலத்தை நாம் சரியாக புரிந்து கொள்ள வேண்டியிருக்கிறது.

அரசு நிர்வாகத்தை பொறுத்தவரை இந்தியா போன்ற நாடுகளுக்கும் ஜெர்மன், இங்கிலாந்து போன்ற நாடுகளுக்குமான வித்தியாசம், அங்கெல்லாம் நளினமாகவும், நாசூக்காகவும், சட்டவழி நின்றே தாங்கள் அனைத்தையும் செய்வதான பாவனை மாறாமலும் செய்கிறார்கள். உலகைக் கொள்ளையடிக்கிற மிக பிரம்மாண்டமான செல்வத்தின் மிகச் சிறு பகுதியில் தங்கள் நகரையும், அடிப்படை கல்வி, சுகாதார வசதிகளையும் பராமரிக்கிறார்கள். இதைக்கானும் மூன்றாம் உலகத்தவன் முதல்பார்வையில் சொக்கி தன்னுடைய அடிப்படை புரிதல்களில் சறுக்கியும், குழம்பியும் விடுகிறான்.

என்னை ஆச்சர்யப்படுத்திய நாவலின் சில அம்சங்கள்: மற்றவர்கள் அனைவரையும் அவன் என்றே விளிக்கும் ஆசிரியர் மறந்தும் லெனின் சின்னத்தம்பியை ஒரு இடத்திலும் அவ்வாறு விளிக்கவில்லை. நிறைய ஜெர்மனின் புழக்க, பொருட்கள், மற்றும் உணவுகளின் பெயர்களும் சொற்களும் எம்போன்றவர்களுக்காக எந்த விளக்கமும் கொடுக்காமல் அப்படியே பயன்படுத்தப்படுகிறது. (இதை நாவல் குறித்த அறிமுகத்திலேயே என்னிடம் ஜீவமுரளி குறிப்பிட்டிருந்தார்). அதே போல அத்தியாயங்கள் பிரிக்காமல் 255 பக்கத்தில் ஒரு நாவல் ஒரே அத்தியாயமாக எழுதி முடிக்கப்பட்டுள்ளது. நிறைய எழுத்துப் பிழைகள் உள்ளன. சில இடங்களில் இது எழுத்துப்பிழையா அல்லது இலங்கையைச் சேர்ந்த தமிழ் சொல் அல்லது எழுத்து வழக்கா என்ற குழப்பத்தையும் என் போன்ற தமிழகத்தைச் சேர்ந்தவர்களுக்கு ஏற்படுத்துகிறது,

ஒரு நல்ல நாவல் அடிப்படையில் கடைசி வரை வாசிக்க துாண்ட வேண்டும். இரண்டாவது, உலகம் முழுவதும் உள்ள மக்களோடு வாசகன் தன்னை அடையாளப்படுத்திக் கொள்ளத் துாண்ட வேண்டும். இவ்வுலகம் குறித்த மாயைகளை உடைத்து நிதர்சனங்களை உணர்த்த வேண்டும். ஒரு இலக்கிய அனுபவமாக வாசகனின் மனத்தில் நின்று உரையாட வேண்டும். இத்தகைய அனைத்துத் தளங்களிலும் இந்நாவல் எனக்கு நல்லதொரு அனுபவமாகியது.

தன்னுடைய முந்தைய 24 வருட இலங்கை, இந்திய வாழ்வையும், ஐரோப்பாவில் வேலை சூழலுக்கு அப்பாலான அனுபவங்களையும் இணைத்திருந்தால், நாவல் இன்னும் கனமானதாக இன்னும் முழுமையானதாக ஆகியிருக்குமோ என்ற ஒரு ஆவல் தோன்றியது.

முதலாளித்துவம், முதலாளி, தொழிலாளி, தொழிற்சாலை, அரசு என்ற இந்த வட்டம் மிக முக்கியமானது இதுதான் நம் வாழ்வின் பிற எல்லா தொடர்புகளுக்கும், உறவுகளுக்கும் அடிப்படையானது. பெரும்பாலான நாவல்கள், இலக்கியங்கள் இந்த அடிப்படையான வட்டத்தில் மனிதர்களின் வாழ்வை மிகக் குறைவாகவே பேசுகிறது. மாறாக இந்நாவல் அந்த வாழ்வையே பிரதானமாகவும், முற்று முழுதாகவும் பேசுகிறது.

