எனது நாட்குறிப்புகள்

கொரோனாவிற்கு பின்பான முதலாளித்து உலக நடைமுறைகள் எப்படி மாறலாம்?

Posted by ம​கேஷ் மேல் ஏப்ரல் 23, 2020

தனக்கு கிடைத்த வரத்தையே தனக்கான சாபமாக ஆக்கிக் கொண்டவர்களைப் பற்றி, இந்தியப் புராணங்கள் பேசுகின்றன. ஆனால் தனக்கான சாபங்களையே தனக்கான வரங்களாக மாற்றிக் கொண்டவர்கள் பற்றி அவற்றில் உள்ளனவா தெரியவில்லை.

முதலாளித்துவம் அப்படிப்பட்ட ஒன்றுதான். முதலாளித்துவம் அழியப்போகிறது, இதோ அழிந்து கொண்டிருக்கிறது என பல முறை ஆருடம் சொல்லப்பட்டது.

ஆனால் எல்லாவற்றையும் வெற்றிகரமாக எதிர் கொண்டு, அனைத்து சவால்களையும், நெருக்கடிகளையும், தனக்கு சாதகமாக மாற்றிக் கொள்வதில் பெரும் சாதனைகள் புரிந்த சமூக அமைப்பு முதலாளித்துவம்தான் என்பது வரலாறு.

பல காலகட்டங்களில் ஏற்பட்ட பெரும் மந்தங்கள், அதனைத் தொடர்ந்து உருவான இரு உலகப் போர்கள், உலகின் மூன்றில் இரண்டு பங்கில் ஏற்பட்ட சோசலிச புரட்சிகள் என அனைத்தையும் எதிர் கொண்டு, அவற்றிலிருந்து பாடம் கற்று, அவற்றை வெற்றிகரமாக சமாளித்து, அதிலிருந்து தனது நிர்வாக, இராணுவ, தொழில்நுட்ப, கருத்தியல் மேலாண்மைகளை வளர்த்துக் கொண்டுள்ளது முதலாளித்துவம்.

இன்றைக்கு கோவிட்-19 என சொல்லப்படுகிற தொற்று அபாயம் முதலாளித்துவத்திற்கு விடுத்துள்ள மிகப் பெரிய சவால். இதனை எதிர் கொள்ள முடியாமல் திணறிக் கொண்டிருக்கிறது. மற்றொருபுறம் முதலாளித்துவ நெருக்கடிகளை வெற்றிகரமாக பயன்படுத்தி சோசலிசப்புரட்சியை முன்னெடுக்க வேண்டும் என பாலபாடம் கற்ற பொதுவுடைமையாளர்களும் கூட குழம்பி செயலற்றுத்தான் இருக்கிறார்கள். அரசியல் நெருக்கடிகளை வெற்றிகரமாக பயன்படுத்திக் கொள்வதைப்பற்றித்தானே மார்க்சியம் பேசுகிறது. இப்பொழுது முதலாளித்துவம் சிக்கிக் கொண்டுள்ளது வெறும் பொருளாதார , இராணுவ வகை சார்ந்த அரசியல் நெருக்கடி இல்லையே, இது தொற்று நோய், மருத்துவம் சார்ந்த அரசியல் நெருக்கடியாக அல்லவா உள்ளது.

போகட்டும் எந்தவகையான அரசியல் நெருக்கடியாக இருந்தாலும் அதனை வெற்றிகரமாக பயன்படுத்திக் கொள்ளும் நிலையில் இன்றைக்கு பாட்டாளி வர்க்கமோ அதன் முன்னணிப்படைகளோ இல்லை.

முதலாளித்துவ செயல்பாடுகள் இந்தச் சூழலில் ஒன்றை தெளிவாக புரிய வைக்கின்றன. தன்னுடைய பல தோல்விகளையும், நெருக்கடிகளையும் அதன் தலையில் போட்டுவிட்டு, வருங்காலத்தில் தன்னுடைய யுக்திகளை மாற்றிக் கொள்ள தயாராகிக் கொண்டிருக்கின்றன.

கொரானாவிற்கு பின்பான உலகம் குறித்த சமூக, பொருளாதார மாற்றங்கள் பற்றிய கட்டுரைகள் பலவும், முதலாளித்துவத்தின் புதிய வியூகங்களை கோடிட்டு காட்டுகின்றன. இவற்றிலிருந்து புதிய முதலாளித்துவ மாற்றங்கள் துவங்கலாம். அவை உலகம் முழுதும் இருக்கும் ஏழைஎளிய, படிப்பறிவற்ற, நிரந்நர வருமானம், நிர்ந்தர வேலை, சேமிப்பு, தொழில்பாதுகாப்பு இல்லாத கோடானுகோடி மக்களின் எதிரகாலம் குறித்த பெரும் பதைபதைப்பை ஏற்படுத்துகிறது.

கொரானாவிற்கு பின்பு உலக மக்கள் தொகையில் 50% வீதம் பேர் வேலை இழப்பார்கள் என்கிறது ஆய்வு விபரங்கள். இதன் அர்த்தம் என்ன? இதன் விளைவு என்ன? என்கிறவை முக்கியமான கேள்விகள்.

வேலையிழப்பு என்பது ஒரு புறத்தில் இந்த நோய்த் தொற்றின் தற்காலிக விளைவாக இருந்தாலும் அதன் இன்னொரு புறத்தில் உலக முதலாளிகள் அதனைப் ஏற்கனவே தங்களுக்கிருந்த நெருக்கடிகளை எதிர்கொள்ள பயன்படுத்திக் கொள்ள தயாராகிவிட்டார்கள் என்பதைத்தான்.

ஏற்கனவே கண்காணிப்பு தொழில்நுட்பங்கள் வளர்ந்துள்ள நிலையில் இனி கண்காணிப்புகளுக்கான, தனிமனித சுதந்திரத்திற்கான கட்டுப்பாடுகளை தீவிரப்படுத்தும் சட்டங்கள் எளிதாக நிறைவேற்றப்படும்.

அமெரிக்காவில் நடந்த 9/11 சம்பவம் அமெரிக்க சதியோ அல்லது அல்குவைதாவின் திட்டமிட்ட தாக்குதலோ நமக்குத் தெரியாது. ஆனால் 9/11 சம்பவத்தை பயன்படுத்தி அமெரிக்கா உலக நாடுகளின் வெளியுறவுக் கொள்கைகள், உலக அரசியல் வரைபடம் அனைத்திலும் பாரியமாற்றங்களை கொண்டு வந்தது. ஈராக், லிபியா துவங்கி இன்றைக்கு பல்வேறு ஆசியப் பகுதிகளில் பல நாடுகளின் ஆட்சிகள், அரசியல் அமைப்புகள், சட்ட, நிர்வாக முறைகள் மாற்றி அமைக்கப்பட்டன. அங்கு நடைபெறும் நடைபெற்ற யுத்தங்களுக்கும், கோடிக்கணக்கான மக்களின் உயிரிழப்புகளுக்கும், அகதிகள் ஆக்கப்பட்டதற்கும் அதுவே காரணம். இசுலாமிய தீவிரவாதம் என்ற பெயரில் உலக நாடுகளின் விசா நடைமுறைகள் துவங்கி உள்நாட்டு விவகாரங்களை அணுகும் முறை வரை அனைத்தையும் மாற்றி அமைக்க அச்சம்பவத்தை அமெரிக்காவும் அதன் கூட்டாளிகளும் பயன்படுத்திக் கொண்டனர்.

அது போலவே நாளை கொரோனாவிற்கு பின்பான உலகிலும் மிக மோசமான உள்நாட்டு மற்றும் வெளிநாட்டு விவகாரங்களில், கொள்கை முடிவுகளில் பாரிய மாற்றங்கள் வருமென்பதை ஊகித்துணர்வது அவசியம் எனக் கருதுகிறேன்.

அது தொடர்பாக உடனடியாக மனதில் உதித்த சில அம்சங்களை இங்கே தொகுக்கிறேன். சில சாத்தியமின்மைகளாகவோ, பொருந்தாததாகவோ இருக்கலாம். இவற்றை விவாதங்களுக்காகவே இங்கே முன்வைக்க விரும்புகிறேன். ஆனால் இவை ஒவ்வொன்றும் மனம் போன போக்கில் எழுதியவை இல்லை. இவற்றின் பின்னால் ஆழமான கடந்தகால மற்றும் நிகழ்கால அனுபவங்களின் தொகுப்பிலிருந்துதான் எழுதிப் பார்க்கிறேன் எனக் குறிப்பிட்டுக் கொள்கிறேன். இவை ஒவ்வொன்றிற்கும் இடையில் தொடர்பும் உறவுகளும் உள்ளன.

1. உலகம் முழுதும் கொடுக்கப்படும் பல்வேறு விசா நடைமுறைகள் அதிக கட்டுப்பாடுகள் விதிக்கப்படும். (வேலை விசா, சுற்றுலா விசா, வர்த்தக, தொழில்சார் நுழைவுக்கான விசா, கல்வி விசா, மருத்துவ விசா, போன்றவை) மூலதனமும், உற்பத்தியும் சர்வதேச மயமான உலகில் மனித நடவடிக்கைகள் முற்றிலும் முடக்கப்படலாம், கட்டுப்படுத்தப்படலாம். அரசு தாண்டிய சுதந்திரமான சர்வதேச அமைப்புகள், தொழிலாளர் அமைப்புகள் செயல்பட முடியாவண்ணம் முடக்கப்படலாம்.

2. இணைய செயல்பாடுகள் முன்பை விட பலமடங்கு அதிகமாகலாம். (இணைய வழி கல்வி, இணைய வழி வேலைகள், இணைய வழி தொழில் வர்த்தக கூட்டங்கள், கருத்தரங்குகள், போன்றவை)

3. இணையத்தின் தற்பொழுதைய அரைகுறை சுதந்திர தன்மையும் முற்றிலும் ஒழிக்கப்பட்டு, இணையம் முற்றிலுமாக உலக அரசுகளின் கட்டுப்பாட்டின் கீழ் வரலாம். சர்வதேச கட்டுப்பாடுகளும், சட்டங்களும் நடைமுறைக்கு வரலாம்.

5. இணைய பயன்பாடுகளுக்கான தனிநபர் செலவுகள் பன்மடங்கு அதிகரிக்கலாம். இணைய மற்றும் தொலைபேசிக்கான மாத கட்டணங்கள் தாங்கொனா வகையில் அதிகரிக்கலாம்.

6. சுகாதார நடவடிக்கைகள் என்ற பெயரில் சாலையோரவசிப்புகள், சேரிகள் ஆகியவை மீது கடும் தாக்குதல்கள் தொடுக்கப்படலாம்.

7. உணவுப் பொருட்களின் தரம் மற்றும் சுகாதாரம் என்ற பெயரில் சாலையோர கடைகள், சிறுவர்த்தகங்கள், குடிசைத் தொழில்கள் போன்றவை முற்றிலும் முடக்கப்படலாம்.

8. பெரும் நிறுவனங்கள் கைகளில் உள்ளுர் சந்தைகள் மற்றும் சில்லரை வியாபாரம் முழுதும் கையளிக்கப்படலாம்.

9. மக்களின் மீதான அரசுக் கட்டுப்பாடும், கண்காணிப்பும் மிகப்பெரிய அளவில் அதிகரிக்கலாம்.

10. முன்அனுமதி, முறையான அனுமதி ஆகியவை இல்லாமல் யாரும் எங்கும் செல்வது கடும் கட்டுப்பாடுகள் வரலாம்.

11. சுகாதார, மருத்துவ செலவுகள் மற்றும் அரசின் அது போன்ற செலவினங்களுக்கான வரிகள் பன்மடங்கு அதிகரிக்கலாம்.

12. மருத்துவ துறை முழுதும் கனிணிமயமாக்கப்படலாம். நேரடியாக மருத்துவரை பார்க்காமலே நோயாளிகளை இணைய, தொலைபேசி வழியாகவே விசாரித்து, ஆய்வு செய்து மருத்துவம் செய்யும் முறைகள் உருவாகலாம். அனைத்து மக்களின் அனைத்து மருத்துவ தரவுகளும் மையப்படுத்தப்பட்ட சர்வர்களில் சேமிக்கப்படலாம். இதன் விளைவுகள் மிக விபரீதமாகலாம்.

13. அமைப்புசாரா தொழில்கள் மிகப்பெரும் வீழ்ச்சியையும், பிரச்சினைகளையும் எதிர் கொள்ளலாம். அதனால் அது சார்ந்த தொழிலாளர்கள் வாழ்வு மிக மோசமாகலாம்.

14. உலகமயமாக்கலுக்கும், தேசிய பாதுகாக்கப்பட்ட பொருளாதார முறைக்குமான யுத்தம் கூர்மையடையலாம்.

15. சீனா மற்றும் அமெரிக்கா இடையிலான போட்டிகளும், சண்டைகளும் பல்முனைகளில் பெருகலாம். உலகம் மற்றொருமுறை தெளிவான அணி பிரிதல்கள் நடக்கலாம்.

16. உலக இயங்குமுறை அதன் சிக்கல்கள் குறித்த மிகப் பெரும் விழிப்புணர்வுக்கான இயக்கங்களும் செயல்பாடுகளும் உலகம் முழுதும் ஏற்படலாம்.

Posted in கட்டு​ரை | Leave a Comment »

ஏ.எஸ்.கே எழுதிய ‘பகுத்தறிவின் சிகரம் பெரியார் ஈ.வெ.ரா’

Posted by ம​கேஷ் மேல் ஏப்ரல் 20, 2020

ask

இந்தியப் பொதுவுடைமைக் கட்சியின் மூத்த மற்றும் முக்கிய தலைவராக இருந்த ஏ.எஸ்.கே எழுதிய “பகுத்தறிவின் சிகரம் பெரியார் ஈ.வெ.ரா” நுாலை முழுதுமாக வாசித்து முடித்தேன். இந்நுால் குறித்து தோழர்கள் பலரும் பல காலங்களில் எடுத்துக் கூறியிருந்தார்கள். பொதுவுடைமையாளர்கள் மத்தியில் பெரியார் குறித்து இரு வேறு போக்குகள் இருந்தன. சிலர் பெரியாரை சாதகமாக பார்த்தார்கள் பலர் பெரியாரை எதிர்மறையாக பார்த்தார்கள் என்றும் கூறப்படுகிறது. அதில் ஏ.எஸ்.கே முதல் பிரிவைச் சேர்ந்தவர் என்றும், அதற்கு ஆதாரமாக படிக்க வேண்டிய முக்கிய நுால் என்றும் இது சுட்டிக் காட்டப்படுகிறது.

நான் படித்து புரிந்த கொண்ட வகையில், இந்நுால் குறித்த பொதுவுடைமையாளர்கள் மத்தியில் பெரியார் குறித்து எழுந்த எல்லா கேள்விகளையும், விமர்சனங்களையும் இந்நுாலில் ஏ.ஏஸ்.கே விவாதிக்கவில்லை. அல்லது பெரியாரின் அனைத்து பரிமானங்களையும், அம்சங்களையும் இந்நுால் விவாதிக்கவில்லை. மாறாக அவரை ஒரு நாத்திகராக பார்க்கும் ஒரு கோணத்தை மட்டுமே எடுத்துக் கொண்டு, இந்நுால் இந்தியத் தத்துவப் பின்னணியில் நாத்திகம் என்பது எவ்வாறு வலுவான மரபாக இருந்துள்ளது என்பதை விளக்குகிறது. வேறுவார்த்தைகளில் சொல்வதானால் நாத்திகம், பகுத்தறிவு என்பது வெறும் கடவுள் மறுப்பை மற்றும் கொண்டதல்ல என்ற அடிப்படையில், அதனையே அனைத்தும் தழுவிய சொல்லாக பாவித்து பேசுகிறது. பெரியாரை இந்தியத் தத்துவ மரபிற்கு வெளியில் உள்ளவராக கருதக் கூடாது என்பதையும், அந்த தத்துவ மரபின் வளமான தொடர்ச்சியே அவர் என்பதையும் இந்திய தத்துவ மரபை விரிவாக நுால் முழுதும் விளக்குவதன் மூலம் நிறுவுகிறது.