Posted in அனுபவங்கள், கட்டு​ரை | Leave a Comment »

அரசியல்சாரா அறிவுஜீவிகள்: ஓட்டோ ரெனே காஸ்டில்லோவின் ஒரு கவிதை

Posted by ம​கேஷ் மேல் ஒக்ரோபர் 26, 2016

ஒரு நாள்
என் நாட்டின்
அரசியல்சாரா அறிவுஜீவிகள்
எளிய எம் மக்களால்
விசாரனை செய்யப்படுவார்கள்.

அவர்கள்
தங்கள் தேசம்
மெல்ல மெல்ல
இறந்து கொண்டிருந்த பொழுது
என்ன செய்து கொண்டிருந்தார்கள் என
கேள்வி கேட்கப்படுவார்கள்.

யாரும்
அவர்களுடைய உடைகளைப் பற்றியோ
கனமான மதிய உணவிற்குப் பிறகான
நீண்ட துாக்கத்தைப் பற்றியோ
கேட்கப் போவதில்லை,
யாரும்
அவர்களுடைய “சூன்யத்தைப் பற்றிய கருத்துக்கள்”
குறித்த மலட்டு விவாதங்கள் பற்றி தெரிந்து கொள்ள விரும்பப் போவதில்லை,
யாரும்
அவர்களுடைய உயர் பொருளாதார வாசிப்பு குறித்து
கவலைப்படப் போவதில்லை.

அவர்கள் இவர்களிடம்
கிரேக்கப் புராணங்கள் குறித்தோ
அல்லது அவர்களிடையே
இறந்து போன கோழைகளின் மரணம் குறித்த
சுய பச்சாதாபங்களை குறித்தோ
கேள்வி கேட்கப் போவதில்லை.

அவர்கள்
இவர்களின் மொத்த பொய்யின் நிழலில் பிறந்த
வறட்டு நியாயங்கள் எதைப்பற்றியும் கேட்கப் போவதில்லை.

அந்த நாள்
எளிய மனிதர்கள் வருவார்கள்.

அவர்கள்
இந்த அரசியல்சாரா அறிவுஜீவகளின்
புத்தகங்களிலோ கவிதைகளிலோ
எந்த இடமும் இல்லாதவர்கள்,
ஆனால் தினம்தோறும்
இவர்களுடைய
ரொட்டியையும் பாலையும்,
சப்பாத்தியையும் முட்டையையும்
விநியோகிப்பவர்கள்.
அவர்களின் வாகனங்களை ஓட்டுபவர்கள்,
இவர்களுடைய நாய்களையும் தோட்டங்களையும்
பராமரிப்பவர்கள்
இவர்களுக்காக வேலை செய்பவர்கள்,
அவர்கள் கேட்பார்கள்:

“உங்களுடைய கனிவும், பண்பும், இரக்கமும்
எங்கே எரிந்து போயின
ஏழைகள் துன்புற்றுக் கொண்டிருந்த பொழுது
நீங்கள் என்ன செய்து கொண்டிருந்தீர்கள்?”

என் இனிய நாட்டின்
அரசியல்சாரா அறிவுஜீவிகளே
உங்களால் பதில் கூற முடியாது.

உங்கள் தைரியத்தை
பினம்திண்ணி கழுகைப் போன்ற
உங்கள் மௌனம் தின்று தீர்க்கும்.

உங்களின் சொந்த விரக்தி
உங்கள் ஆத்மாவை ஆக்கிரமிக்கும்.

நீங்கள் அவமானத்தால் விக்கித்து நிற்பீர்கள்.

(Apolitical Intellectuals: A poem by Otto Rene Castillo)

https://asongfornextday.wordpress.com/2016/06/20/apolitical-intellectuals-a-poem-by-otto-rene-castillo/

Posted in ​மொழி​பெயர்ப்பு, கவிதைகள் | Leave a Comment »

மார்க்சியம்: கருத்துக்கள் எங்கிருந்து தோன்றுகின்றன?