நுாலில் முதல் பாகத்தில் “பிள்ளையார் சிலை உடைப்பு” என்கிற பெரியாரின் ஒரு போராட்டத்தை எடுத்தாண்டார். மற்றபடி பெரியாரின் போராட்டங்கள், செயல்பாடுகள், சமூக சீர்திருத்த நடவடிக்கைகள், அரசியல். அமைப்பியல், தத்துவ நிலைப்பாடுகள் போன்றவை குறித்தெல்லாம் இந்நுாலில் எதுவுமே பேசப்படவில்லை. உண்மையில் இந்த நுாலின் முதல் பாகத்தின் பெரும் பகுதியை “கணபதியின் வரலாறு” என்றும் இரண்டாம் பாகத்தை “இந்திய தத்துவத்தில் நாத்திக மரபு” என்றும் தலைப்பிட்டு இரு வேறு தனி சிறு வெளியீடாகக் கொண்டு வரலாம்.

கணபதியின் தோற்றம் வரலாறு, பல புராணங்களில் விளக்கப்படும் அதன் தோற்றத்திற்கான பல் வேறு கதைகள் என கணபதி பற்றிய ஆய்வுகளுக்கே முதல் பாகத்தின் 90 சதவீத பக்கங்களும் செலவிடப்பட்டுள்ளன, இரண்டாம் பாகத்தில் வேதங்கள், சம்ஹிதைகள், பிரமாணங்கள், ஆரண்யகங்கள், உபநிஷத்தக்கள், பிரம்மசூத்திரம், பகவத் கீதை, அத்வைதம், துவைதம், விசிஷ்டாத்வைதம் ஆகியவற்றை விளக்கவே 99 சதவீத பக்கங்களையும் இந்நுால் செலவழித்துள்ளது.

இந்த இரு பிரதான ஆய்வு மற்றும் விளக்கங்களின் முன்னும், பின்னும், இடையிலும் ஓரிரு வரிகள் பெரியார் குறித்து வருகின்றன. அவை இப்படியாக விசயங்கள் இருக்கையில் பெரியார் இந்த மரபின் தொடர்ச்சி என்பதை நிருவுவதாக மட்டுமே உள்ளன.

முடிக்கும் பொழுது இவ்வாறு கூறி முடிக்கிறார்

“எனவே, ஆஸ்தீகர்களும் பிற்போக்கு முகாமும் கடுமையாக எதிர்த்த போதிலும், துாற்றியபோதிலும் பெரியார் ஈ.வெ.ரா. புத்தர், மகாவீரர், கபிலர், கணாதர், சங்கரர், இராமானுஜர், மாத்வர், சுவாமி விவேகானந்தர் போன்ற தத்துவஞானிகள், சிந்தனையாளர்கள் வரிசையைச் சேர்ந்தவராகத் திகழ்கின்றார்.

அவர் நாத்திக மரபைச் சேர்ந்த பழுத்த அறிவாளர்.

பெரியார் ஈ.வெ.ரா. பழுத்த தத்துவ அறிவாளர் மட்டுமன்று. இருபதாவது நுாற்றாண்டின் இந்திய பகுத்தறிவின் சிகரம்.

அவர் திருப்பெயர் மக்களிடை நிலைத்து நிற்கும்.”

என்பதாக முடிகிறது.

இந்நுாலைப் படித்து முடித்த பொழுது மனதில் தோன்றிய ஒரு கதை,

ஒருவன் பசுமாட்டைப் பற்றித்தான் தேர்வுக்கு நன்றாக மனப்பாடம் செய்து இருந்தானாம். ஆனால் தேர்வில் தென்னை மரத்தைப் பற்றி ஒரு பக்கத்திற்கு மிகாமல் எழுதவும் எனக் கேட்டார்களாம். அவன் என்ன செய்வது என யோசித்து ஒருவாறு எழுதினானாம்.

பசு ஒரு வீட்டு விலங்கு. பசு பால் கொடுக்கும். பசு ஒரு சாதுவான மிருகம். பசு குட்டியிட்டு பால் கொடுக்கும்…. இப்படியாக ஒரு பக்கமும் எழுதிவிட்டு கடைசியாக அப்படிப்பட்ட பசு தென்னைமரத்தின் அடியில் கட்டிவைக்கப்படும் எனக் கட்டுரையை முடித்தானாம், அந்தக் கதைதான் ஞாபகத்திற்கு வந்தது.

தோழர்கள் மன்னிக்கவும். இந்த என் புரிதலை கிண்டலாகச் சொல்லவில்லை. உண்மையில் இந்த நுாலை படிக்கும் யார் ஒருவருக்கும் இந்த எண்ணம்தான் தோன்றும் என என்னால் உறுதியாகக் கூறமுடியும்.

பெரியாருக்கும், ஏ.எஸ்.கே.விற்கும் 1930களிலிருந்து நல்ல உறவிருந்திருக்கிறது. இந்தியப் பொதுவுடைமையாளர்கள் நடுவில் பெரியாரை விமர்சிக்காதவராக ஏ.எஸ்.கே இருந்துள்ளார். இந்தியத் தத்துவ மரபின் பின்னணியில் வைத்து பெரியாரை புரிந்து கொள்ள வேண்டும் என்கிற உந்துதல் நீண்ட காலமாக ஏ.எஸ்.கே.விற்கு இருந்துள்ளது. இந்த நுாலை எழுத வேண்டும் என அவர் துவங்கியது பெரியார் உயிரோடு இருந்த பொழுதே என்றும், ஆனால் அது இடைநிறுத்தப்பட்டு, நீண்ட இடைவெளிக்குப் பிறகு, பெரியார் இறந்த பிறகே இந்நுாலை முழுமை செய்து வெளியிட்டிருக்கிறார்கள் என்பதும் இந்நுாலிலிருந்து பெறப்படும் செய்திகளாக உள்ளன.

31-03-1974 அன்று இந்நுாலுக்கு ஏ.எஸ்.கே எழுதியுள்ள முன்னுரை மிக முக்கியத்துவம் வாய்ந்த ஒன்று. நுாலை விட இம்முன்னுரைதான் பெரியாரைப் பற்றி மிக அதிகமாக பேசுகிறது. பேசுவதோடு மட்டுமல்லாமல் பெரியாரை பற்றிய சரியான புரிதல்கள் நம்மிடையே இல்லை, அதை உருவாக்கிக் கொள்வதற்கான வழிமுறைகள் சட்டகங்கள் எப்படியாக இருக்க வேண்டும் என இந்த முன்னுரையில் பேசுகிறார். அவை சிறந்த வழிகாட்டுதல்களாக இருக்கும் என்று கருதுகிறேன்.

“அவர் பிராமணியத்தை எதிர்த்தது நாத்திகக் கண்ணோட்டத்தால் என்பதில் சிறிதும் ஐயமில்லை”
“இந்து தத்துவ சாத்திரம் பிராமணியத்தைத் துாக்கிப் பிடித்துத் தாங்கி நிற்கின்றது. ஆகவே, இவை எல்லாவற்றையும் எதிர்ப்பது என்றால் கண்டதற்கெல்லாம் கடவுள் என்ற கற்பனைப் பொருளை முன் கொண்டு வந்து நிறுத்துவதை எதிர்ப்பதேயாகும், சுருங்கக் கூறின், கடவுள் நம்பிக்கை, மூடப்பழக்கவழக்கங்கள் முதலியவற்றை எதிர்ப்பது என்றால் அது நாத்திகம் தான்”
“பெரியார் ஈ.வெ.ரா. அவர்கள் பகுத்தறிவின் சிகரமாக விளங்கி வந்தார்”
“பெரியார் அவர்களைப் பற்றிய சரியான கணிப்பு பல தோழர்களுக்கு இல்லை என்பது என் கருத்து”
“என் கட்சியில் பலருக்கும் என் கருத்துக்கள் என்ன என்பது தெரிந்திருந்தபொழுதிலும் அவை பற்றி கவலைப்படாதவர்கள் பலர்”
“சமுதாயக் கொடுமை, பொருளாதார அடிமைத்தனம். இவ்விரண்டையும் ஒழித்தாலொழிய மனிதன் மனிதனாக வாழ இயலாது, மக்கள் மக்களாக வாழ முடியாது.
இந்தப் பெரும் பணியில் பெரியார் ஈ.வெ.ரா. அவர்கள் முழுக்க முழுக்க ஈட்டுபட்டுத் தன் வாழ்நாள் முழுவதையும், இதற்கே அர்ப்பணம் செய்தவர், அவர் ஆற்றிய பணியை இதுவரை இந்திய மக்கள் சரிவர கணிக்கவில்லை என்பது என் திடமான கருத்து, அவர் பணி தொழிலாளி வர்க்கப் புரட்சிக்கு மிக மிக இன்றியமையாத தடித்தளம்-வழித்தடம் அமைத்து தந்துள்ளது என்பது என் வலிமையான கருத்து”
“நாத்திகத்தையும், பகுத்தறிவையும், பொருள்முதல்வாதத்தையும் ஏற்றுக் கொள்ளாதவர்கள் நம் நாட்டில் பலர் சோசலிஸ்டு கட்சிகள் என்று நிறுவிக் கொண்டு தங்களை சோசலிஸ்ட்கள் என்று சொல்லிக் கொள்கிறார்கள். பகுத்தறிவு என்றால் நாத்திகம். நாத்திகம் இல்லாமல் சோசலிசம் என்பது ஆகாயத்தில் தாமரை பூத்தது என்று சொல்வது போலாகும்”
என்பது போன்ற பல முக்கிய கருத்துக்களும் சிந்தனைகளும் இந்த முன்னுரையில் இடம் பெற்றுள்ளன.

இந்நுால் மா.சிங்காரவேலருக்கு அர்ப்பணிக்கப்பட்டுள்ளது. சிங்காரவேலருடன் நல்ல பழக்கம் இருந்திருக்கிறது. முன்னுரையில் குறிப்பிட்டுள்ளதைப் போல ப.ஜீவானந்தத்துடன் ஏ.எஸ்.கே பெரியார் குறித்து பலமுறை விவாதித்துள்ளார். அந்த அடிப்படைகளில் மா.சிங்காரவேலர், ப.ஜீவானந்தம் போன்றோர்களின் கருத்துக்களையும், அதோடு தான் உடன்படும், முரண்படும் அம்சங்களையும், காரணங்களையும் விரிவாக இந்நுாலில் இடம் பெற்றிருக்குமானால் மேலும் பயனுடையதாக இருந்திருக்கும் என்று தோன்றியது.

படிக்க வேண்டிய வரலாற்று ஆவணங்களில் இதுவும் ஒன்று என்றால் மிகையல்ல.

Posted in கட்டு​ரை | Leave a Comment »

பெரியாரியம் – நிறப்பிரிகை சிறப்பிதழ் கட்டுரைகள்

Posted by ம​கேஷ் மேல் ஏப்ரல் 3, 2020

nirappirigai

“ரசியா மற்றும் கிழக்கு ஐரோப்பிய நாடுகளில் ஏற்பட்ட மாற்றங்களுக்குப்பின் உலகெங்கிலும் மதவாதமும் பாசிசமும் உயிர்ததுள்ளன. இஸ்லாமிய எதிர்ப்பு என்கிற அடிப்படையில் மேலை
ஏகாதிபத்தியங்கள் இணைகின்றன. கிறிஸ்துவ மதவாத சக்திகளின் ஆதிக்கத்தில் கருத்தடை உரிமை மறுப்புச் சட்டங்களெல்லாம் நாடுகள் தோறும் நிறைவேற்றப்படுகின்றன.
ஆசியாவில் இஸ்லாத்திற்கு எதிரான சக்தி என்ற வகையில் இங்கே வளர்ந்துவரும் இந்து பாசிசத்தை அமெரிக்காவும் மேலைநாடுகளும் ஆதரிக்கின்றன. மசூதி இடிப்பிற்குப் பின்பு பாரதீய ஜனதா தலைவர்
சிக்கந்தர் பக்திற்கு அமெரிக்கா பெரிய வரவேற்பளித்தது. இப்படி ஏகாதிபத்தியத்தின் ஆசியோடு புத்துயிர்ப்புப் பெறும் இந்து பாசிசம் வலிமையாகவும் வேகமாகவும் வளர்ந்து வருகிறது. பார்ப்பனியத்தை,
வருணாச்சிரமத்தை நிலைநாட்டுவதுதான் இந்துத்துவத்தின் நோக்கம் என்பதில் அய்யமில்லை. இந்தியாவின் வெறெந்த மாநிலத்தைக் காட்டிலும் தமிழகத்தில் இந்துத்துவம் புத்துயிர்ப்பு பலவீனமாக
இருப்பதற்கு பெரியார் மற்றும் திராவிட இயக்கங்களின் பங்களிப்பை நாம் குறைத்து மதிப்பிட்டுவிட முடியாது. எனினும் வருணாச்சிரம சக்திகள் தமிழகத்தைக் குறிவைத்துச் செயற்படத்
தொடங்கியுள்ளன. இத்தகைய உலகளாவிய பின்னணியில்தான் பெரியாரின் முக்கித்துவத்தை, இன்றைய சூழலில் அவரது பொருத்தப்பாட்டை நாம் யோசிக்கிறோம்.”

– ஆ. மார்க்ஸ், பக். 95, பெரியாரியம், நிறப்பிரிகை கட்டுரைகள்

டிசம்பர் 1995ல் வெளிவந்த இத்தொகுப்பில் கூறப்பட்டுள்ள மேற்கான் மேற்கோள் இன்றைய ஏப்ரல் 2020 சூழலின் பின்னணியில் பார்க்கும் பொழுது அத்தனை ஸ்துாலமாக வருங்காலத்தின் ஆபத்தை கணித்திருக்கிறது என்பதை புரிந்து கொள்ள முடிகிறது. அந்த அடிப்படையில் இது போன்ற முயற்சிகளும், விவாதங்களும் நமக்கு கற்றுக் கொள்ளவும், தொடர்ந்து விவாதித்து நம் அறிவை மேம்படுத்திக் கொள்ளவும் வேண்டிய அவசியத்தை ஏற்படுத்துகின்றன.

நிறப்பிரிகை இதழை நடத்தியவர்கள் யார்?

முன்னாள் சோசலிச நாடுகளின் வீழ்ச்சியோடு, தங்கள் அனுபவப் பின்னணியோடு ருஷ்யப் புரட்சி துவங்கி உலகம் முழுதும் பரவியிருந்த மரபார்ந்த மார்க்சிய சிந்தனாமுறை மற்றும் வழிமுறையினை கேள்விக்குட்படுத்தி அத்தகைய போக்கிலிருந்து குறிப்பாகவும், மார்க்சியத்தின் பொதுப் போக்கிலிருந்து பொதுவாகவும் விலகிக் கொண்ட தமிழகத்தைச் சேர்ந்த சில அறிவுஜீவிகள் இணைந்து நடத்திய குறுகிய கால இதழ் என்பதே என் புரிதல்.

இவ்விதழ் ருஷ்யப் புரட்சியை ஒட்டி துவங்கி தமிழகத்தில் பரவி தமிழக அறிவுச்சூழலில் 80கள் வரை கோலோச்சி வந்த ஒரு வகை சிந்தனாமுறைக்கு தமிழ்ச் சூழலில் கடும் தாக்குதல் தொடுத்த ஒரு முக்கிய இதழ் என்று சொல்லலாம்.

பொதுவான தமிழக இடதுசாரி அறிவுத்துறை பார்வை என்பது, வரலாற்றை, சமூக நிகழ்வுகளை, போராட்டங்களை, மக்களின் வாழ்வாதார பிரச்சினைகளை, அதற்கான தீர்வுகளை, அரசை, அரசு நிர்வாகத்தை, தொழிற்சங்கங்களை, உழைப்பாளிகளை, அறிவுத்துறையினரை, ஆளும் வர்க்க கலாச்சாரங்களை, ஊடகங்களை என சகல துறைகளையும் பார்ப்பதில் ருஷ்யப் புரட்சி துவங்கி வைத்த ஒரு பார்வை. இந்த பெரும் தாக்கம் செலுத்தி வந்த ஒரு பார்வையை முற்றிலும் புரட்டிப் போடுவதற்கான ஒரு சிந்தனாமுறையை இவ்விதழ் தமிழ்ச் சமூக அறிவுத்துறையினர் மத்தியில் ஏற்படுத்த விழைந்தது. அந்த நோக்கிலிருந்து முற்றிலும் புதிய கோணத்தில் தமிழக வரலாற்றை, அதில் நடைபெற்ற இயக்கங்களை, ஆளுமைகளை மறுவாசிப்பு செய்யத் துவங்குவதன் மூலமாக உருவாக்க நினைத்தது.