Posted by ம​கேஷ் மேல் ஓகஸ்ட் 25, 2016

பேஸ்புக்கில் 27 November 2015 அன்று மேற்கண்ட தலைப்பின் கருத்தடிப்படையில் ஒரு பதிவு போட்டேன். அதனையும். அதைத் தொடர்ந்த நடந்த பின்னுாட்ட உரையாடலும்:

நண்பர் ஒருவரோடு தொடர்ந்து சில நாட்களாக உரையாடிக் கொண்டிருந்தேன். அவர் விக்கிபிடியாவின் ”Criticisms of Marxism” என்ற லிங்கிலிருந்து பல மேற்கோள்களை எடுத்துப் போட்டு என்னோடு விவாதிக் கொண்டிருக்கிறார். அவருடனான உரையாடல்களில் ஒரு பகுதி:
“… superstructure, as reflections of the economic base of society.
Many critics have argued that this is an oversimplification of the nature of society; they claim that the influence of ideas, culture and other aspects of what Marx called the superstructure are just as important as the economic base to the course of society, if not more so.”

மார்க்ஸ் குறிப்பிடும் மேற்கட்டுமானமாகிய கருத்துக்கள், கலாச்சாரம் மற்றும் இதர அம்சங்கள் பொருளாதார அடித்தளத்தைப் போலவே ஒரு சமூகத்திற்கு முக்கியத்துவம் உடையவை, அதைவிட எந்தவிதத்திலும் குறைந்ததோ கூடியதோ அல்ல. என்கிற இந்த வாதம் மார்க்சின் மேற்கட்டுமானம் அடிக்கட்டுமானம் என்கிற மிகமிக பரந்த வரலாற்று நோக்கிலான ஒரு பார்வையை குறுக்கிப் புரிந்து கொள்வதினால் ஏற்படும் விளைவு ஆகும். மார்க்சின் வழியில் இப்பிரச்சினையை எதிர்கொள்வதானால் நாம் கேட்க வேண்டிய கேள்விகள் அந்த கருத்துக்களும் கலாச்சாரங்களும் எங்கிருந்து உருவாகின்றன என்பதைத்தான்! நிச்சயமாக சமகால சமூக ஓட்டத்தில் அதோடு பயணித்துக் கொண்டிருக்கும் மனிதர்களாகிய நாம் நன்கு அறிவோம் கருத்துக்கள், சிந்தனைகள், கலாச்சாரம், பாராளுமன்றம், சட்டமன்றம், நீதித்துறை, கல்வி, ஊடகங்கள் போன்றவை ஒரு சமூகத்தில் ஏற்படுத்தும் தாக்கங்களை. சார்லஸ் டிக்கன்சின் நாவல்கள் எவ்வாறு இங்கிலாந்தின் குழந்தைத் தொழிலாளர் உழைப்பு முறைக்கு எதிராக தீர்மானகரமான தாக்கங்களை கொண்டு வந்தது என நமக்குத் தெரியும். தொழிலாளர் போராட்டங்களும், தொழிற்சாலை ஆய்வுக்குழுக்களின் அறிக்கைகளும் எவ்வாறு தொழிலாளர் நலச் சட்டங்களை கொண்டு வந்தது என நமக்குத் தெரியும். ஆனால் நாம் புரிந்து கொள்ள வேண்டிய ஒன்று உள்ளது, அது சார்லஸ் டிக்கன்ஸ் போன்றவர்களும், தொழிலாளர்களும், நவீன கால அறிஞர்களும், ஆய்வாளர்களும் எப்பொழுது தோன்றுகிறார்கள்? ஏன் 18 மற்றும் 19ம் நுாற்றாண்டுகளில் தோன்றினார்கள்? ஏன் அவர்கள் அத்தகைய பிரச்சினைகளுக்கு எதிராக எழுதவும் போராடவும் செய்தார்கள் என்பனவற்றை. இவற்றை புரிந்து கொள்வதற்கு நாம் நம் சமகாலத்தில் இருந்து விசயங்களை பார்ப்பதால் மட்டும் சாத்தியமாகாது. இதற்கு நமக்கு நம் கடந்த காலத்தையும், அதன் வாழ்க்கைமுறையையும், அங்கு நிலவிய கருத்துக்களையும், அங்கு பேசப்பட்ட பிரச்சினைகளையும், அங்கு நடைபெற்ற போராட்டங்களையும், அனைத்தையும் இணைத்து வரலாற்றை அதன் முழுமையில் புரிந்து கொள்ளும் பார்வையை வளர்த்துக் கொள்ள வேண்டியிருக்கிறது. அங்குதான் பொருளாதாரம் என்று சொல்லக்கூடிய உற்பத்தி மற்றும் மறுஉற்பத்தி நிகழ்முறை வகிக்கும் தீர்மானகரமான பாத்திரத்தை புரிந்து கொள்ள முடியும். இந்தச் சிந்தனைகளையும், கருத்துக்களையும், புதிய நிறுவன முறைகளையும், சமூக அமைப்பு வடிவங்களையும் கொண்டுவருவது மாறும் புதிய உற்பத்தி மற்றும் மறுஉற்பத்தி நிகழ்முறைதான் என்பதை. ஒரு காலகட்டத்தில் நிலவும் மனிதனின் எல்லாச் சிந்தனைகளும், எல்லா கருத்துக்களும், எல்லா விருப்பங்களும் நிறைவேறுவதில்லை. எல்லா எழுத்துக்களும், ஆய்வுகளும் புதிய சட்டங்களை புதிய மாற்றங்களை கொண்டு வந்துவிடவில்லை. இவற்றிற்கான காரணங்களை ஆராயும் பொழுது. அதற்கான காரணங்களை இந்த நிகழ்முறையின் உள்ளேயே தேடும் நோக்கம் உள்ள போதும் மட்டுமே பொருளாதார அடிக்கட்டுமானத்தின் அடிப்படைகளை புரிந்து கொள்ள முடியும்.