இது உண்மையிலேயே இடதுசாரி சிந்தனாமுறையில், அதனை நோக்கி வந்த புதிய இளைஞர்கள் மத்தியில் மிகப் பெரும் தாக்கம் செலுத்தியிருக்கிறது என்பதை ஓரளவு உணரவும் முடிகிறது. பலர் நேரடியாக இப்பத்திரிகையை கேள்விப்பட்டிருக்காவிட்டாலும், படித்திருக்காவிட்டாலும், தமிழ் அறிவுச்சூழலில் பொதுவாகவும், இடதுசாரி அறிவுச்சூழலில் குறிப்பாகவும் அனைவரின் சிந்தனா முறையையும் மிகப் பலமாக மாற்றியமைத்திருக்கிறது என்றால் மிகையாகாது என்றே தோன்றுகிறது.

குறிப்பாக தலைப்பில் குறிப்பிட்டுள்ள இதழ் பெரியார் குறித்த சிறப்பிதழாக வந்துள்ளது. பெரியார் குறித்த மரபார்ந்த இந்திய மற்றும் தமிழக இடதுசாரி இயக்கங்கள் மற்றும் தனிநபர்களின் பார்வையை கேள்விக்குட்படுத்துகிறது. அவரை புதிய உலக சூழல்களில் முற்றிலும் புதிய பார்வைகளில் அணுக அறைகூவல் விடுகிறது. மற்றொருபுறம் இடதுசாரிகள் தங்களின் பெரியார் குறித்த நிலைப்பாடுகளை வரலாற்றுப்பூர்வமாக, சமூகரீதியாக, கோட்பாட்டுரீதியாக பொருத்தப்பாட்டுடன் விரிவாக விமர்சிக்கவும், விளக்கவும் வேண்டிய அவசியத்தை ஏற்படுத்துகிறது. அச்சவாலை கோ.கேசவன் தன்னுடைய கட்டுரையில் ஏற்றுக்கொண்டு அச்சிறு கட்டுரையின் சாத்திய எல்லைக்குள் செய்ய முயற்சித்திருக்கிறார்.

கேசவனின் விமர்சனத்தை முக்கியமாக எடுத்துக் கொள்வதற்குக் காரணம், அது மரபார்ந்த மார்க்சிய சட்டகங்களை பயன்படுத்த முயற்சிப்பதும், பொதுவுடமையாளர்களின் லட்சியங்கள், சமூகம் பற்றிய பார்வை, சமூக மாற்றத்திற்கான வழிமுறைகள் ஆகிய பின்னணியில் அணுக முயல்வதுமே.

பெரியாரைப் புரிந்து கொள்ள கோ. கேசவன் காட்டும் வழிமுறை

“குறிப்பான பொருளாதார, அரசியல், கலாச்சார நிகழ்வுகளில் இயங்கிய பெரியார், இவற்றை விளங்கிய/விளக்கிய விதத்தையும் கண்டறிவதனுாடே பெரியாரியத்தின் பயன்பாட்டுத் தளத்தை நாம் அறிந்து கொள்ள இயலும்.” என்கிறார். அதாவது பெரியார் காலத்திய தமிழக, இந்திய சமூக, பொருளாதார பின்புலங்களை சரியாக விளங்கிக் கொள்வதனை அடிப்படையாகக் கொண்டு, அத்தகைய சூழலை எவ்வாறு பெரியார் புரிந்து கொண்டார், விளக்கினார், அதற்கு எதிராக அல்லது மாற்ற வினை புரிந்தார், அதன் தன்மையும் விளைவுகளும் என்னவாக இருக்கின்றன என்பதனை மதிப்பிட வேண்டும் என்கிறார்.

“இந்த விதத்தில் பெரியாரின் மையத்தை அடையாளம் காணவியலும். நிலவுகிற அரசு கட்டமைப்பின் கீழ் தமிழ்பிரதசேத்தின் திராவிட முதலாளிகளின் நலனுக்காக வடவர்-பார்ப்பனர் முதலாளிகளோடு மோதல் என்பதை அடையாளம் காண இயலும். இது மட்டுமே பெரியாரியம் அல்ல. இதைச் சுற்றி பல வளையங்கள் உள்ளன. இவற்றை கணக்கில் எடுக்காமல் இருக்க வியலாது. இவற்றிற்கும் மையத்திற்கும் இயைபும் முரணும் உண்டு.”
இடஒதுக்கீடு, பார்ப்பனிய எதிர்ப்பு, சாதி எதிர்ப்பு, பெண் விடுதலை, தேசிய இனச் சிக்கல், நாத்திகம், கடவுள் மறுப்பு, ஆகியவற்றை அதன் பல வளையங்கள் என்கிறார் கோ. கேசவன். இத்தகைய கோ.கேசவனின் மையம்-வளையங்கள் (விளிம்பு) என்கிற சட்டக ஆய்வுகள் மார்க்சிய வகைப்பட்டவை அல்ல அவை அமைப்பியல்வாத அணுகுமுறைகள் என தமிழவன் இத்தொகுப்பில் உள்ள கட்டுரையில் குறிப்பிடுகிறார்.

“பெரியாரியம் நிலவுகிற அரசு கட்டமைப்பின் கீழ் இயங்குகிறது என்ற அடிப்படையில் அதைச் சீர்குலைக்கிற எந்தவொரு நடைமுறையையும் ஏற்கவில்லை. பெரியாரியம் எந்தவொரு காலத்திலும் மக்களின் எதிர் வன்முறையை ஏற்றுக் கொள்ளவே இல்லை. சட்டவரம்பிற்கு உட்பட்ட கிளர்ச்சி நிலைகளையே மேற்கொள்கிறது. அரசுக் கட்டமைப்புக்கு நெருக்கடி ஏற்படும்பொழுது பெரியார் அதை தன் போராட்டத்தில் பயன்படுத்திக் கொள்ளாமல் போராட்டத்தை நிறுத்திக் கொள்வார்.”

“‘புனிதக் குறியீடுகளை’ துாக்கிப் போட்டுடைக்கும் வடிவங்கள் மக்களின் தாழ்நிலையிலான உணர்தலுக்கும் அறிதலுக்கும் ஏற்ப சரியான தொடக்கங்களே. இவை எந்தவொரு பிரச்சினையின் விளிம்பை மட்டுமே தொட்டு நிற்கின்றன. மக்களுக்கு உடனடியாக விளங்கத்தக்க அளவிலும் மக்கள் உடனடியாகக் கிளர்ந்தெழத் தக்க விதத்திலும் பெரியாரியக் கிளர்ச்சி வடிவங்கள் இருப்பினும, அடுத்தடுத்த உயர்நிலை வடிவங்களுக்கான தொடக்கங்களாக இல்லாமல் தொடங்கிய வடிவத்திலேயே தொடர்ந்து நிலவின.” என இந்தி எழுத்து அழிப்பு, பிள்ளையார் பொம்மைகள் உடைப்பு, இராமர் பட எரிப்பு, தேசியக் கொடி எரிப்பு, இராமாயண, வேத, சட்ட புத்தகங்கள் எரிப்பு போன்றவற்றை பெரியாரியத்தின் எதிர்ப்பு வெளிப்பாட்டு வடிவங்களாகக் குறிப்பிடுகிறார்.

இப்பிரச்சினைகள் குறித்து பேசும் பொழுது ஆ.மார்க்ஸ் கிராம்சியின் War of Positions – War of Movements என்கிற கருத்தாக்கங்களை வைத்து பெரியாரியத்தை அணுக இராஜன்குறை மற்றும் வேறு சிலர் பரிந்துரைக்கும் அம்சங்களை குறிப்பிட்டுப் பேசுகிறார்.