ஈஸ்வரன் அ.கா. அருமை தோழர்.

//ஏன் 18 மற்றும் 19ம் நுாற்றாண்டுகளில் தோன்றினார்கள்? // இந்த நூற்றாண்டில் ஏற்பட்ட இப் பிரச்சினைகள், அன்றைய பொளாதார அடித்தளத்தின் பிரதிபலிப்பே (மேற்கட்டுமானமே) என்பதை புரிந்து கொள்ள வேண்டும்.

மார்க்ஸ் – எங்கெல்ஸ்:-
“மனிதனினுடைய பொருளாயத வாழ்வின் நிலைமைகளிலும், அவனுடைய சமூக உறவுகளிலும், அவனுடைய சமூக வாழ்விலும் ஒவ்வொரு மாற்றம் ஏற்படும்போதும், மனிதனுடைய எண்ணங்களும், கண்ணோட்டங்களும், கருத்துருவாக்கங்களும், சுருங்கக் கூறின், மனிதனுடைய உணர்வும் மாற்றம் அடைகிறது என்பதைப். புரிந்து கொள்ள ஆழ்ந்த ஞானம் தேவையா, என்ன?

பொருள் உற்பத்தியில் எந்த அளவுக்கு மாற்றம் ஏற்படுகிறதோ அந்த அளவுக்கு அறிவுத்துறை உற்பத்தியின் தன்மையிலும் மாற்றம் ஏற்படுகிறது என்பதைத் தவிர கருத்துகளின் வரலாறு வேறு எதை நிரூபிக்கிறது?”
அத்தியாயம்-2
கம்யூனிஸ்டுக் கட்சி அறிக்கை

ஈஸ்வரன் அ.கா. துணைத் தளபதி மார்கோஸ் @//முன்னறிவிக்கப்பட்ட முடிவல்லவா?// இதற்கு நான் கொடுத்த உதாரணம் பொருத்தமானதே.

ஈஸ்வரன் அ.கா. எதையும் ஒரு அணுகுமுறையில் அல்லாமல் அணுகப்படுவதில்லை.

வரலாற்று முறைமையியல் (historical methodology) என்பது வரலாறு பற்றிய அணுகுமுறையாகும். இந்த அணுகுமுறை பல இருக்கின்றன.

மார்க்சியத்தின் வரலாறு பற்றிய அணுகுமுறை என்பது வரலாற்றியல் பொருள்முதல்வாதமாகும்.

Magesh Ramanathan மார்க்சிய அடிப்படை நுால்களை சோந்தமாக ஓரளவுக்கேனும் முழுமையாக படிக்காதவர்களுக்கு நிச்சயம் என்னுடைய சிறு விளக்கம் முழுமையானதாகாது. இன்னும் விரிவாக எழுதவோ உரையாடவோ வேண்டிய விசயமே. ஆனால் சொந்தமாக புரிந்து கொள்ளும் முயற்சியும் வாசிப்பும் இல்லாமல் நிச்சயமாக இது முழுமையடையாது. ஆனால் எனக்கு இதில் நான் குறிப்பிட்டுள்ள இரண்டு மூன்று அம்சங்கள் இது தொடர்பாக இணையத்தில் நடக்கும விவாதங்களில் முக்கியம் எனப் பட்டதால் பகிர்ந்தேன்.

Magesh Ramanathan 1. மார்க்சின் மேற்கட்டுமானம் அடிக்கட்டுமானம் என்கிற மிகமிக பரந்த வரலாற்று நோக்கிலான ஒரு பார்வையை குறுக்கிப் புரிந்து கொள்வதினால் ஏற்படும் விளைவு ஆகும்.

Bharathi Nathan துணைத் தளபதி மார்கோஸ் அவர்களே மார்க்சியம் ஒரு பிரச்னையை ஆராய இயக்கவியல் என்ற கண்ணோட்டத்தை தருகிறது. அந்த இயக்கவியல் என்பது இயற்கை விஞ்ஞானத்தையும், சமூக விஞ்ஞானத்தையும் விளக்குகின்ற வழிமுறை. வெகு சுலபமாய் தோழர் அகா ஈஸ்வரன் செடி உதாரணத்தை கூறி விட்டார் என்ற எண்ணத்தில் நீங்கள் அதைப் பார்ப்பதாக நினைக்கிறேன். அப்படியல்ல, பொருளுக்குள் இருக்கும் இயக்கத்தை சுட்டவே அவர் அப்படிக் கூறினார். செடி கொடி உதாரணத்தை வரலாற்றுச் சிக்கலோடு தொடர்புப் படுத்த முடியுமா? என்று கேட்கிறீர்கள். இயற்கை விஞ்ஞானத்தைப் பற்றிய ஆய்வு முறையை சமூகத்தோடு பொருத்திப் பார்ப்பதே மார்க்சியம். கவனமாக கேளுங்கள் ஆய்வு முறை என்பதே.

Magesh Ramanathan 2. சார்லஸ் டிக்கன்ஸ் போன்றவர்களும், தொழிலாளர்களும், நவீன கால அறிஞர்களும், ஆய்வாளர்களும் எப்பொழுது தோன்றுகிறார்கள்? ஏன் 18 மற்றும் 19ம் நுாற்றாண்டுகளில் தோன்றினார்கள்? ஏன் அவர்கள் அத்தகைய பிரச்சினைகளுக்கு எதிராக எழுதவும் போராடவும் செய்தார்கள் என்பனவற்றை. இவற்றை புரிந்து கொள்வதற்கு நாம் நம் சமகாலத்தில் இருந்து விசயங்களை பார்ப்பதால் மட்டும் சாத்தியமாகாது. இதற்கு நமக்கு நம் கடந்த காலத்தையும், அதன் வாழ்க்கைமுறையையும், அங்கு நிலவிய கருத்துக்களையும், அங்கு பேசப்பட்ட பிரச்சினைகளையும், அங்கு நடைபெற்ற போராட்டங்களையும், அனைத்தையும் இணைத்து வரலாற்றை அதன் முழுமையில் புரிந்து கொள்ளும் பார்வையை வளர்த்துக் கொள்ள வேண்டியிருக்கிறது.
Magesh Ramanathan 3. அதற்கான காரணங்களை இந்த நிகழ்முறையின் உள்ளேயே தேடும் நோக்கம் உள்ள போதும் மட்டுமே பொருளாதார அடிக்கட்டுமானத்தின் அடிப்படைகளை புரிந்து கொள்ள முடியும்.