“மார்க்சியம் தோற்கவில்லை” என வாதிட்டவர்களும் நாங்கள்தான். அறியப்பட்ட மார்க்சியத்திற்கு கிடைத்த அடிகளின் வெளிச்சத்தில் ஆழமாக ஆராயும் போதுதான் ஆளும் வர்க்கம் என்கிற உள்ளடக்கத்தை மட்டும் மாற்றி சிவில் சமூகத்தின் பல்வேறு வடிவங்களையும் அப்படியே வைத்திருந்ததன் விளைவுதான் இன்றைய தோல்விகள் என்கிற முடிவுக்கு வந்தோம்.”
-பக் 108

“இந்துக் குடும்பம், இந்து மதம், இந்தியக் கல்வி, ஒழுக்க மதிப்பீடுகள், தொடர்புச் சாதனங்கள் முதலியவை செயற்படுகின்றன. இந்தக் கூறுகளைத்தான் நாம் சிவில் சமூகம் என்கிறோம்.

ஆட்சியதிகாரத்தைக் கைப்பற்றிய பின்னரும்கூட பழைய சிவில் சமூகங்களில் உரிய மாற்றங்களைச் செய்து தகர்க்காமல், மேலாண்மையில் கிழிசலை ஏற்படுத்தாமல், என்னதான் பொருளாதார மாற்றங்களைச் செய்தாலும் மக்களுக்கு விடிவு ஏற்படப் போவதில்லை என்பதற்குப் புரட்சிக்குப் பிந்திய சமூகங்கள் சான்றாகிப் போன இன்றைய சூழலில் மீ்ண்டும் கிராம்சி போன்றோரின் சிந்தனைகள் முக்கியம் பெறுகின்றன.

ஏகாதிபத்தியத்திற்கும் உள்ளுர் ஆதிக்க சக்திகளுக்கும், இந்தியாவில் பார்ப்பன உயர்சாதி ஆதிக்கங்களுக்கும் (உள்ளுர் முதலாளிகளாகவும் இவர்களே உள்ளனர்) உகந்த பழைய மேலாண்மையைத் தகர்க்காமல், பழைய சிவில் சமூகத்தில் கலகங்களை மேற்கொள்ளாமல், பொருளாதார மாற்றங்களையும், ஆட்சி அதிகாரத்தையும் நோக்கிய நேரடியான வர்க்கப் போராட்டங்களை – கிராம்சி இதனை war of Movements என்பார் – நோக்கி மக்களை ஈர்ப்பது சாத்தியமில்லை. இதனை உலக வரலாறு மட்டுமல்ல, இந்திய வரலாறும் நிரூபித்துவிட்டது. இந்தச் சூழலில் நாம் மேலாண்மையில் சிதைவை ஏற்படுத்தக் கூடிய War of Positions முதலில் மேற்கொள்ள வேண்டியிருக்கிறது. இதனை மேற்கொள்ளாமல் War of Movements இல் இறங்கினால் தோல்வியில்தான் முடியும். இந்த வகையில்தான் நாம் கிராம்சி, பெரியார் போன்றோரைக் கவனிக்க வேண்டியிருக்கிறது.”

– பக் 98

இதில் எனக்குள்ள சந்தேகம் என்பது கருத்தியல் மேலாண்மையும் – பொருளாதார ஆதிக்கங்களும் – ஆட்சி அதிகாரமும் தனித்தனியே கையாள வேண்டிய/கையாளப்படக்கூடிய ஒன்றா? சாதிய ஒடுக்குமுறை, ஏற்றதாழ்வு – கருத்தியல் மேலாண்மை – பொருளாதார ஆதிக்கம் – ஆட்சி அதிகாரம் என்பன ஒன்றோடு ஒன்று பின்னிப்பினைந்த, ஒன்றை ஒன்று ஆதரித்தும் பாதுகாத்தும் நிற்கின்ற ஒரு ஒருங்கிணைந்த வடிவம்தானே சமூக அமைப்பு. ருஷ்ய, சீன புரட்சிகளின் போது லெனின், மாசேதுங் போன்றவர்கள் ஆட்சி அதிகாரத்திற்கான போராட்டங்களை கருத்தியல் மேலாண்மைகளை, சமூக ஆதிக்கங்களை, உள்ளுர் ஆதிக்க பண்பாடுகளை உடைப்பதன் வழியாக அதற்கான மாற்றுகளை முன்வைப்பதற்கான கருத்தியல் போராட்டங்களின் ஊடாகத்தானே செய்தார்கள்.

மேலும் கோ. கேசவன், பெரியாரியம் “தமிழக மக்களை ஆதிக்கம் செலுத்தும் ஏகாதிபத்தியத்தை ஆதரிப்பதோடு மட்டுமின்றி, நிலவுகிற முதலாளிய சமூக அமைப்பை அடிப்படையில் ஒத்துக் கொள்வதுடன், சார்பு முதலாளிகளுக்கு இடையிலான மோதலில் திராவிட முதலாளிகளின் நலன்களுக்கான வர்க்கக் கண்ணோட்டத்துக்கு இனவழிப்பட்ட சித்தாந்த நியாயம் கற்பிக்கிறது”

“இந்த மையம் – முதலாளிய அரசுக் கட்டமைப்பை ஒத்துக்கொள்ளல், ஏகாதிபத்திய ஆதரவு, ஏகாதிபத்திய சார்பு திராவிட முதலாளிகளுக்கான ஆதரவு என்ற பெரியாரின் மையம் – முற்றாக மறுதலிக்கப்பட வேண்டும்.. பெரியாரிய மையம் ஒர் எதிர்மறை ஆசான் என்ற விதத்தில் மறுதலிக்கப்பட வேண்டியதாகும்.”

“ஆனால் பெரியாரியம் இத்தோடு தன்னைச் சுருக்கிக் கொள்ளவில்லை. தமிழகச் சூழலில் வகுப்புவாரி இட ஒதுக்கீடு, தேசிய இனச் சிக்கல், பார்ப்பனியம், சாதியம், தீண்டாமைக் கொடுமை, பெண்விடுதலை, நாத்திகம், பகுத்தறிவு, என்பன போன்ற அரசியல், சமூக வாழ்வியல், அறிவுத்துறை அம்சங்களின்மீது தொடர்ந்து வினையாற்றிக் கொண்டே வந்தது. இவை எல்லாவற்றிலும் பெரியாரியத்துக்கு உரிய வரலாற்று ரீதியிலான முன்வைப்புகளையும் சாதகக் கூறுகளையும் நாம் முழுமனதாக ஏற்கும் நேரத்தில், பெரியாரிய நிலைப்பாட்டிலிருந்தே இவற்றின்மீது நாம் குறுக்கிடல் இயலாது. அந்த விதத்தில் பெரியாரியத்தின் சுற்றெல்லை வளையங்கள் கடக்கப்படுவதன் மூலம் – வரலாற்று ரீதியிலான நியாயங்களும் வர்க்க ரீதியிலான தேவைகளும் உட்கிரகிக்கப் படுவதன்மூலம் – பெரியாரியத்தின் சாதகக் கூறுகளைக் கணடடையவும் கையாளவும் முடியும். இந்த விதத்தில் பெரியாரியம் – ஒரு பகுதி ஆசானாக உள்ளது. பெரியாரின் உலகக் கண்ணோட்டமும் இனவழிப்பட்ட சித்தாந்தமும் முதலாளிய சிந்தனை வரையறையும் வழங்கியுள்ள தடைகளைக் கடப்பதன் மூலமே மேற்சொன்ன கருத்தாக்கங்களை வரலாற்று ரீதியில் முற்போக்காக எடுத்தச் செல்ல இயலும்.”