Posted in கட்டு​ரை | Leave a Comment »

தலித் முதலாளித்துவமும் போலி தலித்தியமும்

Posted by ம​கேஷ் மேல் ஓகஸ்ட் 23, 2016

ஆனந்த டெல்டும்டே இந்தத் தலைப்பில் 2011ல் ஒரு கட்டுரை எழுதியிருக்கிறார். இது ஏதேனும் சிற்றிதழில் மொழிபெயர்ப்பாகியிருக்கிறதா தெரியவில்லை. பல தலித் அறிவாளிகள் உலகமயமாக்கல் தலித்களுக்கு முன்னேற்றத்தை கொண்டுவந்திருக்கிறது என்ற வாதத்தை வைப்பதற்கு மறுப்பாக இந்த கட்டுரை எழுதப்பட்டிருக்கிறது.

இதில் யாரோ வெகுசிலர் தலித்களிலிருந்து பெரிய முதலாளிகளாகவோ, வியாபாரிகளாகவோ ஆனதை வைத்து ஒட்டுமொத்த தலித்களுக்கும் உலகமயமாக்கல் சாதகமானது என்று கூறுவது தவறானதாகும். பெரும்பாலான தலித்களுக்கு உலகமயமாக்கல் மேலும் மிக மோசமான விளைவுகளைத்தான் ஏற்படுத்தியிருக்கிறது. தொழில், அதிகாரவர்க்கம், வியாபாரம் போன்றவற்றில் உள்ளவர்கள் தலித்களில் விதிவிலக்குகள்தானே தவிர, அவர்கள் தலித்களின் முன்னேற்றத்தை அளவிடும் அளவுகோல்கள் அல்ல என்கிறார். இப்படிப்பட்ட நபர்கள் விடுதலைக்கு முன்பாகவும் வெள்ளையர்கள் ஆட்சிகாலத்திலும் இருந்திருக்கிறார்கள் என்கிறார்.

தொழிலாளர்கள் முதலாளிகளாவதோ, தலித்கள் பிராமணர்களாவதோ, ஒடுக்கப்பட்டவர்கள் ஒடுக்குபவர்களாவதோ அல்ல பிரச்சினைக்கான நிரந்தரத் தீர்வு, அவ்வாறு ஆகவும் முடியாது என்கிற எதார்த்தத்தை புரிந்து கொள்ள வேண்டும். அம்பேத்கர் தான் முதன் முதலாக தொழிலாளர் கட்சியை இந்தியாவில் துவங்கினார், அவர் துவங்கிய காலத்தில் கம்யூனிஸ்ட்களே காங்கிரசின் ஒரு கோஷ்டியாகத்தான் இருந்தார்கள் என்கிறார்.

மார்க்சா புத்தரா என்கிற சிறு வெளியீட்டில் அவர் சோசலிசத்தை ஏற்றுக் கொள்கிறார். அதற்கான வழிமுறை புத்தரின் வழிமுறையாகத்தான் இருக்க முடியுமே தவிர வன்முறை பாதையாக இருக்க முடியாது என்பதில்தான் முரண்படுகிறார். தொழிலாளிகள் மத்தியில் அம்பேத்கரின் உரையாடல்கள் குறித்தெல்லாம் குறிப்பிடுகிறார். இப்படியாக நீண்டு கொண்டே போகும் இது போன்ற சிறு கட்டுரைகள் அம்பேத்கர், தலித்கள், தலித்தியம், இன்றைய தலித் கோரிக்கைகள், இயக்கங்கள் குறித்த உரையாடல்களில் முக்கியமானது.

ஆங்கிலத்தில் ஆன்ந்த் டெல்டும்டேவின் கட்டுரைத் தொகுப்பொன்று இலவசமாகவே கிடைக்கிறது. கீழ்க்காணும் லிங்கில்:

https://ia902703.us.archive.org/…/AnandTeltumbdeArticles.pdf

Posted in கட்டு​ரை | Leave a Comment »