“‘பார்ப்பனியத்தை எதிர்க்கிறோமே தவிர பார்ப்பனர்களை அல்ல’ என பெரியார் சொன்தையும், அப்படிச் சொல்லியிருந்தாலும் பார்ப்பன நிலவுடைமையாளர்கள், முதலாளிகள், அரசியல்வாதிகள் ஆகியோருடன் உடன்பாடு கொள்வதற்கான சலுகையாக பெரியாரிய நிலைப்பாடு அமைந்துவிடுகிறது. இங்கு பார்ப்பனிய எதிர்ப்பில் பெரியாரியம் போதுமானதாக மட்டுமிராது, பொருந்துவதாகவும் இல்லை. பார்ப்பனியத்தை முழுமையாக எதிர்க்க வேண்டும், அதோடு ‘நாம் எதிர்ப்பது பார்ப்பனர்களை அல்ல’ என்பது பார்ப்பனரில் ஜனநாயக சக்திகளோடு முற்போக்கு சக்திகளோடும் அரசியல் பொருளாதார சமூக உறவு வைத்துக் கொள்தலாகும்.”

என்பவையே இக்கட்டுரையில் கோ.கேசவன் கூறும் சாரமான விசயங்களாக உள்ளன.

பெரியாரை புரிந்து கொள்வதற்கு ஆ. மார்க்ஸ் இத்தொகுப்பிலும் பெரியார் குறித்த தனது நுாலிலும் கூறும் கருத்துக்கள்.

1. ஒன்றை மதிப்பிடுவதற்கான சட்டகங்களை அதற்குள்ளிருந்தே உருவாக்கி வேண்டுமே அல்லாது வெளியில் உள்ளவற்றைக் கொண்டு மதிப்பிடக்கூடாது.
2. சுய உறுதி பெற வேண்டுமானால் ஒருவன் என்ன விதமான பற்றுகளையும், வழிகாட்டல்களையும், கொள்கைகளையும் விடுதல் அவசியம்.
3. ‘எனக்குத் தலைவனே இல்லை’ என்பதையும் ‘நான் சொல்கிறபடிதான் பிறர் நடக்க வேண்டுமேயொழிய பிறர் சொல்கிறபடி நடக்கிற எண்ணமற்றவன் நான்’ என்பதையும் அடிமை தன்னிலையை விட்டொழித்த விடுதலையடைந்த ஒரு மனிதனின் வெளிப்பாடாகவே நாம் கருத வேண்டும்.
4. எல்லோருக்கும் பொதுவான உண்மைகளோ, ஒழுக்கங்களோ, சரி-தவறுகளோ இல்லை. நான் சரி என நினைப்பது எல்லோருக்கும் சரியாக இருக்க வேண்டும் என்பதில்லை.
5. எல்லா இழிவுகளுக்கும் கலாச்சார கட்டமைப்புகள் தான் அடிப்படையாக உள்ளன என்பதிலும் அக்கலாச்சாரக் கட்டமைப்புகளைத் தகர்ப்பதிலும் பெரியார் குறியாய் இருந்தார். வாழ்நாள் முழுக்கக் கலாச்சாரப் போராளியாகவே திகழ்ந்தார்.
6. நான் கடவுள் இல்லை என்று சொல்கிறவன் இல்லை. இருக்கிறது என்று ஒப்புக் கொள்ளவும் இல்லை. புராண இதிகாச வேத சாஸ்திரங்களை ஒப்புக்கொள்ளாதவர்களையே பார்ப்பனர் நாத்திகன் என்று குறிப்பிடுகின்றனர். அவர் தன்னை நாத்திகன் அல்ல தாராளவாதி என்று குறிப்பிட்டுக் கொண்டார்.

என்கிற புள்ளிகள் பெரியார் குறித்த விவாதங்களில் முக்கிய புள்ளிகள் என்றே கருதுகிறேன்.

பாட்டாளி வர்க்க புரட்சியே, சோசலிச குடியரசே, வர்க்கப் போராட்டமே, நிலவுகின்ற அரசை துாக்கியெறிவதற்கான போராட்டம் ஒன்றே இந்திய தமிழக உழைக்கும் மக்களுக்கான உண்மையான முழுமையான விடுதலையாக இருக்க முடியும். அதைத் தவிர மற்ற சீர்திருத்த நடவடிக்கைகள் அனைத்தும் ஏதோ ஒரு வகையில் ஆளும் வர்க்கத்திற்கான சேவையாகவே முடியும். இத்தகைய நிலைப்பாட்டைக் கொண்ட இடதுசாரி அணிகளின் தரப்பு வாதமாகவே கோ.கேசவனின் கட்டுரை இத்தொகுப்பில் இடம் பெற்றுள்ளது எனக் கருதுகிறேன்.

நிலவுகின்ற அரசை ஆயுதப் போராட்டம் மூலமாக துாக்கியெறிதல், பாட்டாளி வர்க்க புரட்சி, வர்க்கப் போராட்டம், சோசலிச குடியரசு போன்ற கருத்துக்களின் மீதான நம்பிக்கை இழந்த, நம்பிக்கையற்ற, மாற்றுக் கருத்துக்கள் கொண்டவர்களுக்கும், மார்க்சிய வரலாற்றுப் பொருள்முதல்வாத, இயக்கவியல் பொருள்முதல்வாத கருத்தினங்களை மறுக்கிற அல்லது அறிமுகம் இல்லாதவர்களுக்கும் மேற்கண்ட கோ. கேசவனின் எழுத்துக்களுக்குப் பின்புள்ள சிந்தனைகளை புரிந்து கொள்வதோ, ஏற்றுக் கொள்வதோ, உள்வாங்குவதோ, அது எழுப்பும் சிக்கல்கள் குறித்து யோசிப்பதோ கடினமானது என்பதை புரிந்து கொள்ள முடிகிறது.

இக்கட்டுரைத் தொகுப்பில் உள்ள பிற கட்டுரைகளான முன்னுரை மற்றும் இராஜன்குறை, ஆ. மார்க்ஸ்-போ.வேல்சாமி ஆகியோரின் கட்டுரைகள் முழுதும் மேற்கான் பத்திக்கான அடிப்படைகளாக உள்ளன.

குறிப்பாகச் சொல்வதென்றால் மார்க்சிய மரபார்ந்த பார்வைகளின்படி சீர்திருத்தவாத சிந்தனைகளுக்கும் – புரட்சிகர சிந்தனைகளுக்கும் இடையிலான அடிப்படையான முரணிலிருந்துதான் பெரியார் குறித்த மொத்த விவாதங்களுமே இங்கு நடைபெறுகிறது என்பதை ஒருவர் புரிந்து கொள்ள முடியும்.

சீர்திருத்தம் என்பதைப் பொறுத்தவரை, பெரியாரே கூட அதைத்தான் ஒளிவுமறைவின்றி வெளிப்படையாக தன் தரப்பாகவும் குறிப்பிடுகிறார். நான் ஒரு சீர்திருத்தக்காரன் ஆனால் வழக்கமான சீர்திருத்தக்காரர்களைப் போல் அல்லாமல் ஆழமாக, அழுத்தமாக, விடாப்பிடியாக, உக்கிரமாக அச்சீர்திருத்தங்களுக்காக போராடக்கூடியவன் என தன்னைப் பற்றி குறிப்பிட்டுக் கொள்வார். அதாவது வழக்கமான சீர்திருத்தக்காரர்களுக்கும் புரட்சிக்காரர்களுக்கும் இடைப்பட்ட ஒரு வகை ஹைபிரிட் வகை போன்றதாகத் தன்னைப்பற்றி குறிப்பிட்டுக் கொள்வார்.

கோ. கேசவன் வந்து சேர்ந்த முடிவுகளை நாம் ஏற்றுக் கொள்ள முடியாது. ஆனால் அவர் ஆய்வு செய்து எழுப்பும் பல கேள்விகள், விமர்சனங்கள் முக்கியமானவை என்றே நினைக்கிறேன். நாமும் கூட நிலவுகின்ற அரசை ஆயுதப் போராட்டம் மூலமாக துாக்கியெறிதல், பாட்டாளி வர்க்க புரட்சி, வர்க்கப் போராட்டம், சோசலிச குடியரசு ஆகியவை பற்றிய மார்க்சியப் பார்வைகளை தவிர்ப்போமேயானால், கோ.கேசவன் எழுப்பும் அத்தனை கேள்விகளையும், விமர்சனங்களையும் முற்றிலுமாக மறுத்தொதுக்கிவிட்டு. பிற கட்டுரைகளோடு முழுவதுமாக இணங்கிப் போகலாம், அவற்றில் எந்த பெரிய முரண்பாடும் அந்தக் கோணத்தில் இருந்து பார்க்கும் பொழுது அவற்றின் மீது ஏற்படாது.

மார்க்ஸ் கூறிய மற்றொரு கருத்தின்படி “மக்கள் தங்களுக்கு நடைமுறைச் சாத்தியமான வழிகளில் தான் சமூகத்தின் மீது வினைபுரிந்து மாற்றங்களை உண்டு பண்ணுகிறார்கள்” என்ற பார்வையில் பார்ப்போமேயானால்,

தமிழகச் சூழலில் பெரியாரின் செயல்பாடுகள், ஆகச் சாத்தியமான வழிமுறைகளில் ஒரு மிகப் பெரிய ஜனநாயக மாற்றங்களை தமிழ் நிலப்பரப்பில் செய்திருக்கிறது, இந்திய சூழலின் குறிப்பாக வட இந்திய சூழலின் பின்னணியில் அந்த மாற்றங்களை பார்க்கும் பொழுது அது நிச்சயமாக “ஆஹாவென்று எழுந்த யுகப்புரட்சிதான்”. எந்தவொரு செயலுக்கும் எதிர்விளைவுகள் உண்டு என்ற அடிப்படையில், பெரியாரிய செயல்பாடுகளுக்கும் இந்நில பரப்பில் சில பல எதிர்விளைவுகள் ஏற்படவே செய்தன. அந்த எதிர்விளைவுகளும், அதைச் செய்த பொழுது இங்கு ஏற்பட்ட பாதிப்புகளும், சேதங்களும் உலக வரைபடத்தில் வேறெங்கும் இது போன்ற நடைவடிக்கைகளின் போது ஏற்பட்ட சேதங்களை, பாதிப்புகளையும், எதிர்விளைவுகளையும் விட மிகக் குறைவுதான். அதிலெல்லாம் கூட பெரியாரியத்தின் வெற்றிகளை திறனாய்வு செய்ய வேண்டும்.

சமரசம், அஹிம்சை, சட்டவழிப்பட்ட போராட்டங்கள், மக்கள் மத்தியில் தீவிர பிரச்சாரத்திற்கு முக்கியத்துவம் தருதல் அல்லது மக்களின் மனமாற்றங்களுக்கு அதிக முக்கியத்துவம் தருதல், புனிதக் குறியீடுகளுக்கு எதிரான போராட்டங்கள், போன்றவை இந்திய சமூகங்களில் வெகுகாலமாக இருந்து வந்த நடைமுறைகள், இவையும், இவற்றின் முறையும் மேற்கத்திய முறைகளுக்கு முற்றிலும் மாறானவையாகவே இருந்துள்ளன.

இந்திய சுதந்திரப் போராட்ட காலத்திலும், இத்தகைய போக்குகளின் செல்வாக்கை அனைத்து தரப்பு அரசியல் குழுக்கள் மத்தியிலும் நாம் பார்க்க முடிகிறது. காந்தி, அம்பேத்கர், சிங்காரவேலர், பெரியார் என அனைவர் மத்தியிலும் இத்தகைய அம்சங்களில் பல ஒத்த தன்மைகளை நாம் பார்க்க முடியும். இவற்றை ஆழமாக கற்றுக் கொள்தல் என்பது இந்திய சமூகங்களின் பண்பாட்டு வரலாற்று சமூக மற்றும் சமூக உறுப்பினர்களின் அகக் கட்டுமானங்களை புரிந்து கொள்வதற்கும் அதற்கு இயைந்து செயல்படவும் அவசியமாகும்.

Posted in கட்டு​ரை | Leave a Comment »

பாசிச காலத்தில் கொரோனா-2

Posted by ம​கேஷ் மேல் மார்ச் 31, 2020

migrants4

இரண்டு நாட்களுக்கு முன்பு தினமலர், இன்றைக்கு கூறப்படும் “Social Distancing” தான் நாங்கள் அன்றைக்கு 2000 ஆண்டுகளுக்கு முன்பே கூறிய “தீண்டாமை” என்கிற பொருளில் ஒரு கருத்துப்படம் வெளியிட்டு. தங்களுடைய பார்ப்பனிய, மனுதர்ம வாழ்க்கைமுறையையும், சாதி, வருணக் கோட்பாடுகளையும் சரியென நவீன வாழ்வும் மெய்பிப்பதாக பொருள்படும்படி எழுதியும் பேசியும் வருகிறார்கள்.

BrahminicalFascistIdeas

“Social Distancing” என்பதை “தீண்டாமை” “ஆச்சாரம்” என்கிற சமூக விரோத, மனித விரோத, ஜனநாயக விரோத செயல்களை நியாயப்படுத்துவதற்கும், மக்களை குழப்பி சரியென ஏற்க வைக்கவும் முயற்சிக்கிறார்கள்.
“Social Distancing” என்பது ஒவ்வொரு மனிதரையும் மற்றவர்களிடமிருந்து குறிப்பிட்ட காலத்திற்கு உடல்ரீதியாக நெருக்கமாக இல்லாமல், சுகாதாரமாக இருக்க பரிந்துரைப்பது. இதில் குறிப்பிட்ட சமூகத்தினரை குறிப்பிட்ட சமூகத்தினருக்கு எதிராக கீழ்மைபடுத்துவதையோ, அவமானப்படுத்துவதையோ, விலக்கி வைப்பதையோ அடிப்படையாகக் கொண்டதல்ல “தீண்டாமை”யைப் போல. இந்த அடிப்படை உண்மைகளை மூடி மறைத்து, குழப்பி மக்களை ஏற்கச் செய்வதுதான் 2000 ஆண்டுகளாக பார்ப்பனியத்தின் செயல்பாடாக உள்ளது.

Shaktimaan-siteஅதே போல இன்றைக்கு இராமாயணம், சக்திமான், சாணக்கியா போன்ற இந்துத்துவ அரசியலுக்கு ஏற்ப மக்களின் மனங்களை உளவியல்ரீதியாக தயார்படுத்தும் தன்மையுள்ள பல பழைய தொடர்களை துாசி தட்டி மறு ஒளிபரப்பு செய்ய அரசு தொலைக்காட்சிகளை மத்திய பாசிச அரசு “மக்களின் விருப்பப்படி” என்ற பொய்யான காரணத்தைக் கூறி ஆணையிட்டுள்ளது. வீடுகளில் தனிமையில், செயல்பட பெரிய வேலைகளின்றி இருக்கும் மக்களை தங்கள் கருத்திற்கு ஏற்ப மாற்றியமைக்க தங்கள் கருத்துபரப்புரை செய்வதற்கு இந்த நோய் தொற்று காலத்தை பயன்படுத்திக் கொள்ள நினைக்கிறது இந்துத்துவ பாசிசம்.

ஏற்கனவே வட மாநிலங்களைப் போல சாதி, தீண்டாமை, மனுதர்மம், வேதம் ஆகியவற்றை புகழ்ந்து விதந்தோதி பேசி வரும் எச். ராசா, எஸ்.வி.சேகர் போன்றவர்கள் பல மோசமான கருத்துக்களை தொலைக்காட்சி, வாட்ஸ்அப், பேஸ்புக் போன்றவற்றில் பேசியும் பரப்பியும் வருகிறார்கள்.

ஒடுக்கப்பட்ட சாதிகளை சேர்ந்த ஏழை எளிய உழைக்கும் மக்கள் மீது உத்திரப் பிரதேச அரசு கடும் விசத்தன்மை நிறைந்த நீரை பாய்ச்சி அடிப்பது போன்ற அவலமான சூழலில், அதனை குற்றவுணர்வின்றி மத்தியதர வர்க்கங்களும், நிர்வாகமும் செயல்படுவதற்கும் கடந்து போவதற்கும் மேற்கண்ட பார்ப்பன பாசிச கருத்தியல் பிரச்சாரங்கள் பெருமளவில் காரணமாக அமைகின்றன என்றால் மிகையாகாது.

Posted in கட்டு​ரை | Leave a Comment »